ଭୁବନେଶ୍ୱର: ବାହାନଗା ଟ୍ରେନ ଦୁର୍ଘଟଣାର ସିବିଆଇ ତଦନ୍ତ ହେବ । କେଉଁ ପରିସ୍ଥିତିରେ ଏହି ଦୁର୍ଘଟଣା ଘଟିଲା ଏବଂ ଏଥିପାଇଁ ଦାୟୀ କିଏ ସିବିଆଇ ଖୋଜି ବାହାର କରିବ । ସିବିଆଇ ତଦନ୍ତ ପାଇଁ ରେଲୱେ ବୋର୍ଡର ସୁପାରିଶ କରିଥିବା ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଆଜି ସୂଚନା ଦେଇଛନ୍ତି ।
ସିବିଆଇ ତଦନ୍ତ ସୁପାରିଶ ସମ୍ପର୍କରେ ସୂଚନା ଦେବାର କିଛି ଘଣ୍ଟା ପୂର୍ବରୁ ରେଳମନ୍ତ୍ରୀ ଶ୍ରୀ ବୈଷ୍ଣବ ଏକ ବୟାନରେ କହିଥିଲେ ଯେ ରେଳ ଦୁର୍ଘଟଣାର ମୂଳ କାରଣ ସମ୍ପର୍କରେ ସେ ନିଶ୍ଚିତ ହୋଇଛନ୍ତି । ଏହା ମନୁଷ୍ୟକୃତ ବୋଲି ସେ ଇସାରା ଦେଇଥିଲେ ।
ଇଲେକଟ୍ରୋନିକ୍ ଇଣ୍ଟଲକିଂ ସିଷ୍ଟମରେ ସମସ୍ୟା ପାଇଁ ଏହି ଦୁର୍ଘଟଣା ଘଟିଥିବା ସେ କହିଥିଲେ । ସୂଚନାଥାଉକି, ରେଳ ଚଳାଚଳ ବେଳେ ସିଗନାଲ୍ ବ୍ୟବସ୍ଥାକୁ ସଠିକ୍ କରିବାର ଡିଭାଇସ୍ ହେଉଛି ଇଲେକଟ୍ରୋନିକ୍ ଇଣ୍ଟରଲକିଂ ସିଷ୍ଟମ୍ । ଏଥିରେ ଟାମ୍ପରିଂ ହେଲେ ସିଗନାଲ୍ ଭୁଲଭାଲ୍ ହେବ । ବାହନଗା ରେଳ ଦୁର୍ଘଟଣା ଏହି ତ୍ରୁଟି ଯୋଗୁଁ ହୋଇଛି ବୋଲି ରେଳମନ୍ତ୍ରୀ ସ୍ୱୀକାର କରିଛନ୍ତି ।
ରେଳମନ୍ତ୍ରୀ ଏହାର ବିସ୍ତୃତ ତଥ୍ୟ ଦେବାକୁ ମନା କରିଥିଲା ବେଳେ ତଦନ୍ତ ରିପୋର୍ଟକୁ ଅପେକ୍ଷା କରିବା ପାଇଁ କହିଛନ୍ତି । ତେବେ ଦୁର୍ଘଟଣାର ମୂଳ କାରଣ ଏବଂ ଏଥିପାଇଁ ଦାୟୀ ଲୋକଙ୍କୁ ଚିହ୍ନଟ କରାଯାଇଥିବା ଶ୍ରୀ ବୈଷ୍ଣବ ସୂଚନା ଦେଇଛନ୍ତି ।
ଏବେ ସିବିଆଇ ଏହି ଦିଗକୁ ତଦନ୍ତ କରିବ ଏବଂ ଦୋଷୀମାନଙ୍କୁ ଖୋଜି ବାହାର କରିବ । ଗତକାଲି ପ୍ରଧାନମନ୍ତ୍ରୀ ଦୁର୍ଘଟଣାସ୍ଥଳ ବୁଲିବା ପରେ ଦୋଷୀଙ୍କୁ ଛଡ଼ାଯିବ ନାହିଁ ବୋଲି ରୋକଠୋକ ଶୁଣାଇ ସାରିଛନ୍ତି । ଅତଏବ ବାହନଗା ରେଳ ଦୁର୍ଘଟଣା ପାଇଁ ଦୋଷୀଙ୍କୁ କଠୋର ଦଣ୍ଡ ମିଳିବ ଏହି ବିଶ୍ୱାସ ସମସ୍ତଙ୍କର ହୋଇଛି ।
ସୂଚନାଥାଉକି, ରେଳମନ୍ତ୍ରୀ ଶ୍ରୀ ବୈଷ୍ଣବ ଦୁର୍ଘଟଣାସ୍ଥଳରେ କ୍ୟାମ୍ପ ପକାଇଛନ୍ତି । ଉଦ୍ଧାର କାର୍ଯ୍ୟ ସରିବା ପରେ ମରାମତି କାର୍ଯ୍ୟର ତଦାରଖ କରୁଛନ୍ତି ।
