ଭୁବନେଶ୍ୱର: ‘ଇନ୍ ଦ ରାଙ୍କ୍ ଅଫ୍ ଭାଇସ୍ ପ୍ରେସିଡେଣ୍ଟ’ କ’ଣ? ବିଜେଡି ସିନିୟର୍ ସିଟିଜନ୍ ସେଲ୍ ର ଏହି ପଦବୀରେ ଆପଣ ମତେ ନିଯୁକ୍ତି ଦେଇଛନ୍ତି । କିନ୍ତୁ ଏ ପର୍ଯ୍ୟନ୍ତ ଏହାର ଅର୍ଥ ମୁଁ ବୁଝିପାରିଲିନି ସାର୍ । ଲାଗୁଛି ଏହା ଏକ ବ୍ୟୁରୋକ୍ରାଟିକ୍ ତାମସା । ଏହି ପଦବୀ ପାଇ ନିଜକୁ ଅପମାନିତ ମନେ କରୁଛି । ଆପଣଙ୍କୁ ବିନମ୍ର ଅନୁରୋଧ କରୁଛି ଯେ ଏଭଳି ପଦବୀକୁ ମୁଁ ଗ୍ରହଣ କରିପାରୁନି । ଆପଣଙ୍କ ନେତୃତ୍ୱରେ ବିଜୁ ଜନତା ଦଳର ଜଣେ ସାଧାରଣ କର୍ମୀ ଭାବେ କାର୍ଯ୍ୟ କରିବି ।’
ବିଜେଡିର ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ ଆଜି ଏହି ମର୍ମରେ ଦଳ ସୁପ୍ରିମୋ ନବୀନ ପଟ୍ଟନାୟକଙ୍କୁ ଚିଠି ଲେଖିଛନ୍ତି । ତାଙ୍କୁ ଦିଆଯାଇଥିବା ଉପସଭାପତି ପାହ୍ୟା ପଦକୁ ପ୍ରତ୍ୟାଖ୍ୟାନ କରି ନିଜର ଅସନ୍ତୋଷ ଝାଡ଼ିଛନ୍ତି । ଦେବାଶିଷ ଲେଖିଛନ୍ତି-
ପ୍ରବାଦ ପୁରୁଷ ବିଜୁ ବାବୁ କିମ୍ବା ଆପଣଙ୍କ ଅନୁଗତମାନଙ୍କର ବିଜେଡିରେ ସ୍ଥାନ ଥିବା ମୋର ସନ୍ଦେହ ହେଉଛି । ବିଜୁ ଲିଗାସୀଠାରୁ ଦୂରେଇ ଏହି ଦଳ ଅନ୍ୟ ଚିନ୍ତାଧାରା, ଆଦର୍ଶ ଓ କାର୍ଯ୍ୟକ୍ରମକୁ ଆପଣେଇଛି । ଆପଣଙ୍କ ପ୍ରତି ଶ୍ରଦ୍ଧା ଓ ଆନୁଗତ୍ୟ ସତ୍ତ୍ୱେ ଦଳର ଏହି ନୂଆ କାର୍ଯ୍ୟଧାରା ମୋତେ ବ୍ୟଥିତ କରିଛି । କେବଳ ମୁଁ ନୁହେଁ, ବିଜେଡିର ହଜାର ହଜାର କର୍ମୀଙ୍କର ଆପଣ ଆଶାବାଡ଼ି । ମୁଁ ଦୃଢ଼ ନିଶ୍ଚିତ ଯେ ଆପଣଙ୍କ ନେତୃତ୍ୱରେ ଆମେ ଲକ୍ଷ ଲକ୍ଷ ଓଡ଼ିଶାବାସୀଙ୍କର ବିଶ୍ୱାସ ଫେରିପାଇବା ।
ଗତ ସାଧାରଣ ନିର୍ବାଚନରେ ଦଳ ବିପର୍ଯ୍ୟୟର କାରଣ ଖୋଜାଗଲା ନାହିଁ କି ନିରାକରଣ ହେଲା ନାହିଁ । ପାଟି ଖୋଲି କିଏ କୁହନ୍ତୁ ନ କୁହନ୍ତୁ ବିଜେଡି ବିପର୍ଯ୍ୟୟର କାରଣ ସମସ୍ତଙ୍କୁ ଜଣା । ମାତ୍ର ଦଳ ଏ ପର୍ଯ୍ୟନ୍ତ ବାସ୍ତବତାକୁ ଗ୍ରହଣ କଲା ନାହିଁ । ନିର୍ବାଚନରେ ଜୟ ପରାଜୟ ବଡ଼ କଥା ନୁହେଁ । ମାତ୍ର ଜଣେ ଲୋକପ୍ରିୟ ମୁଖ୍ୟମନ୍ତ୍ରୀ ଏଭଳି ହାରିବା କଥାକୁ ସହଜରେ ଗ୍ରହଣ କରିହେଉନାହିଁ । ଦଳକୁ ଦୁର୍ବଳ କରିବାକୁ ଉଦ୍ୟମ କରୁଥିବା ଯେ କୌଣସି ଶକ୍ତିଙ୍କୁ ପ୍ରତିରୋଧ କରିବେ ବୋଲି ଆଶା । ଆପଣ ଚାହିଁଲେ ଦଳ ମଜବୁତ ରହିପାରିବ ।
