ଭୁୁବନେଶ୍ୱର: ବାହନଗା ରେଳ ଦୁର୍ଘଟଣା ପରିପ୍ରେକ୍ଷୀରେ ଇଲେକଟ୍ରୋନିକ୍ ଇଣ୍ଟରଲକିଂ ସିଷ୍ଟମ୍ ସମସ୍ତଙ୍କ ନଜରକୁ ଆସିଛି । ଇଣ୍ଟରଲକିଂ ସିଷ୍ଟମ୍ ରେ ପରିବର୍ତ୍ତନ ଏହି ଦୁର୍ଘଟଣାର ମୂଳ କାରଣ ବୋଲି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ କହିସାରିଛନ୍ତି । ଇଣ୍ଟରଲକିଂ ବ୍ୟବସ୍ଥା ଫେଲ୍ ମାରିବାରୁ ଏତେବଡ଼ ଭୟଙ୍କର ଦୁର୍ଘଟଣା ଘଟିଛି । ଇଲେକଟ୍ରୋନିକ୍ ଇଣ୍ଟରଲକିଂ ବ୍ୟବସ୍ଥା ନିରାପଦ ବୋଲି ଦାବି କରାଯାଉଥିବା ବେଳେ ଏହି ନିର୍ଦ୍ଦିଷ୍ଟ ଘଟଣାରେ ମନୁଷ୍ୟକୃତ ତ୍ରୁଟିକୁ ଦାୟୀ କରାଯାଉଛି ।
ଆମେ ସମସ୍ତେ ଜାଣୁଛେ ଯେ ଟ୍ରେନ୍ କେଉଁ ଟ୍ରାକ୍ ରେ ଯିବ ତାହା ନିର୍ଦ୍ଧାରଣ କରେ ଇଲେକଟ୍ରୋନିକ୍ ଇଣ୍ଟରଲକିଂ ବ୍ୟବସ୍ଥା । ରେଳକୁ ନିରାପଦରେ ଯିବାକୁ ଏହି ବ୍ୟବସ୍ଥା ଅନୁମତି ଦେଇଥାଏ । ଏହା ଅତ୍ୟନ୍ତ ଆଧୁନିକ ବ୍ୟବସ୍ଥା ଏବଂ ସଫ୍ଟୱେର ଆଧାରରେ କାର୍ଯ୍ୟ କରିଥାଏ । ମାତ୍ର ଏହାକୁ ଅପରେଟ୍ କରୁଥିବା ବ୍ୟକ୍ତି(ମନୁଷ୍ୟକୃତ) ପାଇଁ ବ୍ୟତିକ୍ରମ ସୃଷ୍ଟି ହୁଏ, ଯାହା ବାହନଗା ଘଟଣାରେ ଘଟିଥିବା କୁହାଯାଉଛି ।
ଏମିତିରେ ଇଲେକଟ୍ରୋନିକ୍ ଇଣ୍ଟରଲିକଂ ବ୍ୟବସ୍ଥା ତ୍ରୁଟିଶୂନ୍ୟ ବୋଲି ରେଳ ବିଭାଗ ଯାହା ଦାବି କରୁଛି ତାହା କିନ୍ତୁ ଆଦୌ ସତ୍ୟ ନୁହେଁ ବୋଲି ଜଣାପଡ଼ିଛି । ଏହି ବ୍ୟବସ୍ଥାରେ ଥିବା ତ୍ରୁଟି ସମ୍ପର୍କରେ ୩ ମାସ ତଳେ ରେଳବାଇ ବୋର୍ଡକୁ ଏକ ରିପୋର୍ଟ ଦିଆଯାଇଥିଲା । ଦକ୍ଷିଣ ପୂର୍ବ ରେଳୱେର ମୁଖ୍ୟ ଅପରେଟିଂ ମ୍ୟାନେଜର ହରିଶଙ୍କର ବର୍ମା ଏକ ରିପୋର୍ଟ ସହ ଏଥିରେ ଥିବା ତ୍ରୁଟି ସୁଧାରିବା ପାଇଁ ସୁପାରିଶ କରିଥିଲେ । ନଚେତ ଭବିଷ୍ୟତରେ ବଡ଼ ଧରଣର ଦୁର୍ଘଟଣା ଆଶଙ୍କା ରଖିଥିଲେ ।
