ରାଉରକେଲା/ଭୁବନେଶ୍ୱର: ଗାଁ ଉତ୍ସବ ଆଗରେ ବସି ଦେଖିବା ପାଇଁ ପିଲାଙ୍କ ଭିତରେ କଳି ହୁଏ । ପିଲେ ପିଟାପିଟି ହୁଅନ୍ତି । କୁକୁଡ଼ା ଲଢ଼େଇ କରନ୍ତି । ମାତ୍ର ଦୁଇଜଣ ବରିଷ୍ଠ କଂଗ୍ରେସ ନେତା ଆଗ ଚୌକିରେ ବସିବା ପାଇଁ ତଳେ ଗଡ଼ି ଗୋଇଠା, ମୁଥ ମରାମରି ହେବା ନିହାତି ଭାବେ ଲଜ୍ଜାକର ଘଟଣା । ଆଜି ରାଉରକେଲାରେ ଘଟିଥିବା ଏଭଳି ଘଟଣା ସାରା ରାଜ୍ୟରେ ଚର୍ଚ୍ଚାର ବିଷୟ ହୋଇଛି ।
ଘଟଣାଟି ଏମତି । ରାଉରକେଲା ଜିଲ୍ଲା କଂଗ୍ରେସ କାର୍ଯ୍ୟାଳୟରେ ଦଳ ପକ୍ଷରୁ ଆଜି ପୂର୍ବାହ୍ନରେ ଏକ ସାମ୍ବାଦିକ ସମ୍ମିଳନୀ ଡକାଯାଇଥିଲା । ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରିବା ପାଇଁ ନିର୍ଦ୍ଧାରିତ ସମୟ ପୂର୍ବରୁ ଅନ୍ୟ ନେତାମାନଙ୍କ ମଧ୍ୟରେ ଦଳର ଦୁଇ ବରିଷ୍ଠ ନେତା ସବିର ହୁସେନ ଓ ଉମେଶ ସରନ ସେଠାରେ ପହଞ୍ଚିଥିଲେ । ତେବେ ଆଗଧାଡ଼ିରେ ଖାଲିଥିବା ଗୋଟିଏ ଚଉକିରେ ବସିବା ପାଇଁ ସବିର ଓ ଉମେଶଙ୍କ ମଧ୍ୟରେ ଟଣାଓଟରା ଲାଗିଯାଇଥିଲା । ସେହି ଚଉକିକୁ ଛାଡ଼ିବା ପାଇଁ କେହି ରାଜି ନଥିଲେ । ଉଭୟଙ୍କ ମଧ୍ୟରେ ଠେଲାପେଲା କ୍ରମଶଃ ଭୟଙ୍କର ରୂପ ନେଇଥିଲା । ତଳେ ଗଡ଼ାଗଡ଼ି ହୋଇ ପରଷ୍ପରକୁ ବିଧା, ଗୋଇଠା ଓ ମୁଥ୍ ମରାମରି ହେଲେ ।
