ଭୁବନେଶ୍ୱର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଦିନ ପ୍ରାୟ ୧୦ଟା ୫୦ ରେ ଭୁବନେଶ୍ୱରରେ ପହଞ୍ଚିଥିଲେ । ବିମାନବନ୍ଦରରୁ ସେ ସିଧା ଯାଇଥିଲେ ଗାଡ଼କଣ ଗାଁ । ସେଠି ଆବାସ ଯୋଜନାର ହିତାଧିକାରୀମାନଙ୍କୁ ଭେଟି ସେମାନଙ୍କ ସହିତ କିଛି ସମୟ ବିତାଇଥିଲେ ।
ଗାଁର ଶବରସାହିରେ ଆବାସ ଯୋଜନା(ସହରୀ) ହିତାଧିକାରୀମାନଙ୍କୁ ବାସଗୃହର ଚାବି ହସ୍ତାନ୍ତର କରିଥିଲେ ପ୍ରଧାନମନ୍ତ୍ରୀ । ହିତାଧିକାରୀ ଅନ୍ତର୍ଯ୍ୟାମୀ ନାୟକଙ୍କୁ ତାଙ୍କର ନୂତନ ବାସଗୃହ ପ୍ରବେଶ କରାଇଥିଲେ । ଅନ୍ତର୍ଯ୍ୟାମୀଙ୍କ ପରିବାର ମେଳରେ ପ୍ରଧାନମନ୍ତ୍ରୀ ପୂଜାର୍ଚ୍ଚନା କରିବା ପରେ ତାଙ୍କ ପତ୍ନୀଙ୍କ ଦ୍ୱାରା ପ୍ରସ୍ତୁତ ଖିରି ଖାଇଥିଲେ । ପ୍ରଧାନମନ୍ତ୍ରୀଙ୍କ ସହିତ ମୁଖ୍ୟମନ୍ତ୍ରୀ ମୋହନ ମାଝୀ, ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର ଉପସ୍ଥିତ ଥିଲେ ।
ପ୍ରଧାନମନ୍ତ୍ରୀଙ୍କ ଜନ୍ମଦିନ ଥିବାରୁ ତାଙ୍କୁ ଶୁଭେଚ୍ଛା ଜଣାଇବା ପାଇଁ ଗାଡ଼କଣବାସୀଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଥିଲା । ସେଠାରେ ଉପସ୍ଥିତ ମହିଳାମାନେ ପ୍ରଧାନମନ୍ତ୍ରୀଙ୍କୁ ଫୁଲ ଓ ଉତ୍ତରୀୟ ଦେଇ ଶୁଭେଚ୍ଛା ଜଣାଇଥିଲେ । ଲୋକମାନଙ୍କର ସ୍ନେହ ଓ ଶ୍ରଦ୍ଧାରେ ପ୍ରଧାନମନ୍ତ୍ରୀ ଅଭିଭୂତ ହୋଇଥିଲେ ।
ପରେ ଜନତା ମଇଦାନରେ ଆୟାଜିତ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ତାଙ୍କ ଭାଷଣରେ ଗାଡ଼କଣରେ ଖାଇଥିବା ଖିରି କଥା ଉଲ୍ଲେଖ କରି ତାଙ୍କ ମା’ଙ୍କୁ ମନେ ପକାଇଥିଲେ । ପ୍ରଧାନମନ୍ତ୍ରୀ କହିଥିଲେ, ମୋ ମା’ ବଞ୍ଚିଥିବା ବେଳେ ଅନେକ ସମୟରେ ମା’ଙ୍କଠାରୁ ଖିରି ଖାଉଥିଲି । ଆଜି ମା’ ନାହାନ୍ତି, କିନ୍ତୁ ଜଣେ ଆଦିବାସୀ ଭଉଣୀ ଶ୍ରଦ୍ଧାର ସହ ଖୁରି ଖୁଆଇ ମୋତେ ଜନ୍ମଦିନର ଆଶୀର୍ବାଦ ଦେଇଥିଲେ । ପାଇଥିବା ଏହି ସ୍ନେହ ଶ୍ରଦ୍ଧା ପାଇଁ ଆଜି ମା’ ପୁଣି ମନେ ପଡୁଛନ୍ତି ଏବଂ ଏହା ମୋର ସାରା ଜୀବନ ପାଇଁ ମନେ ରହିବ ।
