ଭୁବନେଶ୍ୱର: ଧାମନଗର ଉପନିର୍ବାଚନ ସମୟରେ ସବୁଠାରୁ ଅଧିକ ଚର୍ଚ୍ଚିତ ଚେହେରା ଥିଲେ ରାଜେନ୍ଦ୍ର ଓରଫ୍ ରାଜୁ ଦାସ । ବିଜେଡି ଟିକେଟ୍ ପାଇଁ ହକଦାର ଥିବା ଏହି ସଚ୍ଚୋଟ, ସରଳ ନେତାଙ୍କୁ ଦଳ ଟିକେଟ୍ ଦେଲାନି । ଦଳ ଭିତରେ ଷଡ଼ଯନ୍ତ୍ରର ଶିକାର ହୋଇଥିଲେ ସେ । ଅନାମଧ୍ୟେୟ ଅବନ୍ତୀ ଦାସଙ୍କୁ ବିଜେଡି ଟିକେଟ୍ ଦେଲା ଏବଂ ରାଜୁ ଦାସ ବିଦ୍ରୋହୀ ପ୍ରାର୍ଥୀ ଭାବେ ଲଢ଼ିଥିଲେ । ଏହି ଉପନିର୍ବାଚନରେ ବିଜେପି ପ୍ରାର୍ଥୀ ସୂର୍ଯ୍ୟବଂଶୀ ସୂରଜ ତାଙ୍କର ନିକଟତମ ବିଜେଡି ପ୍ରାର୍ଥୀଙ୍କୁ ୯, ୮୮୧ ଖଣ୍ଡ ଭୋଟରେ ପରାସ୍ତ କରିଥିଲେ । ରାଜୁ ଦାସ ୮, ୧୫୩ ଭୋଟ ପାଇ ତୃତୀୟ ସ୍ଥାନରେ ରହିଥିଲେ ।
ମୋଟାମୋଟି କଥା ହେଉଛି- ସବୁ କଳ, ବଳ, କୌଶଳ ସତ୍ତ୍ୱେ ବିଜେଡି ହାରିବା ପଛରେ ରାଜୁ ଦାସଙ୍କର ପ୍ରମୁଖ ଭୂମିକା ଥିଲା । ବିଜେଡି ବିରୋଧରେ ସ୍ୱାଧୀନ ଭାବେ ଲଢ଼ି ୮ ହଜାରରୁ ଅଧିକ ଭୋଟ ପାଇ ସେ ଚର୍ଚ୍ଚାର କେନ୍ଦ୍ରବିନ୍ଦୁ ହୋଇଥିଲେ । ରାଜନୈତିକ ମାହୋଲରେ ତାଙ୍କ ନାଁ ହଟଚମଟ ସୃଷ୍ଟି କରିଥିଲା । ଓଡ଼ିଶା ରାଜନୀତିରେ ସେ ଏକ ଉଦାହରଣ ହୋଇଥିଲେ । ବିଜେଡିକୁ ରାଜୁ ଦାସ ଫ୍ୟାକ୍ଟର୍ ମହଙ୍ଗା ପଡ଼ିପାରେ ବୋଲି ରାଜନୈତିକ ବିଶାରଦମାନେ ମତ ଦେଇଥିଲେ । ରାଜୁଙ୍କୁ ନେଇ ସବୁଠାରୁ ବେଶୀ ଉତ୍ସାହିତ ହୋଇଥିଲା ବିଜେପି । ସମଗ୍ର ରାଜ୍ୟରେ ରାଜୁ ଦାସଙ୍କ ଭଳି ଚରିତ୍ର ବାଛିବାକୁ ବିଜେପି ଏକ ବଡ଼ ଦାୟିତ୍ୱ ଭାବି ନେଇଥିଲା ।
