ଭୁବନେଶ୍ୱର: ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କ ବିଜେପି ଯୋଗଦାନ ରାସ୍ତାରେ କେଁ ପଶିଛି । ଦିଲ୍ଲୀ ହାଇକମାଣ୍ଡଙ୍କ ପାଖରେ ତାଙ୍କର ଆବେଦନ ଅଟକି ଯାଇଥିବା ଏକ ସୂତ୍ରରୁ ଜଣାପଡ଼ିଛି । ତେବେ ରାସ୍ତା କ୍ଲିୟର୍ କରିବାକୁ ଭରପୂର ଉଦ୍ୟମ ଚଳାଇଛନ୍ତି ବିଜେଡିରୁ ଏହି ବହିଷ୍କୃତ ବିଧାୟକ । କ୍ଲିୟରାନ୍ସ ମିଳିଗଲେ ଆସନ୍ତା ୧୯ ତାରିଖ ଭିତରେ ମିଶ୍ରଣ ପର୍ବ ହେବାର ସମ୍ଭାବନା ଅଛି ।
ରାଜ୍ୟ ନେତୃତ୍ୱର ସମ୍ମତିରେ ପ୍ରଦୀପ ପାଣିଗ୍ରାହୀଙ୍କ ବିଜେପି ଯୋଗଦାନ ତାରିଖ ଦୀପାବଳି ପୂର୍ବରୁ ସ୍ଥିର ହୋଇଥିବା ପ୍ରଦୀପଙ୍କ ସମର୍ଥକ ଗୋଷ୍ଠୀରୁ ଶୁଣିବାକୁ ମିଳିଥିଲା । ନିର୍ଦ୍ଦିଷ୍ଟ ଭାବେ ନଭେମ୍ବର ୯ ତାରିଖରେ ସେ ବିଜେପିରେ ଯୋଗଦେବେ ବୋଲି ଶୁଣାଗଲା । ତା’ ପୂର୍ବରୁ ବିଜେପି ରାଜ୍ୟ ସଭାପତି ମନମୋହନ ସାମଲ ଓ ଗଞ୍ଜାମ ନେତା ବିଭୂତି ଜେନା ଦିଲ୍ଲୀରେ ଥିବା ବେଳେ ଶ୍ରୀ ପାଣିଗ୍ରାହୀ ମଧ୍ୟ ପହଞ୍ଚିଥିଲେ । ମାତ୍ର କିଛି ହେଲା ନାହିଁ । ୧୩ ତାରିଖ(ଆଜି)କୁ ମିଶ୍ରଣ ପର୍ବ ଘୁଞ୍ଚିଲା ବୋଲି ପୁଣି ଶୁଣାଗଲା । ମାତ୍ର ତାହା ହୋଇନାହିଁ ।
ବିଶ୍ୱସ୍ତ ସୂତ୍ରର ଖବର ଅନୁଯାୟୀ, ପ୍ରଦୀପ ପାଣିଗ୍ରାହୀଙ୍କୁ ଦଳରେ ମିଶାଇବା ପ୍ରସ୍ତାବକୁ ନେଇ ବିଜେପିର ଦୁଇଗୋଷ୍ଠୀ ମୁହାଁମୁହିଁ ହୋଇଛନ୍ତି । ପ୍ରଦୀପଙ୍କୁ ଦଳକୁ ଆଣି ବିଜେଡି ବିରୋଧରେ ଅସ୍ତ୍ର କରିବାକୁ ଦଳର ଗୋଟେ ଗୋଷ୍ଠୀ ଚାହୁଁଥିବା ବେଳେ ଅନ୍ୟ ଗୋଷ୍ଠୀ ତାଙ୍କୁ ବିରୋଧ କରୁଛନ୍ତି । ତାଙ୍କ ଭଳି ଜଣେ କଳୁଷିତ ନେତାଙ୍କୁ ଦଳକୁ ଆଣିବା ଓଲଟି ମହଙ୍ଗା ପଡ଼ିବ ବୋଲି ସେମାନେ ଯୁକ୍ତି କରୁଛନ୍ତି । ଏହାର ସମାଧାନ ପାଇଁ କିଛି ବରିଷ୍ଠ ବିଜେପି ନେତା ଗୋଟିଚାଳନା କରୁଥିବା ବେଳେ ହାଇକମାଣ୍ଡଙ୍କ କାନକୁ କଥା ଯାଇଛି ।
