‘ଶଙ୍ଖ ଭବନ’ କାରସାଦି: ତଥ୍ୟ ଫାଙ୍କିବାକୁ ବିଜେଡିର ଉଦ୍ୟମ

ଭୁବନେଶ୍ୱର: ବିଜେଡି ଅଫିସ ‘ଶଙ୍ଖ ଭବନ’ ନିର୍ମାଣରେ ହୋଇଥିବା ବେଆଇନ କାରସାଦି ଖବର ରାଜ୍ୟରେ ହଟଚମଟ ସୃଷ୍ଟି କରିଛି । ଏହି ସମୁଦାୟ ପ୍ରକ୍ରିୟା ଏବଂ ବେଆଇନ କାରସାଦି ଉପରେ ଏକ ଅନୁସନ୍ଧାନମୂଳକ ରିପୋର୍ଟ ଆଜି ‘ମିଡଡେ ଓଡ଼ିଶା’ ପ୍ରକାଶ କରିଥିଲା । ଏହି ଖବରକୁ ରାଜ୍ୟ ସରକାର ଗୁରୁତ୍ୱର ସହ ଗ୍ରହଣ କରିଛନ୍ତି । ଶଙ୍ଖ ଭବନ ନିର୍ମାଣର ତଦନ୍ତ ହେବ ଏବଂ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ରାଜସ୍ୱମନ୍ତ୍ରୀ ସୁରେଶ ପୂଜାରୀ ଗଣମାଧ୍ୟକୁ ପ୍ରତିକ୍ରିୟା ଦେଇଛନ୍ତି ।

ଶ୍ରୀ ପୂଜାରୀ କହିଛନ୍ତି, ପୂର୍ବ ସରକାରରେ ଅଫିସରମାନଙ୍କ ରାଜତ୍ୱ ଚାଲିଥିଲା । ସେମାନେ ଯାହା ଚାହୁଁଥିଲେ, ସେୟା କରୁଥିଲେ । ରାଜନୈତିକ ଲୋକମାନେ ଚଉକି ଲଗାଉଥିଲେ, ଆଉ ଅଫିସରମାନେ ଚଉକିରେ ବସି ଭାଷଣ ଦେଉଥିଲେ । ଯେତେ ଭୁଲ୍ କରିଛନ୍ତି ଜାଣି ଜାଣି କରି ଭୁଲ୍ କରିଛନ୍ତି ଏବଂ ଓଡ଼ିଶାକୁ କ୍ଷତିରେ ପକାଇଛନ୍ତି । ଶଙ୍ଖ ଭବନକୁ ନେଇ ଯେଉଁ ଖବର ଆସୁଛି ତାହା ଉପରେ ତଦନ୍ତ ହେବ ଏବଂ ଦୋଷୀଙ୍କୁ ନିଶ୍ଚିତ ଦଣ୍ଡ ମିଳିବ ବୋଲି ରାଜସ୍ୱମନ୍ତ୍ରୀ କହିଛନ୍ତି ।

ଅନ୍ୟପକ୍ଷରେ ବିଜେଡି ଏକ ସାମ୍ବାଦିକ ସମ୍ମିଳନୀ ଡାକି ଏ ସଂକ୍ରାନ୍ତୀୟ ତଥ୍ୟ ଓ ସତ୍ୟକୁ ଫାଙ୍କିବାକୁ ଉଦ୍ୟମ କରିଛି । ଶଙ୍ଖ ଭବନରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଦଳର ବରିଷ୍ଠ ନେତା ଦେବୀ ପ୍ରସାଦ ମିଶ୍ର ରାଜସ୍ୱମନ୍ତ୍ରୀଙ୍କ ମନ୍ତବ୍ୟ ଉପରେ ସ୍ପଷ୍ଟୀକରଣ ଦେବାକୁ ଯାଇ କହିଛନ୍ତି ଯେ ବିଜେଡିର ମୁଖ୍ୟ କାର୍ଯ୍ୟାଳୟ ଶଙ୍ଖ ଭବନ ଯେଉଁ ଜମି ଉପରେ ନିର୍ମାଣ ହୋଇଛି, ତାହା ସମ୍ପୂର୍ଣ୍ଣ ଆଇନ ସମ୍ମତ ଭାବେ ବିଜୁ ଜନତା ଦଳକୁ ଆବଣ୍ଟନ କରାଯାଇଛି ।

ତାଙ୍କର ସଫେଇ ହେଉଛି, ଏହି ଆବଣ୍ଟନ ବେଞ୍ଚ ମାର୍କ ଭାଲୁ୍ୟ ଆଇନ ଆଧାରରେ କରାଯାଇଛି । ମୌଜା ଗଙ୍ଗନଗର, ୟୁନିଟ୍ ୬, ତହସିଲ-ଭୁବନେଶ୍ୱର, ଖାତା ନମ୍ବର ୧୧୨, ପ୍ଲଟ୍ ନଂ ୭୯୭ ପାର୍ଟ, ୭୯୮ ପାର୍ଟ, ୮୦୦, ୭୯୭/୮୪୯ରେ ଥିବା ପ୍ଲଟଗୁଡ଼ିକୁ କମ୍ପାକ୍ଟ ପାର୍ସଲରେ ପଟା ଦିଆଯାଇଛି । ଗଙ୍ଗନଗର ଅଞ୍ଚଳର ୨୦୨୧ ମସିହାର ବେଞ୍ଚ ମାର୍କ ଭାଲ୍ୟୁ ଅନୁସାରେ ସରକାରଙ୍କ ଦ୍ୱାରା ସ୍ଥିରୀକୃତ କରାଯାଇଥିବା ପରିମାଣକୁ ବିଜେଡି ଦ୍ୱାରା ପୈଠ କରାଯାଇଥିଲା ।

ମୁୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବସିଥିବା ଉଚ୍ଚସ୍ତରୀୟ କମିଟି ବୈଠକରେ ବିଜେଡିର ସାଂଗଠନିକ ସମ୍ପାଦକଙ୍କ ଆବେଦନ ଅନୁଯାୟୀ ବିଜେଡି ଅଫିସ ପାଇଁ ୧ ଏକର ୧୮୩ ଡିସିମିଲି ଜମି ପ୍ରଦାନ କରାଯାଇଥିଲା । ସେହି ଉଚ୍ଚସ୍ତରୀୟ କମିଟି ବୈଠକରେ ବିଜେପି ଅଫିସ ପାଇଁ ଖାରବେଳ ନଗରରେ ୧ ଏକର ୨୬୯ ଡିସିମିଲି ଜମି ପ୍ରଦାନ କରାଯାଇଥିଲା । ବିଜେଡିକୁ ପ୍ରଦାନ କରାଯାଇଥିବା ଦୁଇଟି କ୍ୱାର୍ଟର ଭିତରେ କଞ୍ଜରଭାନ୍ସି ଲେନ୍ ବା ଉପଗଳିକୁ ଓଜିଏଲଏସ ରୁଲ୍ ୮ ଉପଧାରା ୪ ଅନୁଯାୟୀ ଇନଷ୍ଟିଚ୍ୟୁସନାଲ୍ ରେସିଡେନ୍ସି ନିୟମରେ ଆବଣ୍ଟନ କରାଯାଇଛି । ଏହି ଦୃଷ୍ଟିରୁ ଦୁଇଟି କ୍ୱାର୍ଟର୍ ମଝିରେ ଥିବା ଉପଗଳିକୁ ସଡ଼କ କହିବା ଭୁଲ୍ ବୋଲି ଶ୍ରୀ ମିଶ୍ର ସଫେଇ ଦେଇଛନ୍ତି ।

ସେହିଭଳି ଶଙ୍ଖ ଭବନ ଜାଗାର ଆବେଦନକାରୀ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ(ବବି) ଦାସ ଏହି ଖବର ଉପରେ ଟୁଇଟ୍ କରି ସମାନ କଥା କହିଛନ୍ତି । ଜମି ଆବଣ୍ଟନ ପାଇଁ ବିଧି ଅନୁଯାୟୀ ବିଜେଡି ଆବେଦନ କରିଥିଲା ଏବଂ ସରକାରୀ ସ୍ତରରେ ଯାହା ନିର୍ଦ୍ଦେଶ ଦିଆଯାଇଥିଲା, ତାକୁ ଅନୁପାଳନ ମଧ୍ୟ କରିଥିଲା । ଏଥିରେ କୌଣସି ପ୍ରକାରର ତ୍ରୁଟି ବିଚ୍ୟୁତି ନାହିଁ ବୋଲି ସେ ପୁଣି ସଫେଇ ଦେଇଛନ୍ତି ।

ତେବେ ‘ମିଡଡେ ଓଡ଼ିଶା’ ରେ ଦିଆଯାଇଥିବା ତଥ୍ୟର ସାମନା କରିବା ବଦଳରେ ସେ ମଧ୍ୟ ରାଜସ୍ୱମନ୍ତ୍ରୀଙ୍କ ମନ୍ତବ୍ୟକୁ ଟାର୍ଗେଟ୍ କରି ମୂଳ ପ୍ରଶ୍ନକୁ ଏଡ଼ାଇ ଦେଇଛନ୍ତି । ନୂଆ ମନ୍ତ୍ରୀ ହୋଇଥିବା ଶ୍ରୀ ପୂଜାରୀ ସମସ୍ତ ତଥ୍ୟ ସଂକ୍ରାନ୍ତରେ ଅବଗତ ନ ହୋଇ ଗଣମାଧ୍ୟମ ସାମ୍ନାକୁ ଆସି ମନଇଚ୍ଛା ବକ୍ତବ୍ୟ ଦେବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି କହିଛନ୍ତି ।

