ଫୁରସତ୍ ଦେଉନାହାନ୍ତି ପାଣ୍ଡିଆନ୍

ଭୁବନେଶ୍ୱର: ଆଇଏଏସ୍ ଚାକିରିରୁ ସ୍ୱେଚ୍ଛାକୃତ ଅବସର ନେଇଥିବା ଭି.କେ.ପାଣ୍ଡିଆନ ଏବେ ୫-ଟି ଓ ନବୀନ ଓଡ଼ିଶାର ଅଧ୍ୟକ୍ଷ । ନୂଆ ଦାୟିତ୍ୱରେ ସେ ତାଙ୍କର ପୁରୁଣା କାମକୁ ଦ୍ରୁତ ଗତିରେ ଆଗକୁ ନେଇଛନ୍ତି । ଟାର୍ଗେଟ୍ ପୂରଣ କରିବାରେ କାହାରିକୁ ଫୁରସତ୍ ଦେଉନାହାନ୍ତି । ରାଜ୍ୟ ସରକାରଙ୍କ ଦୁଇ ଦୁଇଟି ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମର ଅଧ୍ୟକ୍ଷ ଭାବେ ତାଙ୍କର କାର୍ଯ୍ୟ ପରିସୀମା ବୃଦ୍ଧି ପାଇବା ସହ ଓଡ଼ିଶା ରୂପାନ୍ତରଣର ମଙ୍ଗୁଆଳ ଭାବେ ସେ ଏବେ ଅଧିକ ଚର୍ଚ୍ଚାରେ ।

ନୂଆ ଦାୟିତ୍ୱ ଗ୍ରହଣ ପରେ ଶ୍ରୀ ପାଣ୍ଡିଆନ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ଗତକାଲି ପ୍ରଥମେ ପୁରୀ ଯାଇ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଅଗ୍ରଗତି ସମୀକ୍ଷା କରିଥିଲେ । ଭୋର୍ ୪ଟାରୁ ୬ଟା ପର୍ଯ୍ୟନ୍ତ ଏହି ସମୀକ୍ଷା ଚାଲିଥିଲା । ଡିସେମ୍ବର ୧୫ ସୁଦ୍ଧା ଶ୍ରୀମନ୍ଦିର ପ୍ରକଳ୍ପ କାମ ତ୍ୱରାନ୍ୱିତ କରିବାକୁ ଦାୟିତ୍ୱରେ ଥିବା ଅଧିକାରୀମାନଙ୍କୁ ସେ ନିର୍ଦ୍ଦେଶ ଦେଇଥିଲେ ।

ଆଜି ଦ୍ୱିତୀୟ ଦିନରେ ଭୋର୍ ସାଢ଼େ ୪ଟାରେ ବରିଷ୍ଠ ଅଧିକାରୀମାନଙ୍କୁ ସାଙ୍ଗରେ ଧରି ସେ ଭୁବନେଶ୍ୱର ମେଟ୍ରୋ ରେଳ ପ୍ରକଳ୍ପ ଜାଗା ବୁଲି ଦେଖିଥିଲେ । ପ୍ରକଳ୍ପ ନିର୍ମାଣ କାମ ଯେପରି ଠିକ୍ ସମୟରେ ଆରମ୍ଭ ହେବ ସେ ସମ୍ପର୍କରେ ଆଲୋଚନା କରିଥିଲେ । ଆସନ୍ତା ଜାନୁଆରୀ ପହିଲାରେ ମୁଖ୍ୟମନ୍ତ୍ରୀ ଏହି ରେଳ ପ୍ରକଳ୍ପର ଶିଳାନ୍ୟାସ କରୁଥିବାରୁ ସେ କାହାରିକୁ ଢ଼ିଲା ଦେଇନାହାନ୍ତି ।

ଖାଲି ସେତିକି ନୁହେଁ, ରେଳ ପ୍ରକଳ୍ପ ସ୍ଥାନ ବୁଲିବା ପରେ ଶ୍ରୀ ପାଣ୍ଡିଆନ୍ ଅଚାନକ କଟକ ନେତାଜୀ ବସ ଟର୍ମିନାଲକୁ ପରିଦର୍ଶନରେ ଯାଇଥିଲେ । ସେଠାରେ ସାଧାରଣ ଜନତା ଓ ଯାତ୍ରୀଙ୍କଠାରୁ ମତାମତ ନେଇଥିଲେ ଓ ପରିଷ୍କାର ପରିଚ୍ଛନ୍ନତା ପରଖି ଥିଲେ । ଯାତ୍ରୀମାନଙ୍କ ବ୍ୟତୀତ ଦୋକାନୀ, ବିଭିନ୍ନ ସେବା ପ୍ରଦାନକାରୀ, ବସ ଅପରେଟର ଓ ଅନ୍ୟ ଷ୍ଟାଫ୍ ମାନଙ୍କ ସହ କଥା ହୋଇଥିଲେ । ଯାତ୍ରୀମାନଙ୍କ ସୁବିଧା ଓ ଆରାମଦାୟକ ଯାତ୍ରା ପାଇଁ ସମନ୍ୱିତ ସୂଚନା ପରିଚାଳନା ବ୍ୟବସ୍ଥାକୁ ଆହୁରି ସୁଦୃଢ଼ କରିବାକୁ ପରାମର୍ଶ ଦେଇଥିଲେ ।

