ପାର୍ବଣରେ ଭକ୍ତଙ୍କୁ ଶ୍ରୀମନ୍ଦିର ମନା

ଭୁବନେଶ୍ୱର: କୋଭିଡ୍ କଟକଣା ମଧ୍ୟରେ ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନକୁ ସୁବ୍ୟବସ୍ଥିତ କରିବା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଏକ ସଂଶୋଧିତ ଏସଓପି ବା ନିଦେ୍ର୍ଦଶାବଳୀ ପ୍ରସ୍ତୁତ ହୋଇଛି । ଶ୍ରୀମନ୍ଦିର ମୁଖ୍ୟ ପ୍ରଶାସକ ଡକ୍ଟର କ୍ରିଷନ୍ କୁମାର ଆଜି ଏହାକୁ ସର୍ବସାଧାରଣଙ୍କ ନିମନ୍ତେ ଜାରି କରିଛନ୍ତି । ଅକ୍ଟୋବର ୧୫ ଅର୍ଥାତ ଆସନ୍ତାକାଲିଠାରୁ ଏହା କାର୍ଯ୍ୟକାରୀ ହେବ ।

ଅକ୍ଟୋବର ଓ ନଭେମ୍ବର ମାସରେ ବଡ଼ ପାର୍ବଣ ଦିନମାନଙ୍କରେ ଭକ୍ତଙ୍କ ଲାଗି ଶ୍ରୀମନ୍ଦିର ଦର୍ଶନ ବନ୍ଦ ରହିବ । ଭକ୍ତଙ୍କ ଗହଳି ସମ୍ଭାବନା ଦୃଷ୍ଟିରୁ ଏହି ନିଷ୍ପତ୍ତି ନିଆଯାଇଛି । ଏହାଦ୍ୱାରା ସମ୍ଭାବ୍ୟ କରୋନା ସଂକ୍ରମଣକୁ ଏଡାଯାଇପାରିବ ବୋଲି କୁହାଯାଇଛି ।

ଅକ୍ଟୋବର ୧୫ ପବିତ୍ର ଦଶହରା ଦିନ ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ ବନ୍ଦ ରହିବ । ୧୬ ତାରିଖ ଭଷାଣୀରେ ସକାଳୁ ୧୨ଟା ପର୍ଯ୍ୟନ୍ତ ଭକ୍ତମାନେ ମହାପ୍ରଭୁଙ୍କ ଦର୍ଶନ କରିପାରିବେ । ଦିନ ୧୨ଟା ପରେ ଦର୍ଶନ ପାଇଁ କିନ୍ତୁ ଅନୁମତି ମିଳିବନି । ତେବେ ଅକ୍ଟୋବର ୨୦ କୁମାର ପୂର୍ଣ୍ଣମୀରେ ଭକ୍ତମାନେ ମହାପ୍ରଭୁଙ୍କ ଦର୍ଶନ କରିପାରିବେ ।

ନଭେମ୍ବର ମାସ ୪ ତାରିଖ ଦୀପାବଳି, ୧୫ ତାରିଖ ବଡ଼ ଏକାଦଶୀ ଏବଂ ୧୯ ତାରିଖ କାର୍ତ୍ତିକ ପୂର୍ଣ୍ଣମୀରେ ଭକ୍ତମାନଙ୍କ ପାଇଁ ଶ୍ରୀମନ୍ଦିର ବନ୍ଦ ରହିବ ।

ଦର୍ଶନ ସମୟ ପ୍ରତିଦିନ ସକାଳ ୭ଟାରୁ ରାତି ୯ଟା ପର୍ଯ୍ୟନ୍ତ ଶ୍ରୀମନ୍ଦିର ଖୋଲା ରହିବ । ତେବେ ରବିବାର ଦିନ ଶ୍ରୀମନ୍ଦିର ବନ୍ଦ ରହିବ । ସମ୍ଭାବ୍ୟ କରୋନା ସଂକ୍ରମଣ ଦୃଷ୍ଟିରୁ ଶ୍ରୀମନ୍ଦିର ପରିସରକୁ ସେଦିନ ସାନିଟାଇଜ୍ କରାଯିବ ।