ଖାଲି ଏହି ଚିଠି ନୁହେଁ, ଗଣମାଧ୍ୟମରେ ମଧ୍ୟ ବିସ୍ଫୋରଣ କରିଛନ୍ତି ଦେବାଶିଷ । କହିଛନ୍ତି, ବିଜୁ ଜନତା ଦଳ ପୂର୍ବଦଳ ହୋଇ ରହିନାହିଁ । ଏହା ବ୍ୟୁରୋକ୍ରାଟିକ୍ ଦଳ ହୋଇଯାଇଛି । ଏବେ ବି ଦଳକୁ ଭିକେ ପାଣ୍ଡିଆନ୍ ଚଳାଉଛନ୍ତି । ବିଜୁ ବାବୁଙ୍କ ଆଦର୍ଶରେ ଆଉ ଦଳ ପରିଚାଳିତ ହେଉନାହିଁ । ୱକଫ୍ ବିଲ୍ ରେ ଯାହା ଘଟିଗଲା ତାହା ଦୁର୍ଭାଗ୍ୟଜନକ । ସଂସଦରେ ଆମକୁ ଭୀଷଣ ଅପମାନିତ ହେବାକୁ ପଡ଼ିଲା । ନବୀନ ବାବୁଙ୍କୁ ଫୋନ୍ କରି ଏ ବିଷୟ ଜଣାଇଥିଲି । ସେ ଦେଖା ହେବାକୁ କହିଥିଲେ । ମାତ୍ର ସେବେଠାରୁ ତାଙ୍କ ପାଖ ମଡ଼ାଇ ଦିଆଯାଉନାହିଁ । ସ୍ୱାସ୍ଥ୍ୟ ଆଳରେ ମୋତେ ଦେଖା କରାଇ ଦେଉନାହାନ୍ତି । ନବୀନ ବାବୁ ନୂଆପଡ଼ା ପ୍ରଚାରକୁ ଗଲେ, ମୋତେ ଦେଖା ଦେବାରେ ଅସୁବିଧା କ’ଣ ବୋଲି ପ୍ରଶ୍ନ କରିଛନ୍ତି ଦେବାଶିଷ ।
ସୂଚନାଥାଉକି, ୱକଫ୍ ବିଲ୍ ପ୍ରସଙ୍ଗରେ ବିଜେଡିର ଆଭିମୁଖ୍ୟକୁ ବିରୋଧ କରିଥିଲେ ଦେବାଶିଷ । ସଂସଦରେ ବିଲ୍ କୁ ବିରୋଧ କରାଯିବ ବୋଲି ନବୀନ ବାବୁ ପ୍ରଥମରୁ ନିଷ୍ପତ୍ତି ନେଇଥିଲେ ମଧ୍ୟ ଶେଷ ମୁହୂର୍ତ୍ତରେ ତାହା ବଦଳିଗଲା । ବିବେକାନୁମୋଦିତ ଭୋଟ ଆଳରେ ବିଲ୍ କୁ ସମର୍ଥନ କରିବାକୁ କୁହାଗଲା । ବିଲ୍ କୁ ବିରୋଧ କରି ମୁନ୍ନା ଖାଁ ତାଙ୍କର ବିବେକ ପ୍ରକଟ କରିଥିଲା ବେଳେ ଦେବାଶିଷ ବିଜେଡି ନିଷ୍ପତ୍ତିର ପ୍ରତିବାଦରେ ଭୋଟିଂରୁ ବିରତ ରହିଥିଲେ । ବିଜେଡିର ନିଷ୍ପତ୍ତି ବଦଳିବା ପଛରେ ପାଣ୍ଡିଆନଙ୍କୁ ଦାୟୀ କରିଥିଲେ ସେ । ସେବେଠାରୁ ସେ ଦଳରେ ବିଦ୍ରୋହୀ ଭୂମିକାରେ ଅବତୀର୍ଣ୍ଣ ହୋଇଛନ୍ତି ।
ଆଜି ଦେବାଶିଷ ସାମନ୍ତରାୟ ଦଳୀୟ ପଦ ଛାଡ଼ିବା ଏବଂ ଗଣମାଧ୍ୟମରେ ବିସ୍ଫୋରଣ କରିବା ପରେ ତାଙ୍କ ପଛକୁ ବାହାରିଛନ୍ତି ବରିଷ୍ଠ ନେତା ଭୂପିନ୍ଦର ସିଂ । ଦେବାଶିଷଙ୍କ ମତ ଓ ମନ୍ତବ୍ୟକୁ ସେ ସମର୍ଥନ କରିଛନ୍ତି । ନବୀନ ପଟ୍ଟନାୟକ ଆଉ କାହାରି ଉପରେ ଭରସା ନ କରି ନିଜେ ଦଳର ନେତୃତ୍ୱ ନିଅନ୍ତୁ ବୋଲି ସେ ପରାମର୍ଶ ଦେଇଛନ୍ତି ।
