ଭୁୁବନେଶ୍ୱର: ଦୁଇମାସ ତଳେ ଚଣ୍ଡିଖୋଲ ଆସିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ନବୀନ ପଟ୍ଟନାୟକଙ୍କୁ ଓଡ଼ିଶାର ‘ଲୋକପ୍ରିୟ’ ମୁଖ୍ୟମନ୍ତ୍ରୀ କହି ଖୁବ୍ ଜୋରରେ ପ୍ରଶଂସା କରିଥିଲେ । ପରବର୍ତ୍ତୀ ସମୟରେ ବିଜେଡି ସହ ମେଣ୍ଟ କରି ନିର୍ବାଚନ ଲଢ଼ିବାକୁ ବଡ଼ କସରତ୍ ହୋଇଥିଲା । ମାତ୍ର ତାହା ଫେଲ୍ ହେଲା ପରେ ଏବେ ନିର୍ବାଚନ ରଣାଙ୍ଗନରେ ବିଜେଡି-ବିଜେପି ମୁହାଁମୁହିଁ ହୋଇଛନ୍ତି । ଓଡ଼ିଶାକୁ ଦଳୀୟ ପ୍ରାର୍ଥୀଙ୍କ ପାଇଁ ଭୋଟ୍ ମାଗିବାକୁ ଆସିଥିବା ଖୋଦ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଖାଲି ଗାଳି କରିନାହାନ୍ତି, ବରଂ ଜଣେ ‘ଲୋକପ୍ରିୟ’ ମୁଖ୍ୟମନ୍ତ୍ରୀଙ୍କୁ ଅତି ତଳସ୍ତରରେ ରଖିବାକୁ ଚାହିଁଛନ୍ତି । ଆଜି ଫୁଲବାଣୀ, ବଲାଙ୍ଗୀର ଏବଂ ବରଗଡ଼ ସଭାରେ ପ୍ରଧାନମନ୍ତ୍ରୀ ମୋଦୀ ସିଧାସଳଖ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ନିଶାନା କରିଥିଲେ । ତାଙ୍କୁ ଭୀଷଣ ଭାବେ କଟାକ୍ଷ କରିଥିଲେ । ଏପରିକି, ନବୀନଙ୍କୁ ବାଜା ବଜାଇ ବିଦା କରନ୍ତୁ ବୋଲି ତାତ୍ସଲ୍ୟଭରା ସ୍ୱରରେ ଜନସଭାକୁ ସମ୍ବୋଧିତ କରିଥିଲେ ଶ୍ରୀ ମୋଦୀ ।
ଗତକାଲି ଭୁବନେଶ୍ୱରରେ ରୋଡ୍ ସୋ’ ପରେ ପ୍ରବଳ ଉତ୍ସାହିତ ହୋଇଥିବା ପ୍ରଧାନମନ୍ତ୍ରୀ, ଆଜି ପ୍ରଥମେ ଫୁଲବାଣୀରେ ତାଙ୍କ ଦଳ ବିଜେପି ଦ୍ୱାରା ଆୟୋଜିତ ବିଜୟ ସଂକଳ୍ପ ସମାବେଶରେ ଯୋଗଦେଇଥିଲେ । କଂଗ୍ରେସ ଉପରେ ହମଲାରୁ ମୋଦୀ ତାଙ୍କ ଭାଷଣ ଆରମ୍ଭ କରିଥିଲେ ମଧ୍ୟ ତା’ପରେ ଆସିଥିଲେ ବିଜେଡି ସରକାରଙ୍କ ଆଡକୁ । ମହାପ୍ରଭୁଙ୍କ ରତ୍ନଭଣ୍ଡାର ଚାବି ହଜିବା ତଥା ଡୁପ୍ଲିକେଟ୍ ଚାବି ରହିବା ଏବଂ ଆୟୁଷ୍ମାନ ଯୋଜନାକୁ ଓଡ଼ିଶାରେ ଲାଗୁ ନ କରିବା ପ୍ରସଙ୍ଗ ଧରି ରାଜ୍ୟ ସରକାରଙ୍କ ଉପରେ ପ୍ରବଳ ବର୍ଷିଥିଲେ ।