ସକାଳ ୭ଟାରୁ ଭକ୍ତମାନେ ଧାଡ଼ି ବ୍ୟବସ୍ଥାରେ ଯାଇ ଦର୍ଶନ କରିବେ । ମନ୍ଦିର ପରିସରର ଉତ୍ତର-ପୂର୍ବ ପାଶ୍ୱର୍ରେ ଥିବା ଜୋତା ଷ୍ଟାଣ୍ଡର ବିପରୀତ ବ୍ୟାରିକେଡ ଦେଇ ପ୍ରବେଶ କରିବେ । ଭକ୍ତମାନେ ସିଂହଦ୍ୱାର ଦେଇ ପ୍ରବେଶ କରିବେ । ଦର୍ଶନ ସାରି ଉତ୍ତର ଦ୍ୱାର ଦେଇ ବାହାରିବେ ।

ଶ୍ରୀମନ୍ଦିର ପରିସରରେ କୋଭିଡ୍ କଟକଣା କଡ଼ାକଡ଼ି ପାଳନ କରାଯିବ । ଭକ୍ତମାନଙ୍କ ଲାଗି ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି । ମନ୍ଦିର ପ୍ରବେଶ ପୂର୍ବରୁ ହାତକୁ ଭଲ ଭାବେ ସଫା କରି ସାନିଟାଇଜ୍ କରିବାକୁ ପଡ଼ିବ । ସାମାଜିକ ଦୂରତା ରଖିବା ସହ ଶ୍ରୀମନ୍ଦିର ଭିତରେ କୌଣସି ମୂର୍ତ୍ତି କିମ୍ବା ପ୍ରତିମାଙ୍କୁ ଛୁଇଁବା ମନା କରାଯାଇଛି ।

ଶ୍ରୀମନ୍ଦିର ପରିସରରେ ତମାଖୁ ସେବନକୁ ସମ୍ପୂର୍ଣ୍ଣ ନିଷେଧ କରାଯାଇଛି । ପାନଛେପ ପକାଇଲେ ୫୦୦ ଟଙ୍କା ଜୋରିମାନା ଦେବାକୁ ପଡ଼ିବ । ସେହିଭଳି ମନ୍ଦିର ଭିତରକୁ ଭକ୍ତମାନେ ପଲିଥିନ୍ ବ୍ୟାଗ୍ ନେଇପାରିବେ ନାହିଁ । ନେଲେ ୧୦୦ ଟଙ୍କା ଜୋରିମାନା ପଡ଼ିବ ।

ଆନନ୍ଦବଜାର ଏବଂ ମନ୍ଦିର ପରିସରରେ ଭକ୍ତମାନେ ମହାପ୍ରସାଦ ସେବନ କରିପାରିବେ ନାହିଁ । ତେବେ ଭକ୍ତମାନେ ସାଙ୍ଗରେ ମହାପ୍ରସାଦ ନେଇପାରିବେ ।

ପୂର୍ବପରି ଅଲଗା ଅଲଗା ଭକ୍ତଙ୍କ ଦର୍ଶନ ପାଇଁ ପୃଥକ୍ ଧାଡ଼ି ବ୍ୟବସ୍ଥା କରାଯିବ । ଯାନବାହାନଗୁଡ଼ିକ ଜଗନ୍ନାଥ ବଲ୍ଲଭ ମଠ ପରିସର କିମ୍ବା ଅନ୍ୟ ଉଦ୍ଦିଷ୍ଟ ସ୍ଥାନରେ ପାର୍କିଂ କରିବେ ।

କୋଭିଡ୍ କଟକଣା ସମ୍ପୂର୍ଣ୍ଣ ଭାବେ ଜାରି ରହିଥିବାରୁ ମହାପ୍ରଭୁଙ୍କ ଦର୍ଶନ ପାଇଁ ଆସୁଥିବା ଭକ୍ତମାନେ ଦୁଇଟି ଯାକ ଡୋଜ୍ ଟିକା କିମ୍ବା କୋଭିଡ୍ ନେଗେଟିଭ୍ ପ୍ରମାଣପତ୍ର(ଆରଟିପିସିଆର) ଦେଖାଇବାକୁ ପଡ଼ିବ । ୯୬ ଘଣ୍ଟା ମଧ୍ୟରେ ଏହି ଟେଷ୍ଟ ହୋଇଥିବା ଦରକାର ।