ଏପଟେ ପ୍ରଦୀପ ପାଣିଗ୍ରାହୀଙ୍କ ବିଜେପି ଯୋଗଦାନକୁ ନେଇ କଳ୍ପନାଜଳ୍ପନା ଲାଗି ରହିଥିଲା ବେଳେ ଦୁଇଦିନ ତଳେ ଜିଲ୍ଲା ବିଜେଡି ପକ୍ଷରୁ ବ୍ରହ୍ମପୁରରେ ଏକ ପ୍ରେସମିଟ୍ କରାଯାଇ ତାଙ୍କ ଅତୀତର କଳା କାରନାମାକୁ ମନେ ପକେଇ ଦିଆଯାଇଥିଲା । ଏହିଭଳି ଜଣେ କଳଙ୍କିତ ନେତାଙ୍କୁ ବିଜେପି ଆପଣେଇବାକୁ ଆଗଭର ହେଉଥିବାରୁ ଭୀଷଣ ସମାଲୋଚନା କରାଯାଇଥିଲା । ତେବେ ଆଜି ଏହାର ପାଲଟା ଜବାବ ଦେଇଛନ୍ତି ପ୍ରଦୀପ ପାଣିଗ୍ରାହୀ । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଉପରେ ବର୍ଷି ରାଗ ସୁଜାଇଛନ୍ତି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଦୁର୍ନୀତିର ଏନ୍ତୁଡ଼ିଶାଳ ବୋଲି ସେ ଅଭିଯୋଗ କରିବା ସହ ବିଜେଡି ନେତା, ମନ୍ତ୍ରୀଙ୍କ ବିରୋଧରେ ଦୁର୍ନୀତି ଅଭିଯୋଗ ଉପରେ କାହିଁକି କାର୍ଯ୍ୟାନୁଷ୍ଠାନ ହେଉନି ବୋଲି ପଚାରିଛନ୍ତି ।
ତେବେ ଦୁର୍ନୀତି ଓ ଠକେଇ ଅଭିଯୋଗରେ ଜେଲ୍ ଯାଇଥିବା ଜଣେ ଅଭିଯୁକ୍ତଙ୍କ ମୁହଁରୁୁ ଏହି କଥା ଶୋଭା ପାଉନି ବୋଲି ପୂର୍ବତନ ବିଧାୟକ ତଥା ଗଞ୍ଜାମ ଜିଲ୍ଲା ବିଜେଡି ସଭାପତି ଡକ୍ଟର ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ କହିଛନ୍ତି । ତାଙ୍କର ଜନବିରୋଧୀ କାର୍ଯ୍ୟ ପାଇଁ ସେ ବିଜେଡିରୁ ବହିଷ୍କୃତ ହୋଇଛନ୍ତି । ବିଜେଡି ଏହା ମନେ ପକାଇ ଦେଇଥିବାରୁ ତାଙ୍କର ଜ୍ୱର ବିକଳରେ ତାଟିଆ କାମୁଡ଼ିବା ଅବସ୍ଥା ହୋଇଛି ବୋଲି ସେ କହିଛନ୍ତି ।
ସୂଚନାଯୋଗ୍ୟ, ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କୁ ୨୦୨୦ ଡିସେମ୍ବର ୩ ତାରିଖରେ ବାନ୍ଧିଥିଲା କ୍ରାଇମବ୍ରାଞ୍ଚ । ତାଙ୍କ ବିରୋଧରେ ଅନେକ ସଙ୍ଗୀନ ଅଭିଯୋଗ ଥିଲା ଯାହା ଏବେ କୋର୍ଟରେ ବିଚାରାଧୀନ ଅଛି ।
– ମହାମାରୀ କରୋନାରେ ଲୋକ ଛଟପଟ ହେଉଥିଲା ବେଳେ ଏହି ଜନପ୍ରତିନିଧି ସପରିବାର ନିଜର ଭାବୀ ଜ୍ୱାଇଁଙ୍କ ପରିବାର ସହ ଚାର୍ଟର ଫ୍ଲାଇଟ୍ ରେ ଉଡୁଥିଲେ । ଦିଲ୍ଲୀ, ମୁମ୍ବାଇର ଫାଇଭ୍ ଷ୍ଟାର୍ ହୋଟେଲରେ ଅୟସ କରୁଥିଲେ ।
