ଭୁବନେଶ୍ୱର: ୨୦୧୨ ମେ ୨୯ ସଂଧ୍ୟାରେ ସହିଦନଗର ପ୍ଲଟ୍ ନଂ ୧୧୧ ପ୍ୟାରୀ ନିବାସରେ ଛାତି ଫୁଲେଇ ବୁଲୁଥିଲେ ତତ୍କାଳୀନ କଟକ ଚୌଦ୍ୱାର ବିଧାୟକ ପ୍ରଭାତ ବିଶ୍ୱାଳ । କିଏ କିଛି ପଚାରିଲା ବେଳେ ସାର୍ଟ କଲର୍ କୁ ଟେକି ପକଉଥିଲେ । ଉପରେ ପଡ଼ି ଟିଭି କ୍ୟାମେରା ଆଗକୁ ଆସି ବାଇଟ୍ ଦେଉଥିଲେ । ପ୍ୟାରୀମୋହନ ମହାପାତ୍ରଙ୍କୁ ସ୍ୱର୍ଗରେ ନେଇ ଥୋଉଥିଲେ । ଗେଟ୍ ଭିତରେ ପଶୁଥିବା ନେତାଙ୍କୁ ଖୁସିରେ କୁଣ୍ଢେଇ ପକଉଥିଲେ । ମୋଟାମୋଟି ସେଦିନ ମେଳିର ସେ ଥିଲେ ଅନ୍ୟତମ ଆୟୋଜକ । ତଥାକଥିତ ନବୀନ ବିରୋଧୀ ମେଳିରେ ତାଙ୍କର ମୁଖ୍ୟ ଭୂମିକା ଥିଲା ।
ଆଜି କଟକ ପୋତାପୋଖରୀଠାରେ ବିଜେଡି ପ୍ରତିଷ୍ଠା ଦିବସ ଅବସରରେ ପ୍ରଭାତ ବିଶ୍ୱାଳ ସେହି ସଂଧ୍ୟାର କାହାଣୀ ଲୋକଙ୍କୁ ମନେ ପକାଇ ଦେଇଛନ୍ତି । ପାଣ୍ଡିଆନ୍ ଦମ୍ପତ୍ତିଙ୍କ ସମର୍ଥନରେ ଅତ୍ୟଧିକ ଭାବପ୍ରବଣବଶତଃ ମେ ୨୯ ଚକ୍ରାନ୍ତ କଥା ପାଟିରୁ ଖସିଯାଇଛି । ସେ କହିଥିଲେ, ପ୍ୟାରୀମୋହନଙ୍କ ପରେ ପାଣ୍ଡିଆନଙ୍କର ଦଳ ପ୍ରତି ଯଥେଷ୍ଟ ଅବଦାନ ଅଛି । ପାଣ୍ଡିଆନଙ୍କ ପାଇଁ ୨୦୧୯ରେ ବିଜେଡି ସରକାର ଗଢ଼ିଥିଲା । ଲୋକଙ୍କ ସେବା ପାଇଁ ସେ ଆଇଏଏସ୍ ଭଳି ଚାକିରି ଛାଡ଼ିଛନ୍ତି । ତାଙ୍କ ପ୍ରତି ଅବିଚାର ହେଲେ ମୁଁ ବିରୋଧ କରିବି । ସୁଜାତା କାର୍ତ୍ତିକେୟନଙ୍କ ଯଥେଷ୍ଟ ଅବଦାନ ଅଛି, ତାଙ୍କୁ ରାଜ୍ୟସଭା ପଠାଯାଉ । ଏକଥା କହିଲା ବେଳେ ଭକ୍ତିରେ ଗଦ ଗଦ ହୋଇଯାଇଥିଲେ ବିଶ୍ୱାଳ ବାବୁ । ଅତ୍ୟଧିକ ଭକ୍ତି ପ୍ରକଟରୁ ହିତାହିତ ଜ୍ଞାନ ଭୁଲି ଯାହା ମନକୁ ଆସିଲା ଗପି ଚାଲିଲେ ।
