ବିିହାରରେ ଧର୍ମେନ୍ଦ୍ରଙ୍କ ଧମାକା

ଭୁବନେଶ୍ୱର: ବିହାରରେ ଏନଡିଏକୁ ମିଳିଛି ବିପୁଳ ସଫଳତା । ବିଜେପି ନେତୃତ୍ୱାଧୀନ ଏନଡିଏକୁ ୨୦୨ ଆସନ ମିଳିଥିବା ବେଳେ କଂଗ୍ରେସ ନେତୃତ୍ୱାଧୀନ ମହାଗଠବନ୍ଧନକୁ ମିଳିଛି ମାତ୍ର ୩୫ ଟି ଆସନ । ଏନଡିଏର ବୃହତ୍ତ ସଫଳତା ପଛରେ ଓଡ଼ିଆ ପୁଅ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଭୂମିକା ଏବେ ଚର୍ଚ୍ଚାରେ । । ଜାତୀୟ ଗଣମାଧ୍ୟମ ତାଙ୍କର ପ୍ରଶଂସାରେ ଶତମୁଖର ହୋଇଛନ୍ତି ।

ଏନଡିଏ ପାଇଁ ବିହାର ନିର୍ବାଚନ ଥିଲା ଅତ୍ୟନ୍ତ ଚାଲେଂଜପୂର୍ଣ୍ଣ । ଆଉ ଏହାର ପରିଚାଳନା ଦାୟିତ୍ୱ ପଡ଼ିଥିଲା ଧର୍ମେନ୍ଦ୍ରଙ୍କ ଉପରେ । ଏନଡିଏର ଗୁରୁତ୍ୱପୂର୍ଣ୍ଣ ରଣନୀତି ଭାବେ ଅଭିଜ୍ଞ ଓ ଦକ୍ଷ ସଂଗଠକ ଧର୍ମେନ୍ଦ୍ରଙ୍କୁ ନିର୍ବାଚନ ପ୍ରଭାରୀ ଭାବେ ନିଯୁକ୍ତି ମିଳିଥିଲା । ଗୃହମନ୍ତ୍ରୀ ଅମିତ୍ ଶାହଙ୍କ ସହ ଯୋଜନାବଦ୍ଧ ରଣନୀତି, ସହଯୋଗୀ ଦଳଙ୍କ ସହ ସଠିକ୍ ସମନ୍ୱୟ, ମୋଦୀ ସରକାରଙ୍କ ଯୋଜନାଗୁଡ଼ିକୁ ଲୋକଙ୍କ ପାଖରେ ପହଞ୍ଚାଇବା ଏବଂ ଜନସାଧାରଣଙ୍କ ସହ ଯୋଡ଼ି ହେବାରେ ଧର୍ମେନ୍ଦ୍ର ମୁଖ୍ୟ ଭୂମିକା ଗ୍ରହଣ କରିଥିଲେ ।

ନିର୍ବାଚନ ପ୍ରଭାରୀ ଦାୟିତ୍ୱ ଦାୟିତ୍ୱ ନେବା ଦିନଠାରୁ ନିର୍ବାଚନ ଶେଷ ପର୍ଯ୍ୟନ୍ତ ଧର୍ମେନ୍ଦ୍ର କ୍ଷେତ୍ରୀୟ ସ୍ତରରେ ଡେରା ପକାଇଥିଲେ । ବୁଥ୍ କୁ ଯାଇ କାର୍ଯ୍ୟକର୍ତ୍ତାଙ୍କ ସହ ମିଶି ସେମାନଙ୍କୁ ଉତ୍ସାହିତ କରିଥିଲେ । ଏଥିସହ ସହଯୋଗୀ ଦଳର ନେତାମାନଙ୍କ ସହ ସୁସମ୍ପର୍କ ରଖିବା ସହ ସଂଘ ପରିବାର ସହ ସମନ୍ୱୟ ରକ୍ଷା କରିଥିଲେ । ନିର୍ବାଚନ ସମୟରେ ଦଳ ଭିତରେ ଉପୁଜିଥିବା ଅସନ୍ତୁଷ୍ଟ ନେତାମାନଙ୍କୁ ବୁଝାଇବା ଏବଂ ସେମାନଙ୍କୁ କାର୍ଯ୍ୟରେ ଲଗାଇବା ଭଳି ଗୁରୁତ୍ୱପୂର୍ଣ୍ଣ ଦାୟିତ୍ୱକୁ ସେ ସଫଳତାର ସହ ତୁଲାଇଥିଲେ । ଏନଡିଏ ମେଣ୍ଟରେ ବିଭିନ୍ନ ଦଳକୁ ଏକାଠି ରଖିବା ଏବଂ ସନ୍ତୁଳିତ ଆସନ ବୁଝାମଣା କରିବା ଏକ ବଡ଼ ଆହ୍ୱାନ ଥିଲେ ମଧ୍ୟ ଧର୍ମେନ୍ଦ୍ର ଏହାର ସଠିକ ପରିଚାଳନାରେ ସଫଳ ହୋଇଛନ୍ତି ।

ସୂଚନାଥାଉକି, ଧର୍ମେନ୍ଦ୍ର ପ୍ରଧାନ ପୂର୍ବରୁ ୟୁପି, ତ୍ରିପୁରା, ଛତିଶଗଡ଼, ଝାଡ଼ଖଣ୍ଡ, ଉତ୍ତରାଖଣ୍ଡ, ମଧ୍ୟପ୍ରଦେଶ ଭଳି ବିଭିନ୍ନ ରାଜ୍ୟରେ ପ୍ରଭାରୀ ଓ ନିର୍ବାଚନ ପ୍ରଭାରୀ ଦାୟିତ୍ୱ ସୁଚାରୂରୂପେ ତୁଲାଇଛନ୍ତି । ଗତବର୍ଷ ତାଙ୍କୁ ହରିୟାଣା ନିର୍ବାଚନ ପ୍ରଭାରୀର ଦାୟିତ୍ୱ ମିଳିଥିଲା । ତାଙ୍କର ଦୃଢ଼ ଓ ପ୍ରଭାବଶାଳୀ ନେତୃତ୍ୱ କାରଣରୁ ହରିୟାଣା ଭଳି ରାଜ୍ୟରେ ବିଜେପି ତୃତୀୟ ଥର ପାଇଁ ସରକାର ଗଠନ କରିଥିଲା । କର୍ଣ୍ଣାଟକରେ ରାଜନୈତିକ ସଙ୍କଟ ବେଳେ ଧର୍ମେନ୍ଦ୍ରଙ୍କୁ କ୍ରାଇସିସ୍ ମ୍ୟାନେଜର ଭୂମିକାରେ ଦେଖିବାକୁ ମିଳିଥିଲା ।