ପରେ ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସିଧାସଳଖ ନିଶାନା କରିଥିଲେ । ନବୀନଙ୍କୁ ଚାଲେଂଜ ଦେଇ କହିଥିଲେ ଯେ ସେ ଓଡ଼ିଶାର ସବୁ ଜିଲ୍ଲା ନାଁ ଓ ଜିଲ୍ଲା କ୍ୟାପିଟାଲ୍(!) ନାଁ କହିପାରିବେ ନାହିଁ । ଯେଉଁ ମୁଖ୍ୟମନ୍ତ୍ରୀ ନିଜ ଜିଲ୍ଲା ନାଁ ଜାଣିନାହାନ୍ତି ସେଭଳି ମୁଖ୍ୟମନ୍ତ୍ରୀ ଆପଣଙ୍କ ଦୁଃଖ ବୁଝିପାରିବେନି । ତେଣୁ ବିଜେପିକୁ ୫ ବର୍ଷ ସୁଯୋଗ ଦେବାକୁ କହି ପ୍ରଧାନମନ୍ତ୍ରୀ ଭୋଟ ମାଗିଥିଲେ ।
ବଲାଙ୍ଗୀର ସଭାରେ ମୋଦୀଙ୍କ ଭାଷଣ ବିଜେଡି ଓ ମୁଖ୍ୟମନ୍ତ୍ରୀଙ୍କ ବିରୋଧରେ ଆହୁରି ଶାଣିତ ହୋଇଥିଲା । ଭାଷଣ ଆରମ୍ଭରୁ ସେ ରାଜ୍ୟରେ ବିଜେଡି ସରକାର ପତନର କାଉଣ୍ଟ ଡାଉନ୍ ଆରମ୍ଭ ହୋଇଯାଇଥିବା କହି ଏଥର ଓଡ଼ିଶାରେ ଡବଲ ଇଞ୍ଜିନ୍ ସରକାର ନିଶ୍ଚିତ ବୋଲି କହିଥିଲେ । ପ୍ରଧାନମନ୍ତ୍ରୀ କହିଥିଲେ, ବିଜେଡି ସରକାର ଗରିବୀ ଦୂର ପାଇଁ କିଛି କରିନାହିଁ । ରାଜ୍ୟରେ ପ୍ରାକୃତିକ ସମ୍ପଦ ଭରପୂର ଥିଲେ ମଧ୍ୟ ରାଜ୍ୟବାସୀ କିନ୍ତୁ ଗରୀବ ହୋଇ ରହିଛନ୍ତି ।
ଅତି କଠୋର ଭାଷାରେ ମୋଦୀ କହିଥିଲେ, ଆପଣଙ୍କ ମୁଖ୍ୟମନ୍ତ୍ରୀ ଏଠାରେ ନିର୍ବାଚନ ଲଢ଼ିବାକୁ ଆସିଛନ୍ତି । ତାଙ୍କୁ ପୂରା ବାଜାବାଣ ବଜାଇ ଏଠାରୁ ବିଦା କରିଦିଅନ୍ତୁ । ନବୀନ ବାବୁ ଯଦି ଏଠାକୁ ପ୍ରଚାରରେ ଆସନ୍ତି, ତାଙ୍କୁ ବିନା କାଗଜରେ କଣ୍ଟାବାଂଜିର ୧୦ଟି ନାଁ ପଚାରନ୍ତୁ । ନବୀନ ୧୦ଟି ଗାଁ ନାଁ ବି କହିପାରିବେନି । ସେ ଆପଣଙ୍କ ସହ ନାହାନ୍ତି, ସେ ଆପଣଙ୍କ ଦୁଃଖ ବୁଝିପାରିବେନି । ସେଥିପାଇଁ ଧନୀ ଓଡ଼ିଶାର ଲୋକମାନେ ଗରିବ ।
