ନୂଆଦିଲ୍ଲୀ/ଭୁବନେଶ୍ୱର: କୋଭିଡ୍ ମହାମାରୀ ଯୋଗୁଁ ଦେଶର ବିପର୍ଯ୍ୟସ୍ତ ଅର୍ଥନୀତିରେ ସୁଧାର ଆଣିବାକୁ ଅର୍ଥମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ ବଜେଟ୍ ରେ ଅନେକ ପଦକ୍ଷେପ ନେଇଛନ୍ତି । କୃଷି, ଭିତ୍ତିଭୂମି ଏବଂ ସ୍ୱାସ୍ଥ୍ୟସେବା କ୍ଷେତ୍ରରେ ବ୍ୟାପକ ବ୍ୟୟବରାଦ ସହ ଆତ୍ମନିର୍ଭର ଭାରତର ସଂକଳ୍ପ ଦୋହରାଇଛନ୍ତି । ତେବେ ଆୟକର କ୍ଷେତ୍ର ଅପରିବର୍ତ୍ତି ରହିବା ସହ କରଦାତାଙ୍କ ପାଇଁ କୌଣସି ରିହାତି ନ ଥିବାରୁ ସେମାନଙ୍କୁ ନିରାଶ ହେବାକୁ ପଡ଼ିଛି । ଦରଦାମ ନିୟନ୍ତ୍ରଣ ପାଇଁ ଅର୍ଥମନ୍ତ୍ରୀ ଠୋସ୍ ପଦକ୍ଷେପ ଘୋଷଣା କରିନାହାନ୍ତି । ମୋଟାମୋଟି ଦେଖିଲେ, ନିମ୍ନ ମଧ୍ୟବିତ୍ତଙ୍କୁ ବଜେଟ୍ ବିଶେଷ ଖୁସି ଦେଇପାରିନାହିଁ ।
କରୋନା ମାଡ଼ରେ ବିଶେଷ କ୍ଷତିଗ୍ରସ୍ତ ମଧ୍ୟବିତ୍ତ/ନିମ୍ନ ମଧ୍ୟବିତ୍ତଙ୍କ ପକେଟରେ ଅଧିକ ଅର୍ଥ ଦେବାକୁ ଅର୍ଥମନ୍ତ୍ରୀ ଆୟକର ସୀମା ବୃଦ୍ଧି କରିବେ ବୋଲି ଆଶା କରାଯାଉଥିଲା । ମାତ୍ର ଆୟକର ସୀମାରେ କୌଣସି ପରିବର୍ତ୍ତନ ହୋଇନାହିଁ । ପୂର୍ବଭଳି ୭ଟି ସ୍ଲାବ୍ ରେ ଆୟକର ପୈଠ ହେବ । ଏକମାତ୍ର, ୭୫ ବର୍ଷରୁ ଅଧିକ ବୟସର ବ୍ୟକ୍ତି ଯେଉଁମାନେ ପେନସନ ପାଉଛନ୍ତି ଏବଂ ସୁଧରୁ ଆୟ ଅଛି ସେମାନଙ୍କୁ ଆୟକର ରିଟର୍ଣ୍ଣ ଦାଖଲ କରିବାକୁ ପଡ଼ିବ ନାହିଁ । ଅର୍ଥାତ ଆୟକର ଭାରରୁ ସେମାନେ ମୁକ୍ତ ରହିବେ ।
ପେଟ୍ରୋଲ୍ ଉପରେ ୨ ଟଙ୍କା ୫୦ ଏବଂ ଡିଜେଲ୍ ଉପରେ ୪ ଟଙ୍କା କୃଷି ସେସ୍ ଘୋଷଣା କରିଛନ୍ତି ଅର୍ଥମନ୍ତ୍ରୀ । ତେବେ ଏହା ପେଟ୍ରୋଲ୍ ଓ ଡିଜେଲ୍ ର ଦର ବୃଦ୍ଧି ଘଟାଇବ ନାହିଁ ବୋଲି ସୀତାରମଣ ଭରସା ଦେଇଛନ୍ତି ।