ଏହାପରେ ଶ୍ରୀ ପାଣ୍ଡିଆନ୍ ରୂପାନ୍ତରିତ ତାଳଦଣ୍ଡା କେନାଲ ମଧ୍ୟ ପରିଦର୍ଶନ କରିଥିଲେ । କେନାଲ କଡେ କଡେ ସୌନ୍ଦର୍ଯ୍ୟକରଣ ବ୍ୟବସ୍ଥାର ବିକାଶ କରିବାକୁ ସେ ଅଫିସରମାନଙ୍କୁ ଦାୟିତ୍ୱ ଦେଇଥିଲେ ।

ଆଜି ଶ୍ରୀ ପାଣ୍ଡିଆନଙ୍କ ଗସ୍ତରେ ଉନ୍ନୟନ କମିସନର ଶ୍ରୀମତୀ ଅନୁ ଗର୍ଗ, ଇଲେକଟ୍ରୋନିକ୍ସ ତଥା ଆଇଟି ବିଭାଗର ପ୍ରମୁଖ ସଚିବ ମନୋଜ ମିଶ୍ର, କଟକ ଜିଲ୍ଲା ପ୍ରଶାସନ, ଭୁବନେଶ୍ୱର ମେଟ୍ରୋ ରେଳ କର୍ପୋରେସନ ଓ ପୂର୍ତ୍ତ ବିଭାଗର ବରିଷ୍ଠ ଅଧିକାରୀମାନେ ସାମିଲ ହୋଇଥିଲେ ।

ସୂଚନାଯୋଗ୍ୟ, ଆଇଏଏସ୍ ଚାକିରିକାଳ ଆରମ୍ଭରୁ ଶ୍ରୀ ପାଣ୍ଡିଆନ୍ ନିଜକୁ ଜଣେ ଦକ୍ଷ ଅଫିସର ଭାବେ ପ୍ରତିପାଦିତ କରିଥିଲେ ହଁ ୨୦୧୯ ମସିହାରେ ୫-ଟି ସଚିବ ଭାବେ ଓଡ଼ିଶାରେ ରୂପାନ୍ତରଣର ମଙ୍ଗ ଧରିବା ଦିନୁ ତାଙ୍କର କାର୍ଯ୍ୟ ସମସ୍ତଙ୍କ ଅଧିକ ଦୃଷ୍ଟି ଆକର୍ଷଣ କରିଥିଲା । ବିଭିନ୍ନ ପ୍ରକଳ୍ପ କାମ ନିର୍ଦ୍ଧାରିତ ସମୟରେ ସାରିବା ତାଙ୍କର ପ୍ରଥମ ପ୍ରାଥମିକତା ରହି ଆସିଛି । ନିଜେ କଠିନ ପରିଶ୍ରମରେ ବିଶ୍ୱାସ କରୁଥିବା ଶ୍ରୀ ପାଣ୍ଡିଆନ ସମୟର ସଦୁପଯୋଗ କରିବା ଓ କାମ ଆଦାୟ କରିବାରେ ସିଦ୍ଧହସ୍ତ । ବିଭିନ୍ନ ପ୍ରକଳ୍ପ କାର୍ଯ୍ୟର ସମୀକ୍ଷା ପାଇଁ ସେ ବଡି ଭୋରରୁ ସେହି ଜାଗାରେ ପହଞ୍ଚିବାର ଦେଖାଯାଏ । ସେଥିପାଇଁ ଅନେକ ତାଙ୍କୁ ୪ ଏଏମ୍ ଅଫିସର ବୋଲି କୁହନ୍ତି । ସରକାରୀ ଚାକିରିରୁ ସ୍ୱେଚ୍ଛାକୃତ ଅବସର ନେଇ ୫-ଟି ଓ ନବୀନ ଓଡ଼ିଶାର ଅଧ୍ୟକ୍ଷ ଭାବେ ନିଯୁକ୍ତି ପାଇଥିବା ଶ୍ରୀ ପାଣ୍ଡିଆନଙ୍କର କାର୍ଯ୍ୟ କ୍ଷିପ୍ରତା ଏବେ ଅଧିକ ଚର୍ଚ୍ଚାର ବିଷୟ ହୋଇଛି ।

ଇତିମଧ୍ୟରେ ତାଙ୍କର ନୂଆ ନିଯୁକ୍ତିକୁ ରାଜ୍ୟ ସରକାରଙ୍କ ବିଭିନ୍ନ କର୍ମଚାରୀ ସଂଗଠନର କର୍ମକର୍ତ୍ତାମାନେ ସ୍ୱାଗତ କରିଛନ୍ତି । ଗତ ଶୁକ୍ରବାର ଦିନ ୧୫ ରୁ ଅଧିକ ସଂଗଠନ ଶ୍ରୀ ପାଣ୍ଡିଆନଙ୍କୁ ନବୀନ ନିବାସରେ ଭେଟି ଶୁଭେଚ୍ଛା ଜଣାଇଥିଲେ । ମୁଖ୍ୟମନ୍ତ୍ରୀଙ୍କ ଭିଜନ୍ କୁ ଆଖି ଆଗରେ ରଖି ଶ୍ରୀ ପାଣ୍ଡିଆନ୍ ରାଜ୍ୟର ରୂପାନ୍ତରଣରେ ମୁଖ୍ୟ ବିନ୍ଧାଣୀ ସାଜିଛନ୍ତି । ଏବେ ରୂପାନ୍ତରଣ ଆହୁରି ଗତିଶୀଳ ହେବ ବୋଲି ସେମାନେ ଆଶା ପ୍ରକଟ କରିଥିଲେ ।