ଦୁଇବର୍ଷ ପରେ ଏବେ ଆସିଛି ସାଧାରଣ ନିର୍ବାଚନ । ରାଜୁ ଦାସଙ୍କୁ ଟିକେଟ୍ ପ୍ରଲୋଭନ ଦେଇ ବିଜେପି ନେତୃତ୍ୱ ତାଙ୍କୁ ଟୋପି ପିନ୍ଧାଇ ଦେଲେ । ରାଜୁ ଦାସ ଖୁସିରେ ଆତ୍ମହରା ହୋଇଗଲେ । ବିଜେଡିକୁ ହରାଇବାକୁ ଏସା କରିଦେବୁ, ତେସା କରିଦେବୁ ବୋଲି ବିଭିନ୍ନ ମିଡିଆକୁ ସାକ୍ଷାତକାର ଦେଲେ । ପରବର୍ତ୍ତୀ ସମୟରେ ବିଜେପି ଟିକେଟ୍ ବାଣ୍ଟିଲା । ସୋର ବିଧାନସଭା ଆସନରୁ ତାଙ୍କୁ ପ୍ରାର୍ଥୀ ଘୋଷଣା କରାଗଲା । ଦ୍ୱିତୀୟ ଥରର ବିଧାୟକ ଗୁଲି ଗାଇ ରାଜୁ ଦାସ ବୁଲିଲେ । ମାତ୍ର ବାସ୍ତବ ସ୍ଥିତି କିନ୍ତୁ ଭିନ୍ନ ଥିଲା । ଉପର ନିଦେ୍ର୍ଦଶରେ ସୋର ବିଜେପି କର୍ମୀମାନେ ତାଙ୍କୁ କିନ୍ତୁ ପାଖରେ ପୂରାଇ ଦେଲେ ନାହିଁ । ବିଧାୟକ ଆଶାୟୀ ମାନେ ସେମାନଙ୍କ ସମର୍ଥକଙ୍କୁ ଧରି ରାଜୁଙ୍କୁ ଖୋଲାଖୋଲି ବିରୋଧ କଲେ ।
ଏଭଳି ସ୍ଥିତିରେ ଗତ ୧୪ ତାରିଖରେ ପ୍ରାର୍ଥୀପତ୍ର ଦାଖଲର ସମୟ ସରିବାକୁ ବସିଥିଲେ ମଧ୍ୟ ରାଜୁଙ୍କ ହାତକୁ ଟିକେଟ୍ ଆସିଲା ନାହିଁ । ଟିକେଟ୍ ଚାଲିଗଲା ବର୍ତ୍ତମାନର ବିଧାୟକ ପର୍ଶୁରାମ ଧଡ଼ାଙ୍କ ପାଖକୁ । ଏହି ଧଡ଼ା, ବିଜେଡି ଟିକେଟ୍ ହରାଇବା ପରେ ବିଜେପିକୁ ପଳାଇ ଆସିଛନ୍ତି । ସୁତରାଂ, ଶେଷ ମୁହୂର୍ତ୍ତ ପର୍ଯ୍ୟନ୍ତ ମନମୋହନ ସାମଲଙ୍କ ଟିକେଟ୍ ଚାଲ୍ ବୁଝିପାରିଲେ ନାହିଁ ରାଜୁ ଦାସ ।
ବିଜେପିର ଏହି ଅପମାନକୁ ସହି ନ ପାରି ରାଜୁ ଦାସ ଆଜି ଦଳରୁ ଇସ୍ତଫା ଦେଇଛନ୍ତି । ଦୁଇବର୍ଷ ତଳେ ବିରୋଧୀ ଦଳ ପକ୍ଷରେ ରାଜନୀତିର ଆଦର୍ଶ ପୁରୁଷ ବନିଥିବା ଏହି ନେତା ଏବେ ଭବିଷ୍ୟତ ରାଜନୀତିର ଅନ୍ଧାରରେ ଫସିଯାଇଛନ୍ତି । ଆଉ କେବେ ବିଧାୟକ ହେବେ ସେ ସ୍ୱପ୍ନ ମଉଳି ଯାଇଛି ।
ରାଜୁ ଦାସଙ୍କ ଭଳି ବିଜେପିରେ ଟିକେଟ୍ ସ୍ୱପ୍ନ ଦେଖିଥିବା ଦେବାଶିଷ ନାୟକ, ଲିକୁ ଦାସ, ବିପିନ ପ୍ରଧାନ, ହିମାଂଶୁ ସ୍ୱାଇଁଙ୍କ ରାଜନୈତିକ ଭବିଷ୍ୟତ ମଧ୍ୟ ଅନ୍ଧାରକୁ ଚାଲିଯାଇଛି । ନିର୍ବାଚନୀ ମାହୋଲରେ ଏହା ଚର୍ଚ୍ଚାର ବିଷୟ ହୋଇଛି ।