ବଜେଟ୍ ରେ ଆତ୍ମନିର୍ଭର ଭାରତକୁ ଧ୍ୟାନରେ ରଖି କୃଷି, ସ୍ୱାସ୍ଥ୍ୟସେବା ଏବଂ ଭିତ୍ତିଭୂମି ବିକାଶକୁ ସର୍ବାଗ୍ରରେ ଗୁରୁତ୍ୱ ଦିଆଯାଇଛି ।
ସ୍ୱାସ୍ଥ୍ୟସେବା କ୍ଷେତ୍ରରେ ଖର୍ଚ୍ଚ ପରିମାଣ ୧୩୭% ବୃଦ୍ଧି କରାଯାଇଛି । ଯାହାର ଆକାର ରହିଛି ୨.୨୩ ଲକ୍ଷ କୋଟି ଟଙ୍କା । ସେଥିମଧ୍ୟରୁ ୬୪ ହଜାର କୋଟି ପିଏମ୍ ଆତ୍ମନିର୍ଭର ସ୍ୱାସ୍ଥ୍ୟ ଯୋଜନାରେ ଖର୍ଚ୍ଚ ହେବ । କୋଭିଡ୍ ଟିକା ପାଇଁ ୩୫,୪୦୦ କୋଟି ଟଙ୍କା ବ୍ୟୟବରାଦ କରାଯାଇଛି । ମିଶନ ପୋଷଣ ୨.୦ରୁ ଶୁଭାରମ୍ଭ କରାଯାଇଥିବା ବେଳେ ୧୭ ହଜାର ଗ୍ରାମ୍ୟ ସ୍ୱାସ୍ଥ୍ୟକେନ୍ଦ୍ର ନିର୍ମାଣ ଲକ୍ଷ୍ୟ ରଖାଯାଇଛି । ୧୧ ହଜାର ସହରାଞ୍ଚଳ ସ୍ୱାସ୍ଥ୍ୟ ଓ ୱେଲନେସ୍ ସେଣ୍ଟର ଏବଂ ସବୁ ଜିଲ୍ଲାରେ ଇଣ୍ଟିଗ୍ରେଟେଡ ପବ୍ଲିକ୍ ହେଲଥ ଲାବ୍ ପ୍ରତିଷ୍ଠା ହେବ ।
କୃଷି କ୍ଷେତ୍ରରେ ଚାଷୀ ଋଣ ବାବଦରେ ୧୬.୫ ଲକ୍ଷ କୋଟି ଟଙ୍କାର ବ୍ୟବସ୍ଥା କରାଯାଇଛି । ସହରାଞ୍ଚଳ ଜଳଜୀବନ ମିଶନରେ ୨.୮୭ ଲକ୍ଷ କୋଟି ଖର୍ଚ୍ଚ କରାଯାଇ ୨.୮୬ କୋଟି ଘରକୁ ସାମିଲ କରାଯିବ ।
ଭିତ୍ତିଭୂମି ଓ ଯୋଗାଯୋଗ କ୍ଷେତ୍ରରେ ମଧ୍ୟ ବ୍ୟାପକ ବ୍ୟୟବରାଦ କରାଯାଇଛି । ସଡ଼କ ମନ୍ତ୍ରଣାଳୟକୁ ୧.୧୮ କୋଟି ଟଙ୍କା ଆବଣ୍ଟନ କରାଯାଇଥିଲା ବେଳେ ରେଳ ମନ୍ତ୍ରଣାଳୟ ପାଇଁ ୧.୭ ଲକ୍ଷ କୋଟି ଏବଂ ସହରାଞ୍ଚଳ ପବ୍ଲିକ ବସ ଟ୍ରାନସପୋର୍ଟ ପାଇଁ ୧୮ ହଜାର କୋଟି ଟଙ୍କା ବ୍ୟୟ ବରାଦ କରାଯାଇଛି ।
ନିର୍ବାଚନ ହେବାକୁ ଥିବା ତାମିଲନାଡୁ, ପଶ୍ଚିମବଙ୍ଗ, ଆସାମ ଓ କେରଳକୁ ବଜେଟ୍ ରେ ସ୍ୱତନ୍ତ୍ର ଧ୍ୟାନ ଦିଆଯାଇଛି । ସେହିସବୁ ରାଜ୍ୟରେ ଜାତୀୟ ରାଜପଥ ନିର୍ମାଣ ଓ ସମ୍ପ୍ରସାରଣ ପାଇଁ ବିପୁଳ ଅର୍ଥ ବରାଦ କରାଯାଇଛି । ତାମିଲନାଡୁ ପାଇଁ ୧.୦୩ ଲକ୍ଷ କୋଟି, ପଶ୍ଚିମବଙ୍ଗ ପାଇଁ ୨୫ ହଜାର କୋଟି, କେରଳ ପାଇଁ ୬୫ ହଜାର କୋଟି ଏବଂ ଆସାମ ପାଇଁ ୩୪ ହଜାର କୋଟି ଟଙ୍କା ଖର୍ଚ୍ଚ ହେବ ।
