ନବୀନଙ୍କ ପ୍ରଶଂସାରେ ପାର୍ଲିଆମେଣ୍ଟ ଷ୍ଟାଣ୍ଡିଂ କମିଟି

ନୂଆଦିଲ୍ଲୀ/ ଭୁବନେଶ୍ୱର: ଟୋକିଓ ଅଲିମ୍ପିକ୍ସରେ ଭାରତୀୟ ହକି ଦଳର ଉତ୍ତମ ପ୍ରଦର୍ଶନ ଏବଂ ୪୧ ବର୍ଷ ପରେ ପୁରୁଷ ହକି ଦଳକୁ ପଦକ ମିଳିବା ଘଟଣା ସମଗ୍ର ଦେଶବାସୀଙ୍କୁ ଉଲ୍ଲସିତ କରିଥିବା ବେଳେ ଏହାର ପ୍ରାୟୋଜକ ଭାବେ ଓଡ଼ିଶାକୁ ସ୍ୱତନ୍ତ୍ର ସ୍ଥାନ ଦେଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ୟମକୁ ଚାରିଆଡୁ ପ୍ରଶଂସା ମିଳୁଛି । ଏପରିକି ଅଲିମ୍ପିକ୍ସରେ ବ୍ରୋଞ୍ଜ ପଦକ ହାସଲର ଶ୍ରେୟ ନବୀନଙ୍କୁ ଦେଇଛନ୍ତି ଭାରତୀୟ ପୁରୁଷ ହକି ଦଳର କ୍ୟାପେଟନ୍ ମନପ୍ରୀତ୍ ସିଂ । ଆଜି ପାର୍ଲିଆମେଣ୍ଟ  ଷ୍ଟାଣ୍ଡିଂ କମିଟି ମଧ୍ୟ ଓଡ଼ିଶା ମୁଖ୍ୟମନ୍ତ୍ରୀଙ୍କ ଉଦ୍ୟମକୁ ପ୍ରଶଂସା କରିଛନ୍ତି । କ୍ରୀଡ଼ାର ଉନ୍ନତି ପାଇଁ ଅନ୍ୟ ରାଜ୍ୟମାନେ ଓଡ଼ିଶା ମଡ଼େଲ୍ ଆପଣେଇବାକୁ ପରାମର୍ଶ ଦେଇଛନ୍ତି ।

‘୨୦୨୧ ଅଲିମ୍ପିକ କ୍ରୀଡ଼ା ପ୍ରସ୍ତୁତି’ ବିଷୟ ଉପରେ ଶିିକ୍ଷା, ମହିଳା, ଶିଶୁ, ଯୁବ ଏବଂ କ୍ରୀଡ଼ା ବିଭାଗ ସମ୍ପର୍କିତ ପାର୍ଲିଆମେଣ୍ଟର ଷ୍ଟାଣ୍ଡିଂ କମିଟିର ଆକ୍ସନ୍ ଟେକେନ୍ ରିପୋର୍ଟ ଆଜି ଉଭୟ ଗୃହରେ ଉପସ୍ଥାପିତ ହୋଇଥିଲା । କମିଟି ରିପୋର୍ଟ ସମ୍ପର୍କରେ ଜାରି ପ୍ରେସ୍ ରିଲିଜ୍ ରେ କୁହାଯାଇଛି,

“The Committee in its collective wisdom has appreciated the efforts taken by Shri. Naveen Patnaik, Hon’ble Chief Minister of Odisha in setting up the High Performance Sports Centres and sponsoring both men’s and women’s Hockey teams through Hockey India since 2018, which has translated into better performance for both these teams at Tokyo Olympics 2021.”

ଖାଲି ସେତିକି ନୁହେଁ, କର୍ପୋରେଟ୍ ପ୍ରାୟୋଜକ ଛଡ଼ା ଅନ୍ୟ ରାଜ୍ୟମାନେ ଓଡ଼ିଶା ମଡ଼େଲ ଅନୁକରଣ କରି ନିର୍ଦ୍ଦିଷ୍ଟ କ୍ରୀଡ଼ାକୁ ପ୍ରୋତ୍ସାହନ ଦେବା ସହ ଅତ୍ୟାଧୁନିକ ସ୍ପୋଟର୍ସ ସେଣ୍ଟର ପ୍ରତିଷ୍ଠା କରିବାକୁ କମିଟି ପରାମର୍ଶ ଦେଇଥିବା ପ୍ରେସ୍ ରିଲିଜ୍ ରେ କୁହାଯାଇଛି ।

ନବୀନ ପଟ୍ଟନାୟକଙ୍କ ନେତୃତ୍ୱରେ ଭାରତୀୟ ହକିର ଉତଥାନ କାହାଣୀ ପାର୍ଲିଆମେଣ୍ଟର ଷ୍ଟାଣ୍ଡିଂ କମିଟି ରିପୋର୍ଟରେ ସ୍ଥାନ ପାଇବା ଉଭୟ କ୍ରୀଡ଼ା ଓ ରାଜନୈତିକ ମହଲରେ ଚର୍ଚ୍ଚାର ବିଷୟ ହୋଇଛି । ଭାରତୀୟ ପାର୍ଲିଆମେଣ୍ଟରେ ସବୁଦିନ ପାଇଁ ନବୀନଙ୍କ ନାଁରେ ଏହି ଗୌରବମୟ ଅଧ୍ୟାୟ ଲିପିବଦ୍ଧ ହେବା ଦଳୀୟ ମହଲକୁ ଅଧିକ ଉତ୍ସାହିତ କରିଛି ।