ଭୁବନେଶ୍ୱର: ତରୁଣ ପାଣ୍ଡେ ଝାରସୁଗୁଡ଼ାରୁ କଂଗ୍ରେସ ପ୍ରାର୍ଥୀ ହୋଇଛନ୍ତି । ଏଆଇସିସି ପକ୍ଷରୁ ଆଜି ତାଙ୍କ ନାଁ ଘୋଷଣା କରାଯାଇଛି । ପିସିସି ପକ୍ଷରୁ ତରୁଣଙ୍କ ସମେତ ୩ ଜଣିଆ ସମ୍ଭାବ୍ୟ ପ୍ରାର୍ଥୀ ତାଲିକା ଏଆଇସିସି ଙ୍କ ପାଖକୁ ପଠାଯାଇଥିଲା । ସଭାପତି ମଲ୍ଲିକାର୍ଜୁନେ ଖଡ଼ଗେ ତରୁଣଙ୍କ ପ୍ରାର୍ଥୀତ୍ୱ ଉପରେ ମୋହର ମାରିଥିଲେ ।
ତରୁଣ ହେଉଛନ୍ତି ପୂର୍ବତନ ବିଧାୟକ ବୀରେନ୍ଦ୍ର ପାଣ୍ଡେଙ୍କ ପୁଅ । ବୀରେନ୍ଦ୍ର ଏକଦା କଂଗ୍ରେସର ଜନପ୍ରିୟ ନେତା ଥିଲେ । ୧୯୮୦, ୧୯୮୫ ଏବଂ ୧୯୯୫ ରେ କଂଗ୍ରେସ ଟିକେଟରେ ଝାରସୁଗୁଡ଼ା ଆସନରୁ ବିଧାନସଭାକୁ ନିର୍ବାଚିତ ହୋଇଥିଲେ ।
ତାଙ୍କ ପରେ କଂଗ୍ରେସ ପ୍ରାର୍ଥୀ ଭାବେ ୨୦୦୯ ଏବଂ ୨୦୧୪ ରେ ନବ ଦାସ ଝାରସୁଗୁଡ଼ା ଆସନରୁ ନିର୍ବାଚିତ ହୋଇଥିଲେ । ୨୦୧୯ ନିର୍ବାଚନ ବେଳେ ନବ ଦାସ ବିଜେଡିରେ ଯୋଗଦେଇ ପ୍ରାର୍ଥୀ ହୋଇଥିଲେ ଏବଂ ଜିତିଥିଲେ । କଂଗ୍ରେସରୁ ମହେନ୍ଦ୍ର ନାଏକ ପ୍ରାର୍ଥୀ ହୋଇ ମାତ୍ର ୧୮, ୮୨୩ ଖଣ୍ଡ ଭୋଟ ପାଇଥିଲେ । ବିଜେପି ଦ୍ୱିତୀୟ ସ୍ଥାନରେ ରହିଥିଲା ।
ତେବେ ନବ ଦାସଙ୍କ ବିୟୋଗ ଯୋଗୁଁ ଅନୁଷ୍ଠିତ ଏହି ଉପନିର୍ବାଚନରେ କଂଗ୍ରେସ ତରୁଣଙ୍କୁ ପ୍ରାର୍ଥୀ କରି ତାଙ୍କ ବାପାଙ୍କ ପୂର୍ବ ଲୋକପ୍ରିୟତାକୁ ଭରସା କରିଛି । ଏଥିସହ ୨୦୦୯ ଏବଂ ୨୦୧୪ ନିର୍ବାଚନରେ ନବ ଦାସଙ୍କ ଘନିଷ୍ଠ ସହଯୋଗୀ ଭାବେ ତରୁଣ କାର୍ଯ୍ୟ କରିଥିବାରୁ ନିଜସ୍ୱ ଅଭିଜ୍ଞତା ରହିଛି ।
ସେପଟେ ବିଜେପି ପକ୍ଷରୁ ପ୍ରାର୍ଥୀ ଘୋଷଣା ବାକି ଅଛି । ଖୁବ୍ ଶୀଘ୍ର ପ୍ରାର୍ଥୀ ଘୋଷଣା ହେବ ବୋଲି ବିଧାୟକ ସୁବାସ ପାଣିଗ୍ରାହୀ ଆଜି ଗଣମାଧ୍ୟମକୁ କହିଥିଲା ବେଳେ ଟଙ୍କଧର ତ୍ରିପାଠୀଙ୍କ ନାଁ ଚୂଡ଼ାନ୍ତ ହୋଇଥିବା ଇସାରା କରିଛନ୍ତି । ତେବେ ଦଳ ପକ୍ଷରୁ ଏ ନେଇ ସ୍ପଷ୍ଟତା ଆସିନାହିଁ ।
ସୂଚନାଥାଉକି, ପୂର୍ବରୁ ଦିବଙ୍ଗତ ନବ ଦାସଙ୍କ ଝିଅ ଦୀପାଳି ଦାସଙ୍କୁ ବିଜେଡି ପ୍ରାର୍ଥୀ ଘୋଷଣା କରିସାରିଛି । ଆସନ୍ତାକାଲି ଉପନିର୍ବାଚନ ପାଇଁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇବ । ମନୋନୟନପତ୍ର ଦାଖଲର ଶେଷ ତାରିଖ ଏପ୍ରିଲ ୨୦ ରହିଛି । ମେ’ ୧୦ ରେ ଭୋଟ ହେବ ।
