ଭୁୁବନେଶ୍ୱର: ମହିଳାମାନଙ୍କ ସମ୍ମାନ ଓ ଅଧିକାର ରକ୍ଷା ପାଇଁ ଏବେ ସବୁଠାରୁ ବେଶୀ ଚିନ୍ତିତ ଅଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଲୋକସଭାରେ ସମ୍ବିଧାନ ସଂଶୋଧନ ବିଲ୍ କାଟ୍ ଖାଇବା ପରେ ଦେଶବାସୀଙ୍କୁ ସମ୍ବୋଧନ କରି ବିରୋଧୀ ଦଳଙ୍କୁ ପାପୀ ବୋଲି କହିଛନ୍ତି । ବିଧାନସଭା ଓ ଲୋକସଭାରେ ମହିଳାଙ୍କ ପାଇଁ ୩୩% ସ୍ଥାନ ସଂରକ୍ଷଣକୁ ପ୍ରସଙ୍ଗ କରି ବିରୋଧୀ ଦଳଙ୍କୁଏ ଦେଶର ମହିଳାମାନେ କ୍ଷମା କରିବେନି ବୋଲି ପ୍ରଧାନମନ୍ତ୍ରୀ କହିଛନ୍ତି । ଏଠି ଆମର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଧ୍ୟ ବିରୋଧୀ ଦଳଙ୍କୁ ଭୀଷଣ ଗାଳି କରିଛନ୍ତି । ମହିଳାମାନଙ୍କ ସୁରକ୍ଷା ଓ ମର୍ଯ୍ୟାଦା ରକ୍ଷା ପାଇଁ ତାଙ୍କ ସରକାରର ପ୍ରତିବଦ୍ଧତା ଜଣାଇଛନ୍ତି । ଏଭଳି ଏକ ସମୟରେ ନୟାଗଡ଼ ଜିଲ୍ଲା ଫତେଗଡ଼ରୁ ଆସିଥିବା ଘଟଣାଟି ସମସ୍ତଙ୍କୁ ଲଜ୍ଜାରେ ଜାଳି ଦେଇଛି । ଲୋକଙ୍କ ସୁରକ୍ଷା ଦାୟିତ୍ୱରେ ଥିବା ଜଣେ ପୁଲିସ ଉଚ୍ଚପଦସ୍ଥ ଅଧିକାରୀ(ଏସଡିପିଓ) ଜଣେ ନିରୀହ ମହିଳାଙ୍କୁ ମିଥ୍ୟା କେସ୍ ର ଭୟ ଦେଖାଇ ଶାରୀରିକ ସମ୍ପର୍କ ରଖିବାକୁ ବାଧ୍ୟ କରୁଥିବାର ଅଡିଓ ସୋସିଆଲ୍ ମିଡିଆରେ ଭାଇରାଲ୍ ହେଉଥିବା ବେଳେ ସଂପୃକ୍ତ ପୁଲିସ ବାବୁଙ୍କ ସୁରକ୍ଷା ପାଇଁ ପୁଲିସ କଳ ଲାଗିପଡ଼ିଛନ୍ତି । ଖୋଦ୍ ଶାସକ ଦଳର ସ୍ଥାନୀୟ ବିଧାୟକ ତାଙ୍କର ସୁରକ୍ଷା ଦାୟିତ୍ୱ ନେଇଥିବା ଚର୍ଚ୍ଚା ହେଉଛି ।