ସୂଚନାଯୋଗ୍ୟ, ପ୍ରକୃତ ଘଟଣା କ’ଣ ତାହା ଆମେ ମୂଳ ଖବରରେ ତଥ୍ୟ ପ୍ରମାଣ ସହ ପ୍ରଦାନ କରିଛୁ । ସରକାରୀ ନଥିପତ୍ର ଆଧାରରେ ହିଁ ଏହି ଖବର ପ୍ରକାଶ କରିଛୁ । ବିଜେଡି ରାଜନୈତିକ ଦୃଷ୍ଟିରୁ ରାଜସ୍ୱମନ୍ତ୍ରୀଙ୍କୁ ଟାର୍ଗେଟ୍ କରିପାରନ୍ତି, ମାତ୍ର ଶଙ୍ଖ ଭବନକୁ ନେଇ ଦିଆଯାଇଥିବା ତଥ୍ୟ ଉପରେ ବିଭ୍ରାନ୍ତିକର ମନ୍ତବ୍ୟରୁ କ୍ଷାନ୍ତ ହେବା ଦରକାର ।

ଦେବୀ ମିଶ୍ର କିସମ ସଡ଼କକୁ ଉପଗଳି ଦର୍ଶାଇ ଦୋଷ ଖସାଇବାକୁ ଉଦ୍ୟମ କରିଛନ୍ତି । ଦେବୀ ବାବୁଙ୍କ ଭଳି ଜଣେ ବରିଷ୍ଠ ନେତା ଏହା କହି ଲୋକଙ୍କୁ ଭୂଆଁ ବୁଲାଇବାକୁ ଉଦ୍ୟମ କରିବା ଦୁର୍ଭାଗ୍ୟଜନକ । କାରଣ ଉଭୟ ପକ୍ଷ ( ବିଜେଡି ଏବଂ ସାଧାରଣ ପ୍ରଶାସନ ବିଭାଗ)ଙ୍କ ଦସ୍ତଖତରେ ହୋଇଥିବା ଲିଜ୍ ଡିଡ୍ ରେ ସଂପୃକ୍ତ ଜାଗା ୭୯୮(ପାର୍ଟ)ଟିର କିସମ ସଡ଼କ ବୋଲି ସ୍ପଷ୍ଟ ଉଲ୍ଲେଖ ରହିଛି । ସରକାରଙ୍କ ଆଲଟ୍ମେଣ୍ଟ ଅର୍ଡରରେ ମଧ୍ୟ ସମାନ ତଥ୍ୟ ରହିଛି । ବିଜେଡି ପକ୍ଷରୁ ଆବେଦନକାରୀ ପ୍ରଣବ ପ୍ରକାଶ(ବବି) ଦେଇଥିବା ଆଫିଡେଭିଟ୍ ରେ ବି ଜାଗାର କିସମ ସଡ଼କ ବୋଲି ଉଲ୍ଲେଖ ରହିଛି । ଦେବୀ ବାବୁ ସଂପୃକ୍ତ ଜାଗାକୁ ଉପଗଳି ଦର୍ଶାଉଥିବାରୁ ତାହାହେଲେ ଲିଜ୍ ଡିଡ୍, ଆଲଟମେଣ୍ଟ ଅର୍ଡର ଏବଂ ଆଫିଡେଭିଟ୍ କ’ଣ ଭୁଲ୍?

ସେହିଭଳି ୧୦୦ କୋଟିର ସମ୍ପତ୍ତିକୁ ୧୨ କୋଟିରେ ଦିଆଯିବା କ’ଣ ମିଛ? ଏକ ବେସରକାରୀ ଅନୁଷ୍ଠାନକୁ ସରକାରୀ ଜମି ଲିଜ୍ ପ୍ରଦାନରେ ବେଞ୍ଚ ମାର୍କ ଭାଲୁ୍ୟ ଲାଗୁ ହେବା ଆଇନସମ୍ମତ କି? ଓଡ଼ିଶା ଲ୍ୟାଣ୍ଡ ସେଟଲମେଣ୍ଟ(ସେକେଣ୍ଡ ଆମେଣ୍ଡମେଣ୍ଟ), ରୁଲ୍ ୨୦୨୦ର ଧାରା-୫(୨) ତାହାହେଲେ କ’ଣ? କ୍ୱାର୍ଟର୍ସ ମୂଲ୍ୟାଙ୍କନ ଆର ଆଣ୍ଡ ବି ଏକଜ୍ୟୁଟିଭ୍ ଇଞ୍ଜିନିୟରଙ୍କ ଦ୍ୱାରା ହେବା ଆଇନସିଦ୍ଧ କି? ସରକାରଙ୍କ ବିନା ଅନୁମୋଦନରେ ସଂପୃକ୍ତ ଜାଗାର ମୂଲ୍ୟ ନିର୍ଦ୍ଧାରଣ ହୋଇନାହିଁ କି? ଧାର୍ଯ୍ୟ ମୂଲ୍ୟରେ ବିଜେଡିକୁ ପ୍ଲଟ୍ ଦିଆଯିବ ନା ନାହିଁ ସେଥିପାଇଁ ମୁଖ୍ୟମନ୍ତ୍ରୀଙ୍କ ଅନୁମୋଦନ ନିମନ୍ତେ ଫାଇଲ୍ ପଠା ଯାଇଥିଲା କି?

ବିଜେଡି ଏହାର ଉତ୍ତର ରଖୁ ।