– ବିଧାୟକଙ୍କ ଭାବୀ ଜ୍ୱାଇଁ ଆକାଶ ପାଠକ ନିଜକୁ ଟାଟା ମୋଟର୍ସର ଏମଡି ଭାବେ ଜାଲ୍ ପରିଚୟ ଦେଇ ଲୋକଙ୍କୁ ଚୂନ ମାରୁଥିଲେ । ତାଙ୍କର ସେହି କାରବାରରେ ଭାବୀ ଶ୍ୱଶୁର ବିଧାୟକ ପ୍ରଦୀପ ପାଣିଗ୍ରାହୀଙ୍କର ସଂପୃକ୍ତି ଥିଲା । କାହାକୁ ଟାଟା ମୋଟର୍ସରେ ଚାକିରି କରାଇଦେବାର ପ୍ରତିଶ୍ରୁତି ତ ଆଉ କାହାରିକୁ ଜାଲ୍ ନିଯୁକ୍ତିପତ୍ର ଦେଇ ଗୋପାଳପୁର ନିର୍ବାଚନମଣ୍ଡଳୀର ଏକାଧିକ ଲୋକଙ୍କଠାରୁ ମୋଟା ଅଙ୍କର ଟଙ୍କା ଆଦାୟ କରାଯାଇଥିଲା ।
– କରୋନା ଲକଡାଉନ୍ ବେଳେ ଲୋକେ ଜୀବିକା ହରାଇ ହାହାକାରରେ ଥିବା ବେଳେ ବିଧାୟକ ପାଣିଗ୍ରାହୀଙ୍କ ବ୍ୟାଙ୍କ ଆକାଉଣ୍ଟରେ ଟଙ୍କା ବର୍ଷା ହୋଇଥିଲା । ମାତ୍ର ୪ ମାସରେ ଆକାଉଣ୍ଟକୁ ଆସିଥିଲା ୨ କୋଟି ୪୮ ଲକ୍ଷ ଟଙ୍କା । ଗଞ୍ଜାମର ଜଣାଶୁଣା ମଦ ମାଫିଆ ସୂର୍ଯ୍ୟ ସାହୁ, ମଦ ବ୍ୟବସାୟୀ ରବୀନ୍ଦ୍ର ସାହୁ, ବାଲି ମାଫିଆ ବୁଲୁ ଗୌ ଡ଼ ପ୍ରଭୃତିଙ୍କ ସୌଜନ୍ୟରୁ ଏହି ଟଙ୍କା ଆସିଥିବା ଜଣାପଡ଼ିଥିଲା । ଭାବୀ ଜ୍ୱାଇଁ ଆକାଶ ପାଠକ ଓ ଭାବୀ ଶ୍ୱଶୁରଙ୍କ ମଧ୍ୟରେ ବିପୁଳ ଟଙ୍କାର ବ୍ୟାଙ୍କ ଟ୍ରାଞ୍ଜାକସନ୍ ଥିଲା । ବିଧାୟକ ଓ ତାଙ୍କ ପତ୍ନୀଙ୍କ ନାଁରେ ଭୁବନେଶ୍ୱର ଓ ବ୍ରହ୍ମପୁରର ବିଭିନ୍ନ ବ୍ୟାଙ୍କରେ ୧୯ ଟି ଆକାଉଣ୍ଟ ଠାବ କରିଥିଲା କ୍ରାଇମବ୍ରାଞ୍ଚ ।
ଏହି ସବୁ ଅଭିଯୋଗକୁ ନେଇ ବିଧାୟକ ପ୍ରଦୀପ ପାଣିଗ୍ରାହୀଙ୍କ ବିରୋଧରେ କ୍ରାଇମବ୍ରାଞ୍ଚ ପୁଲିସ ଆଇପିସି ଦଫା ୪୧୯, ୪୨୦,୪୬୭,୪୬୮,୪୬୯,୪୭୧,୧୨୦(ବି) ଏବଂ ଆଇଟି ଆକ୍ଟ ୨୦୦୦ର ୬୬ସି/୬୬ ଡି ଧାରାରେ ମାମଲା ରୁଜୁ କରି ତାଙ୍କୁ କୋର୍ଟ ଚାଲାଣ କରିଥିଲା । ଝାରପଡ଼ା ଜେଲ୍ ରେ ୭ ମାସ ରହିଲା ପରେ ୨୦୨୧ ଜୁନ ୧୩ ତାରିଖରେ ସେ ଜାମିନ୍ ରେ ମୁକୁଳିଥିଲେ ।