ବଜେଟ୍ ରେ ଅନ୍ୟ ଏକ ଗୁରୁତ୍ୱପୂର୍ଣ୍ଣ ଘୋଷଣା ହେଉଛି ସ୍ୱେଚ୍ଛାକୃତ ଗାଡି ସ୍କ୍ରାପିଂ ପଲିସିର ଶୁଭାରମ୍ଭ । ୨୦ ବର୍ଷର ପୁରୁଣା ବ୍ୟକ୍ତିଗତ ଗାଡି ଏବଂ ୧୫ ବର୍ଷର ପୁରୁଣା ବ୍ୟବସାୟିକ ଗାଡିକୁ ଏହି ଯୋଜନାରେ ଅନ୍ତର୍ଭୁକ୍ତ କରାଯାଇଛି ।
ଆଗାମୀ ୩ ବର୍ଷରେ ଦେଶରେ ୭ଟି ଇନଭେଷ୍ଟମେଣ୍ଟ ଟେକ୍ସଟାଇଲ୍ ପାର୍କ ପ୍ରତିଷ୍ଠା ହେବ । ସେହିଭଳି ଉଜ୍ଜଳା ଯୋଜନାରେ ଅତିରିକ୍ତ ୧ କୋଟି ପରିବାର ସାମିଲ କରିବାକୁ ଲକ୍ଷ୍ୟ ରଖାଯାଇଛି । ରାଷ୍ଟ୍ରାୟତ୍ତ ବ୍ୟାଙ୍କକୁ ୨୦ ହଜାର କୋଟି ଯୋଗାଇ ଦିଆଯିବ ବୋଲି ଅର୍ଥମନ୍ତ୍ରୀ ଘୋଷଣା କରିଛନ୍ତି ।
ମୋବାଇଲ ଓ ଚାର୍ଜର ଉପରେ କଷ୍ଟମ୍ ଡ୍ୟୁଟି ୨.୫% ପର୍ଯ୍ୟନ୍ତ ବୃଦ୍ଧି କରାଯାଇଛି । ଫଳରେ ମୋବାଇଲ୍ ଓ ଚାର୍ଜର ଦାମ୍ ବଢ଼ିବ । ତେବେ ସୁନା, ରୂପା ଉପରେ କଷ୍ଟମ୍ ଡ୍ୟୁଟି ହ୍ରାସ୍ କରାଯାଇଥିବାରୁ ଏହାର ଦାମ୍ କମିବ ।
ଚଳିତ ଆର୍ଥିକ ବର୍ଷରେ ବିତ୍ତୀୟ ନିଅଣ୍ଟ ପରିମାଣ ଜିଡିପିର ୯.୫ ପ୍ରତିଶତ ହେବାକୁ ଥିବା ବେଳେ ଆଗାମୀ ଆର୍ଥିକ ବର୍ଷରେ ଏହା ୬.୮% ଆକଳନ କରାଯାଇଛି ।
ଆଜି ପ୍ରଥମ ଥର ପାଇଁ ସଂସଦରେ ପେପରଲେସ୍ ବଜେଟ୍ ଉପସ୍ଥାପନ କରିଥିଲେ ଅର୍ଥମନ୍ତ୍ରୀ ଶ୍ରୀମତୀ ସୀତାରମଣ । ୠତବର୍ଷ ୨ ଘଣ୍ଟା ୪୨ ମିନିଟ୍ ଭାଷଣ ପଢ଼ି କ୍ଲାନ୍ତ ହୋଇଯାଇଥିବା ସୀତାରମଣ ଏଥର ତାଙ୍କର ବଜେଟ୍ ଭାଷଣକୁ ୧ ଘଣ୍ଟା ୪୯ ମିନିଟ୍ ରେ ସାରିଥିଲେ । ଅର୍ଥମନ୍ତ୍ରୀଙ୍କ ଭାଷଣ ଶେଷ ବେଳକୁ ସେନସେକ୍ସ ୧୧୬୫.୮୫ ପଏଣ୍ଟ ବଢ଼ି ୪୭୪୫୧.୬୨ ରେ ପହଞ୍ଚିଥିଲା ।