ଜାତୀୟ ଗଣମାଧ୍ୟମରେ ଚର୍ଚ୍ଚା ଅନୁଯାୟୀ, ଶ୍ରୀ ବର୍ମାଙ୍କର ଏହି ରିପୋର୍ଟ ପ୍ରସ୍ତୁତ ପଛରେ ଏକ ଭୟଙ୍କର କାହାଣୀ ଥିଲା । ଗତ ଫେବୃଆରୀ ୯ ତାରିଖରେ ସମତାକ୍ରାନ୍ତି ଏକ୍ସପ୍ରେସ୍(୧୨୬୪୯) କରମଣ୍ଡଳ ଏକ୍ସପ୍ରେସ୍ ର ଦଶା ଭୋଗିବା ଅବସ୍ଥାକୁ ଚାଲି ଆସିଥିଲା । ସେଦିନ ଇଲେକଟ୍ରୋନିକ୍ ଇଣ୍ଟରଲିକଂ ବ୍ୟବସ୍ଥାରେ ତ୍ରୁଟି ଯୋଗୁଁ ସିଗନାଲ୍ ଫେଲ୍ ମାରିଥିଲା । ତେବେ ଟ୍ରେନ୍ ଡ୍ରାଇଭରଙ୍କ ଉପସ୍ଥିତି ବୁଦ୍ଧି ଯୋଗୁଁ ସେ ଟ୍ରେନ୍ ଅଟକାଇ ଦେଇଥିଲେ । ଫଳରେ ଏକ ବଡ଼ ଦୁର୍ଘଟଣାରୁ ରକ୍ଷା ପାଇଯାଇଥିଲା । ଦକ୍ଷିଣ ପୂର୍ବ ରେଳୱେର ମୁଖ୍ୟ ଅପରେଟିଂ ମ୍ୟାନେଜର ଶ୍ରୀ ବର୍ମା ଏହି ବ୍ୟବସ୍ଥାର ଅନୁଧ୍ୟାନ କରି ରେଲୱେ ବୋର୍ଡକୁ ସତର୍କ କରାଇ ଦେଇଥିଲେ ।
ମାତ୍ର ରେଳୱେ ବୋର୍ଡ ଏହାକୁ ଆଦୌ ଗୁରୁତ୍ୱ ଦେଇନାହାନ୍ତି । ଏହା ଉପରେ ପଦକ୍ଷେପ ନେଇଥିଲେ ବାହାନଗାରେ ଭୟଙ୍କର ରେଳ ଦୁର୍ଘଟଣାକୁ ଏଡ଼ାଇ ହୋଇଥାନ୍ତା ବୋଲି ଆଜି ଏଆଇସିସି ପକ୍ଷରୁ ସାମ୍ବାଦିକ ସମ୍ମିଳନୀରେ କେନ୍ଦ୍ର ସରକାରଙ୍କୁ ସମାଲୋଚନା କରାଯାଇଛି । ଏହି ଅବହେଳା ପାଇଁ ରେଳମନ୍ତ୍ରୀଙ୍କୁ ସିଧାସଳଖ ଦାୟୀ କରାଯାଇଛି ।
ରେଲୱେ ଦାୟିତ୍ୱହୀନତା ବିରୋଧରେ ଏତଲା: ବାହାନଗା ଟ୍ରେନ ଦୁର୍ଘଟଣା ନେଇ ଆଜି ଥାନାରେ ମାମଲା ରୁଜୁ ହୋଇଛି । ବାଲେଶ୍ୱର ଜିଆରପି ଥାନାରେ ଏସଆଇ ପପୁ ନାୟକଙ୍କ ପକ୍ଷରୁ ଏତଲା ଦିଆଯାଇଛି । ରେଲୱେର ଦାୟିତ୍ୱହୀନତା ପାଇଁ ଦୁର୍ଘଟଣା ଘଟିଥିବା ଏତଲାରେ କୁହାଯାଇଛି । ଆଇପିସି ଦଫା ୩୩୭, ୩୩୮, ୩୦୪(କ), ୩୪ ଏବଂ ରେଲୱେ ଆକ୍ଟ ୧୫୩, ୧୫୪ ଓ ୧୭୫ ରେ ମାମଲା ରୁଜୁ ହୋଇଛି । ଡିଏସପି ରଞ୍ଜିତ ନାୟକଙ୍କୁ ମାମଲାର ତଦନ୍ତ ଦାୟିତ୍ୱ ଦିଆଯାଇଛି ।
ଅନ୍ୟପକ୍ଷରେ ସିବିଆଇ ଏହି ମାମଲାର ତଦନ୍ତ ଆରମ୍ଭ କରିଛି । ଆଜି ସିବିଆଇର ଏକ ଟିମ୍ ବାହାନଗା ଆସି ରେଳ ଦୁର୍ଘଟଣାସ୍ଥଳ ଅନୁଧ୍ୟାନ କରିଛନ୍ତି । ଇଲେକଟ୍ରୋନିକ୍ ଇଣ୍ଟରଲକିଂ ସିଷ୍ଟମ୍ ଫେଲ୍ ଯୋଗୁଁ ଦୁର୍ଘଟଣା ଘଟିଥିବା ଏବଂ ଏଥିପାଇଁ ଦାୟୀ ବ୍ୟକ୍ତିଙ୍କୁ ଚିହ୍ନଟ କରାଯାଇଛି ବୋଲି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ବୟାନ ପରିପ୍ରେକ୍ଷୀରେ ସିବିଆଇ ତଦନ୍ତ ଉପରକୁ ସମସ୍ତଙ୍କ ନଜର ଯାଇଛି ।
