ଭୁବନେଶ୍ୱର: ବିଜେଡ଼ିର ବରିଷ୍ଠ ନେତ୍ରୀ ତଥା ସରକାରୀ ମୁଖ୍ୟ ସଚେତକ ପ୍ରମିଳା ମଲ୍ଲିକଙ୍କ ଉପରେ ବାଜିଛି ନିର୍ବାଚନ କମିସନଙ୍କ ଛାଟ । ପଞ୍ଚାୟତ ନିର୍ବାଚନ ପ୍ରଚାର ମଇଦାନରୁ ତାଙ୍କୁ ୪୮ ଘଣ୍ଟା ପାଇଁ ବାରଣ କରାଯାଇଛି । ଆସନ୍ତାକାଲି ଅର୍ଥାତ ଫେବ୍ରୁଆରୀ ୧୪ ତାରିଖ ଦିନ ୧୦ଟାରୁ ତାଙ୍କ ପାଇଁ ଏହି କଟକଣା ଲାଗୁ ହୋଇଛି । ନିର୍ବାଚନ କମିସନ ସଚିବ ରବୀନ୍ଦ୍ର ନାଥ ସାହୁ କମିସନଙ୍କ ନିଦେ୍ର୍ଦଶ ସମ୍ପର୍କରେ ଯାଜପୁର ଜିଲ୍ଲାପାଳଙ୍କୁ ଏହା ଜଣାଇ ଦିଆଯାଇଛି ।
ଶ୍ରୀମତୀ ମଲ୍ଲିକଙ୍କ ଆଚରଣକୁ ନିର୍ବାଚନ କମିସନର ନାପସନ୍ଦ କରିବା ସହ ନିର୍ବାଚନ ପ୍ରଚାର ମୈଦାନରୁ ୪୮ ଘଣ୍ଟା ପାଇଁ ନିବୃତ୍ତ ରଖିଛନ୍ତି । ଏହି ସମୟରେ ସେ କୌଣସି ଗଣମାଧ୍ୟମରେ ବିବୃତି ଦେଇପାରିବେନି କି ସୋସିଆଲ୍ ମିଡ଼ିଆରେ ପ୍ରଚାର କରିପାରିବେ ନାହିଁ । କେବଳ ନିଜ ନିର୍ବାଚନମଣ୍ଡଳୀ ବିଝାଂରପୁର ନୁହେଁ, ରାଜ୍ୟର କୌଣସି ଜାଗାରେ ବି ସେ ପ୍ରଚାର କରିପାରିବେ ନାହିଁ । ଏହା ଉପରେ ନଜର ରଖିବାକୁ ଯାଜପୁର ଜିଲ୍ଲାପାଳଙ୍କୁ କମିଶନର ନିଦେ୍ର୍ଦଶ ଦେଇଛନ୍ତି ।
ସୂଚନାଯୋଗ୍ୟ, ଯାଜପୁର ଜିଲ୍ଲା ପରିଷଦ ଜୋନ୍-୨୭ ରେ ପ୍ରଚାର କଲା ବେଳେ ଶ୍ରୀମତୀ ମଲ୍ଲିକ ଗତ ଗୁରୁବାର ଦିନ ବିବାଦୀୟ କଥା କହିଥିଲେ । ବିଜେଡ଼ି ପ୍ରାର୍ଥୀଙ୍କୁ ଭୋଟ ନ ଦେଲେ ମାସିକ ଭତ୍ତା, କଣ୍ଟ୍ରୋଲ୍ ଚାଉଳ ଦିଆଯିବ ନାହିଁ କି ସରକାରୀ ଯୋଜନାରେ ପକ୍କା ଘର ମିଳିବ ନାହିଁ ବୋଲି ଧମକ ଦେଇଥିଲେ । ସୋସିଆଲ୍ ମିଡ଼ିଆ ସମେତ ବିଭିନ୍ନ ଗଣମାଧ୍ୟମରେ ଏହା ବହୁଳ ପ୍ରଚାରିତ ହେବା ପରେ ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଥିଲା । ଆଦର୍ଶ ଆଚରଣ ବିଧିର ଏହା ଖୋଲା ଉଲ୍ଲଂଘନ ବୋଲି କୁହାଯାଇଥିଲା ।
ରାଜ୍ୟ ନିର୍ବାଚନ କମିସନ ଏହାକୁ ଗୁରୁତ୍ୱର ସହ ଗ୍ରହଣ କରିବା ପରେ କମିସନରଙ୍କ ନିଦେ୍ର୍ଦଶରେ ଯାଜପୁର ଜିଲ୍ଲାପାଳ ଶ୍ରୀମତୀ ମଲ୍ଲିକଙ୍କୁ ସୋ କଜ୍ ବା କାରଣ ଦର୍ଶାଅ ନୋଟିସ୍ ଜାରି କରିଥିଲେ । ତେବେ ତାଙ୍କ ଉତ୍ତର ସନ୍ତୋଷଜନକ ନ ଥିବାରୁ କମିସନଙ୍କ ପକ୍ଷରୁ ଏହି କାର୍ଯ୍ୟାନଷ୍ଠାନ ନିଆଯାଇଛି ।