ଅଭିଯୋଗକାରିଣୀ ଡିଜିଙ୍କ ପାଖରେ ଫେରାଦ ହୋଇଥିଲେ ମଧ୍ୟ ଏସଡିପିଓ ସମ୍ପୂର୍ଣ୍ଣ ନିର୍ଭୟରେ ଭୁବନେଶ୍ୱରରେ ବସିଥିବାରୁ ଖଣ୍ଡପଡ଼ାରେ ଜନ ଅସନ୍ତୋଷ ତୀବ୍ର ହୋଇଛି । ଏସଡିପିଓଙ୍କ ବିରୋଧରେ କାର୍ଯ୍ୟାନୁଷ୍ଠାନ ନ ହେଲେ ସାଧାରଣ ଜନତା ରାସ୍ତା ଉପରକୁ ଓହ୍ଲାଇବେ ବୋଲି ଜଣାପଡ଼ିଛି ।
ଅଭିଯୁକ୍ତ ପୁଲିସ ବାବୁ ଜଣଙ୍କ ହେଲେ ମଦନ ମୋହନ ପ୍ରଧାନ । ଖଣ୍ଡପଡ଼ାର ଏସଡିପିଓ ଭାବେ କାର୍ଯ୍ୟରତ । ଫତେଗଡ଼ ଅଞ୍ଚଳର ପୀଡ଼ିତାଙ୍କ ଅଭିଯୋଗ ଅନୁଯାୟୀ, ଏକ ମାମଲାର ରଫାଦଫା ପାଇଁ ଏସଡିପିଓ ଶ୍ରୀ ପ୍ରଧାନ ତାଙ୍କୁ ହ୍ୱାଟସଆପ୍ ରେ ଅଶ୍ଲୀଳ ବାର୍ତ୍ତା ପଠାଇବା ସହ ବିଭିନ୍ନ ହୋଟେଲ ଓ ନିରୋଳା ଜାଗାକୁ ଖରାପ ଉଦ୍ଦେଶ୍ୟ ରଖି ଡାକୁଥିଲେ । ଶାରୀରିକ ସମ୍ପର୍କ ନ ରଖିଲେ ତାଙ୍କ ସ୍ୱାମୀଙ୍କୁ ମିଥ୍ୟା ମାମଲାରେ ଫସାଇ ଦେବାକୁ ଧମକ ଦେଇଥିଲେ । କେବଳ ସେତିକି ନୁହେଁ ମିଥ୍ୟା ମାମଲାରେ ପୀଡ଼ିତାଙ୍କୁ ରାତି ସାରା ଥାନାରେ ଅଟକ ରଖି ନିଜ ଉଦ୍ଦେଶ୍ୟ ପୂରଣ କରିବେ ବୋଲି ମଧ୍ୟ ଧମକ ଦେଇଥିଲେ । ଭୟଭୀତ ହୋଇ ପୀଡ଼ିତା ଜଣଙ୍କ ଡିଜିଙ୍କ ଦ୍ୱାରସ୍ଥ ହୋଇଥିଲେ । ଘଟଣାକୁ ସପ୍ତାହେ ବିତିଯାଇଥିଲେ ମଧ୍ୟ ଏ ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ହୋଇନାହିଁ । ଓଲଟି ଅଭିଯୋଗ ପ୍ରତ୍ୟାହାର ପାଇଁ ପୀଡ଼ିତାଙ୍କ ଉପରେ ବିଭିନ୍ନ ଆଡୁ ଚାପ ପଡୁଥିବା ତାଙ୍କ ପରିବାର ଲୋକଙ୍କଠାରୁ ଜଣାପଡ଼ିଛି । ସ୍ଥାନୀୟ ବିଧାୟକ ଓ ତାଙ୍କ କର୍ମୀମାନଙ୍କର ମତିଗତି ଦେଖି ସେମାନେ ଆହୁରି ଭୟଭୀତ ହୋଇ ପଡ଼ିଛନ୍ତି ।