ବରଗଡ଼ ସଭାରେ ମୋଦୀଙ୍କର ଭାଷଣ ଆହୁରି ଟାଣ ହୋଇଥିଲା । ଏଠାରେ ମୁଖ୍ୟମନ୍ତ୍ରୀଙ୍କ ସହ କାର୍ତ୍ତିକ ପାଣ୍ଡିଆନଙ୍କ ଆଡକୁ ଲକ୍ଷ୍ୟ କରି ନିଶାନା କରିଥିଲେ । କହିଥିଲେ, ଓଡ଼ିଶା ଶାସନର ପରିଚାଳନା କାର୍ଯ୍ୟ ଆଉଟସୋର୍ସ ହୋଇଯାଇଛି । ମୁଖ୍ୟମନ୍ତ୍ରୀଙ୍କ ଉପରେ ଜଣେ ସୁପର ସିଏମ୍ ହୋଇଗଲେଣି । ଯିଏ ଓଡ଼ିଶାକୁ ଜାଣିନ୍ତିନି, ତାଙ୍କ ହାତକୁ ଓଡ଼ିଶା ଯିବା ଉଚିତ କି ବୋଲି ପ୍ରଶ୍ନ କରିଥିଲେ ।
ତିନୋଟି ଯାକ ସଭାରେ ପ୍ରଧାନମନ୍ତ୍ରୀ କଂଗ୍ରେସକୁ ମଧ୍ୟ କଠୋର ସମାଲୋଚନା କରିଥିଲେ । ସେମାନଙ୍କ ଶାସନକାଳରେ ଦେଶକୁ ବରବାଦ କରିଦେଇଥିଲେ ବୋଲି କହିଥିଲେ । ସେହିଭଳି ୨୫ ବର୍ଷର ବିଜେଡି ସରକାରକୁ ଅପାରଗ ବୋଲି ବାର୍ତ୍ତା ଦେବାକୁ ଚାହିଁଥିଲେ । ଭ୍ରଷ୍ଟାଚାରୀ ବିଜେଡି ସରକାର ଥିବା ଯାଏଁ ଲୋକଙ୍କୁ ଲାଭ ମିଳିବନି ବୋଲି କହିଥିଲେ । ଓଡ଼ିଆ ଅସ୍ମିତାକୁ ପ୍ରଧାନମନ୍ତ୍ରୀ ତାଙ୍କର ସବୁ ଭାଷଣରେ ଉଲ୍ଲେଖ କରିଥିଲେ । କହିଥିଲେ, ଓଡ଼ିଆ ଅସ୍ମିତା ଆଜି ସଙ୍କଟରେ, ଆମେ କେବେ ଏହାକୁ ବନ୍ଧା ପକାଇବୁନି । ଓଡ଼ିଶାକୁ ଏହି ସଙ୍କଟରୁ ଉଦ୍ଧାର କରିବାକୁ ବିଜେପି ସଂକଳ୍ପବଦ୍ଧ ।
ସେହିଭଳି ମୋଦୀ ତାଙ୍କ ପ୍ରଚାର ସଭାରେ ଆସନ୍ତା ଜୁନ୍ ୪ ଏବଂ ୧୦ ତାରିଖକୁ ବାରମ୍ବାର ମନେ ପକାଇଥିଲେ । କହିଥିଲେ, ଜୁନ୍ ୪ ବିଜେଡି ସରକାରର ଏକ୍ସପାଏରୀ ଡେ୍ । ଜୁନ୍ ୧୦ ରେ ବିଜେପି ମୁଖ୍ୟମନ୍ତ୍ରୀ ଶପଥ ନେବେ । ଆପଣମାନଙ୍କୁ ସେଥିପାଇଁ ଭୁବନେଶ୍ୱର ନିମନ୍ତ୍ରଣ ରହିଲା ବୋଲି ତାଙ୍କ ଭାଷଣରେ କହିଥିଲେ । ଖାଲି ସେତିକି ନୁହେଁ, ଓଡ଼ିଶା ମାଟିରେ ଜନ୍ମିତ ବ୍ୟକ୍ତି ହିଁ ମୁଖ୍ୟମନ୍ତ୍ରୀ ହେବେ, ଏହା ମୋଦୀ ଗ୍ୟାରେଣ୍ଟି ବୋଲି ପ୍ରଧାନମନ୍ତ୍ରୀ କହିଥିଲେ ।