ଦେବୀ ମିଶ୍ର, ବବି ଦାସ, ଅତନୁ ସବ୍ୟସାଚୀ ନାୟକ, ପ୍ରତାପ ଜେନା, ସଞ୍ଜୟ ଦାସବର୍ମାଙ୍କ ଭଳି ପରାଜିତ ନେତାଙ୍କ ଉଦ୍ଦେଶ୍ୟରେ ସେମାନଙ୍କୁ ଅଯଥା ଦଳୀୟ କାର୍ଯ୍ୟକ୍ରମରେ ହସ୍ତକ୍ଷେପ ନ କରିବାକୁ ତାଗିଦ୍ କରିଥିଲେ । ‘ଦଳ ବିଷୟରେ ମୁଣ୍ଡ ପୂରାନ୍ତୁ ନାହିଁ, ମେ ୨୯ର ଚକ୍ରାନ୍ତ ହୁ ହୁ ହୋଇ ଜଳୁଛି’ କହି ଗଳା ଫଟାଇ କହିଥିଲେ । ତାଙ୍କ କହିବାର ମର୍ମ ଥିଲା ମେ ୨୯ ତଥାକଥିତ ମିଡନାଇଟ୍ ଅପରେସନରେ ଏମାନେ ପ୍ୟାରୀବାବୁଙ୍କ ସାରଥୀ ହୋଇ ନବୀନଙ୍କୁ ଗାଦିଚ୍ୟୁତ କରିବାକୁ ଉଦ୍ୟମ କରିଥିଲେ । ତେଣୁ ଏମାନଙ୍କୁ ସାବଧାନ!
ଏହି ପ୍ରସଙ୍ଗ ଉଠାଇ ପ୍ରଭାତ ନିଜ ଗୋଡ଼ରେ ନିଜେ କୁରାଢ଼ୀ ମାରିଛନ୍ତି । ମେ ୨୯ ସଂଧ୍ୟାରେ ତାଙ୍କର ଭୂମିକା ଲୋକଙ୍କୁ ମନେ ପକାଇ ନିଜର ପାପ ପେଡ଼ି ଖୋଲିଛନ୍ତି । ସେଦିନ ଟିଭି ଚାନେଲଗୁଡ଼ିକର ସିଧା ପ୍ରସାରଣରେ ପ୍ରଭାତ ବିଶ୍ୱାଳଙ୍କ ସାକ୍ଷାତକାର ଲୋକଙ୍କ ସ୍ମୃତିକୁ ସତେଜ କରିଛି । ନବୀନ ପଟ୍ଟନାୟକଙ୍କ ବିରୋଧରେ ତଥାକଥିତ ଚକ୍ରାନ୍ତରେ ତାଙ୍କର ଯୋଗାଡ଼ିଆ ଭୂମିକା ସାରା ଓଡ଼ିଶାବାସୀ ଦେଖିଛନ୍ତି । ଏବେ ସୁଜାତା କାର୍ତ୍ତିକେୟନଙ୍କୁ ରାଜ୍ୟସଭା ପଠାଇ ବିଜେଡିର ଉତ୍ତରାଧିକାରୀ କରିବା ସପକ୍ଷରେ ତାଙ୍କ ଯୁକ୍ତି ପଛରେ ତାଙ୍କର ଭବିଷ୍ୟତ ସ୍ୱାର୍ଥ ଯେ ନିହିତ ତାହା କାହାକୁ ଅଛପା ନାହିଁ । ଏହା ପ୍ରଭାତ ବିଶ୍ୱାଳଙ୍କ ଅଭ୍ୟାସଗତ ତେଲମରା ରାଜନୀତି ରାଜନୀତିର ଅଂଶବିଶେଷ ବୋଲି ଚର୍ଚ୍ଚା ହେଉଛି ।
ରୋଚକ କଥା ହେଉଛି, ପ୍ରଭାତ ବିଶ୍ୱାଳ ଯେଉଁମାନଙ୍କୁ ପାଣ୍ଡିଆନ୍ ବିରୋଧୀ ଦୃଷ୍ଟିରେ ଗାଳି କରିଛନ୍ତି ପ୍ରକୃତରେ ସେମାନଙ୍କ ନାଁ ପାଣ୍ଡିଆନ୍ ସପକ୍ଷବାଦୀ ତାଲିକାରେ ଗଡୁଛି । ଏହି ଦୃଷ୍ଟିରୁ ପ୍ରଭାତ ବିଶ୍ୱାଳଙ୍କର ଭାଷଣର ଅର୍ଥ କେହି ବୁଝିପାରୁନାହାନ୍ତି ।