କେବଳ ଏହି ମହିଳାଙ୍କ ଅଭିଯୋଗ ନୁହେଁ, ଏସଡିପି ଭାବେ କାର୍ଯ୍ୟରେ ଯୋଗଦେବା ପରଠାରୁ ମଦନ ପ୍ରଧାନଙ୍କ ବିରୋଧରେ ସ୍ଥାନୀୟ ଅଞ୍ଚଳବାସୀଙ୍କ ପକ୍ଷରୁ ବିଭିନ୍ନ ସମୟରେ ୧୦ରୁ ଅଧିକ ଅଭିଯୋଗ ଖଣ୍ଡପଡ଼ା ଓ ଫତେଗଡ଼ ଥାନାକୁ ଆସିଛି । ପୁଲିସ ପୋଷାକରେ ତାଙ୍କୁ ଶାସକ ଦଳର ଏଜେଣ୍ଟ ବୋଲି ସମସ୍ତେ ଜାଣନ୍ତି । ତାଙ୍କର ଦୌରାତ୍ମ୍ୟ ପ୍ରବଳ । ବିଜେଡିର ସରପଞ୍ଚ ଓ ସମିତି ସଭ୍ୟମାନଙ୍କୁ ବିଜେପିକୁ ଆଣିବା ପାଇଁ ସେ ମିଥ୍ୟା ମାମଲାର ଧମକ ଦେଉଥିବା ବହୁ ଅଭିଯୋଗ ଆସିଛି । ମହିଳାଙ୍କୁ ଅସଦାଚରଣ ଅଭିଯୋଗ ପୂର୍ବରୁ ମଧ୍ୟ ଅଛି ।
ତାଙ୍କ ବିରୋଧରେ ଦୁର୍ନୀତି ଅଭିଯୋଗ ବି ଲମ୍ବା । ଖଣ୍ଡପଡ଼ା ନିର୍ବାଚନମଣ୍ଡଳୀର ସିଧାମୂଳା, ୱାଲପୁର ଏବଂ ପଥରଚକଡ଼ା ବାଲିଘାଟରୁ ମାସକୁ ୨୦ ଲକ୍ଷ ଟଙ୍କା ବଟି ନେଉଥିବା ଅଭିଯୋଗ ହୋଇଛି । ଥାନା ଅଧିକାରୀଙ୍କୁ ନ ଜଣାଇ ନିଜେ ରାତି ପାଟ୍ରୋଲିଂ ଯିବା ପଛରେ ତାଙ୍କର ମନ୍ଦ ଉଦ୍ଦେଶ୍ୟ ଥିବା ତଳିଆ କର୍ମଚାରୀଙ୍କଠାରୁ ଜଣାପଡ଼ିଛି । ନିକଟରେ ଖଣ୍ଡପଡ଼ାଠାରେ ମହାବୀର କମ୍ପାନୀର ଏକ ଗୁଟକା ବୋଝେଇ ଗାଡ଼ି ଡ୍ରାଇଭରଠାରୁ ୧ ଲକ୍ଷ ଟଙ୍କା ବଟି ନେଇଥିବା ଅଭିଯୋଗ ହୋଇଛି ।
ମହିଳାଙ୍କ ଉପରେ ଖରାପ ଦୃଷ୍ଟି ପକାଇବା, ଦୁର୍ନୀତିରେ ବୁଡ଼ି ରହିବା ଏବଂ ରାଜନୈତିକ ଅସ୍ତ୍ର ହୋଇ ଆତଙ୍କ ସୃଷ୍ଟି କରୁଥିବା ଏହି ପୁଲିସ ବାବୁ ସ୍ଥାନୀୟ ଅଞ୍ଚଳର ଶାସକ ଦଳର ଜଣେ ପ୍ରଭାବଶାଳୀ ନେତାଙ୍କର ସମ୍ପର୍କୀୟ ବୋଲି କୁହାଯାଉଛି । ତାଙ୍କ ଉପରେ ବିଧାୟକଙ୍କ ସମେତ ବଡ଼ ବଡ଼ ଲୋକଙ୍କର ଆଶୀର୍ବାଦ ଥିବାରୁ ତାଙ୍କର ଡର ନାହିଁ । ମହିଳା ମାମଲାରେ ଏସଡିପିଓଙ୍କ ସୁରକ୍ଷା ପାଇଁ ଉଦ୍ୟମ ଚାଲିଥିବାରୁ ପରିସ୍ଥିତି ବିସ୍ଫୋରକ ରୂପ ନେବାର ଆଶଙ୍କା ଦେଖାଦେଇଛି ।
