ଭୁବନେଶ୍ୱର: ମୋହନ ମାଝୀଙ୍କ ସରକାରରେ ବିଚିତ୍ର ବ୍ୟବସ୍ଥା । ଯୁକ୍ତ ଦୁଇ ପରୀକ୍ଷା ଫଳ ବାହାରିବା ପୂର୍ବରୁ ଯୁକ୍ତ ତିନି ନାମଲେଖା ଆବେଦନ ତାରିଖ ଶେଷ । ଗଣଶିକ୍ଷା ବିଭାଗରେ କ’ଣ ଘଟୁଛି, ଉଚ୍ଚଶିକ୍ଷା ବିଭାଗ ଜାଣିପାରୁନାହିଁ । ଉଭୟ ବିଭାଗ ମଧ୍ୟରେ ସାମାନ୍ୟତମ ସମନ୍ୱୟ ନାହିଁ । ଦାୟିତ୍ୱରେ ଥିବା ଅଧିକାରୀମାନେ ଆଖି କାନ ବୁଜି ନିଷ୍ପତ୍ତି ନେଉଛନ୍ତି । ବିଭାଗୀୟ ମନ୍ତ୍ରୀଙ୍କୁ ସେ ସମ୍ପର୍କରେ ଜଣାନାହିଁ । ଗଣମାଧ୍ୟମରେ ଖବର ଆସିବା ପରେ ଯାଇ ସମସ୍ତଙ୍କର ଚେତା ପଶିଛି ।
ଘଟଣାଟି ଯେତିକି ଗମ୍ଭୀର ସେତିକି ଆଶ୍ଚର୍ଯ୍ୟଜନକ ଆଉ ସେତିକି ଆମୋଦ ଦାୟକ ।
ରାଜ୍ୟ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଦ୍ୱାରା ପରିଚାଳିତ ଦ୍ୱାଦଶ ଶ୍ରେଣୀ ପରୀକ୍ଷାଫଳ ଏ ପର୍ଯ୍ୟନ୍ତ ପ୍ରକାଶ ପାଇନାହିଁ । ଅଥଚ ଯୁକ୍ତ ତିନି ନାମଲେଖା ପାଇଁ ଆବେଦନର ଆଜି(ମଙ୍ଗଳବାର) ଥିଲା ଶେଷ ତାରିଖ । ରାଜ୍ୟର ପ୍ରାୟ ୩ ଲକ୍ଷ ଛାତ୍ରଛାତ୍ରୀ ପରୀକ୍ଷାଫଳକୁ ଚାହିଁ ବସିଥିବା ବେଳେ ଏହି ବ୍ୟବସ୍ଥା ଅଭିଭାବକଙ୍କ ମୁଣ୍ଡରେ ଚଡ଼କ ପକାଇଥିଲା । ପିଲା ପାସ୍ କରିବ ନା ଫେଲ୍ ହେବ ଜଣା ନାହିଁ । ପାସ୍ କଲେ କେତେ ମାର୍କ ରଖିବ ଜଣାନାହିଁ । କେଉଁ ବିଷୟରେ ଅଧିକ ମାର୍କ ରଖିବ ଜଣାନାହିଁ । ତେଣୁ ପିଲା କିଭଳି ଆବେଦନ କରିବେ ଜାଣି ନ ପାରି ଅଭିଭାବକମାନେ ବିବ୍ରତ ହୋଇପଡ଼ିଥିଲେ ।
ସୂଚନାଥାଉକି, ୨୦୨୫-୨୬ ଶିକ୍ଷାବର୍ଷରେ ୧୦୫୩ ଡିଗ୍ରୀ କଲେଜର ୨ ଲକ୍ଷ ୭୩ ହଜାର ୭୮୯ ସିଟ୍ ପାଇଁ ନାମଲେଖା ହେଉଥିବା ବେଳେ ଏ ପର୍ଯ୍ୟନ୍ତ ମାତ୍ର ୧ ଲକ୍ଷ ୧୭ ହଜାର ୫୩୨ ଜଣ ଆବେଦନ କରିଛନ୍ତି । ଆବେଦନକାରୀ ଅଧିକାଂଶ ପିଲା ସିବିଏସଇର । କାରଣ ସିବିଏସଇ ବୋର୍ଡ ରେଜଲ୍ଟ ପ୍ରାୟ ୧୫ ଦିନ ତଳୁ ବାହାରି ଗଲାଣି । ମାତ୍ର ଓଡ଼ିଶା ବୋର୍ଡର ଅଧିକାଂଶ ଛାତ୍ରଛାତ୍ରୀ ଯୁକ୍ତ ତିନି ପଢ଼ିବାକୁ ଆବେଦନ କରୁଥିବା ବେଳେ ଉଚ୍ଚଶିକ୍ଷା ବିଭାଗ ସେମାନଙ୍କ କଥାକୁ ବିଚାରକୁ ନେଇ ନ ଥିଲା । ଯୁକ୍ତ ତିନି ପାଠ୍ୟକ୍ରମରେ ନାମଲେଖା ଦାୟିତ୍ୱରେ ଥିବା ଅଧିକାରୀମାନେ ସେୟାଡ଼କୁ ମୁଣ୍ଡ ନ ଖେଳାଇ ମେ ୨୦ ତାରିଖ ସୁଦ୍ଧା ଆବେଦନ କରିବାକୁ ଦିନ ଧାର୍ଯ୍ୟ କରିଥିଲେ । ଯାହା କି ଛାତ୍ରଛାତ୍ରୀ ଏବଂ ଅଭିଭାବକମାନଙ୍କୁ ଚିନ୍ତାରେ ପକାଇଥିଲା ।
ଗଣମାଧ୍ୟମରେ ଏହି ଖବର ପ୍ରକାଶ ପାଇଲା ପରେ ସରକାରଙ୍କ ଚେତା ପଶିଥିଲା । ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଏବଂ ଉଚ୍ଚଶିକ୍ଷା ମନ୍ତ୍ରୀ ସୂରଜ ସୂର୍ଯ୍ୟବଂଶୀ ମଧ୍ୟରେ କଥା ହୋଇଥିଲା । ନିଷ୍ପତ୍ତି ଅନୁଯାୟୀ, ଆସନ୍ତାକାଲି ଯୁକ୍ତ ଦୁଇ ପରୀକ୍ଷା ଫଳ ବାହାରିବ । ସେହିଭଳି ଯୁକ୍ତ ତିନି ଆବେଦନର ତାରିଖ ଅବଧି ଜୁନ୍ ୧ ତାରିଖକୁ ବୃଦ୍ଧି କରାଯାଇଛି ।
ତେବେ ଏଭଳି ଗୁରୁତର ଭୁଲ୍ ଭଟକା କରିଥିବା ଅଧିକାରୀମାନଙ୍କ ବିରୋଧରେ କ’ଣ କାର୍ଯ୍ୟାନୁଷ୍ଠାନ ହେଉଛି ତାହା ଦେଖିବାକୁ ବାକି ରହିଲା ।
