ଭୁବନେଶ୍ୱର: ଓଡ଼ିଶା ରାଜ୍ୟ ମାନବାଧିକାର ସୁରକ୍ଷା ସେଲ୍(ଏଚଆରପିସି)ଆଇଜି ଏନ.ବି ଭାରତୀଙ୍କର ପତ୍ତା ମିଳୁନି । ୧୯୯୮ ବ୍ୟାଚ୍ ର ଏହି ଆଇପିଏସ୍ ଅଧିକାରୀ ୨୦୧୭ ନଭେମ୍ବର ୨୨ ରୁ ବିନା ଛୁଟି ଦରଖାସ୍ତରେ କୁଆଡ଼େ ପଳେଇଛନ୍ତି । ପୁଲିସ ମୁଖ୍ୟାଳୟ ଏବଂ ରାଜ୍ୟ ସରକାରଙ୍କ ଗୃହ ବିଭାଗ ତାଙ୍କୁ ଯୋଗାଯୋଗ କରିବାରେ ବିଫଳ ହୋଇଛନ୍ତି । ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନକୁ ଶ୍ରୀମତୀ ଭାରତୀ ଖାତିର କରିନାହାନ୍ତି କି ସରକାରୀ ଚିଠିର ଜବାବ ଦେଉନାହାନ୍ତି । ତାଙ୍କର ତିନି ତିନୋଟି ଠିକଣାରେ ପଠାଯାଉଥିବା ଚିଠି ଫେରସ୍ତ ଆସୁଥିବା ବେଳେ ଫୋନ୍ ସୁଇଚ୍ ଅଫ୍ ହୋଇଯାଇଛି ।
ଶେଷରେ ରାଜ୍ୟ ପୁଲିସ ମୁଖ୍ୟାଳୟ ପକ୍ଷରୁ ଆଜି ଖବରକାଗଜରେ ତାଙ୍କ ନାଁରେ ବିଜ୍ଞାପନ ନୋଟିସ୍ ଜାରି କରାଯାଇଛି । ୧୫ ଦିନ ମଧ୍ୟରେ ତଦନ୍ତ ରିପୋର୍ଟ ଆଧାର ବିରୋଧରେ ତାଙ୍କଠାରୁ ଲିଖିତ ଆବେଦନ ଆହ୍ୱାନ କରାଯାଇଛି । ନଚେତ ଶୃଙ୍ଖଳାଗତ କାର୍ଯ୍ୟବିଧି ଏକତରଫା ଭାବେ ସମାପ୍ତ କରିଦିଅଯିବ ବୋଲି ଜଣାଇ ଦିଆଯାଇଛି । ଓଡ଼ିଶାରେ ଜଣେ ଆଇପିଏସ୍ ଅଧିକାରୀଙ୍କ କ୍ଷେତ୍ରରେ ଏହା ପ୍ରଥମ ଘଟଣା ।
କର୍ଣ୍ଣାଟକର ବାସିନ୍ଦା ହେଉଛନ୍ତି ଶ୍ରୀମତୀ ଏନ.ବି.ଭାରତୀ । ୧୯୯୮ ବ୍ୟାଚ୍ ର ଏହି ଆଇପିଏସ୍ ଅଫିସର ଓଡ଼ିଶା କ୍ୟାଡରର । ରାଜ୍ୟ ମାନବାଧିକାର ସୁରକ୍ଷା ସେଲ୍ ର ଆଇଜି ଭାବେ ସେ ଅବସ୍ଥାପିତ ଥିଲେ । ଉପରିସ୍ଥ ଅଧିକାରୀଙ୍କ ବିନା ଅନୁମୋଦନରେ ସରକାରୀ ଟୁର୍ ରେ ଯିବା ତାଙ୍କର ଅଭ୍ୟାସ ଥିଲା । ୨୦୧୭ ନଭେମ୍ବର ମାସରେ ଏଭଳି ଭାବେ ଗଜପତି ଜିଲ୍ଲାକୁ ବାର୍ଷିକ ଟୁର୍ କରିଥିଲେ । ତାପରଠାରୁ ଅର୍ଥାତ ନଭେମ୍ବର ୨୨ ରୁ ସେ କାର୍ଯ୍ୟକ୍ଷେତ୍ରକୁ ଫେରିନାହାନ୍ତି । ତାଙ୍କର ଅନୁପସ୍ଥିତି ସଂକ୍ରାନ୍ତରେ କାହାରିକୁ ଜଣାଇନାହାନ୍ତି କି ଛୁଟି ଦରଖାସ୍ତ ଦେଇନାହାନ୍ତି ।
ଶ୍ରୀମତୀ ଭାରତୀଙ୍କ ଏଭଳି ବିଶୃଙ୍ଖଳିତ ଆଚରଣ, ସରକାରୀ ନିୟମାବଳୀର ଉଲ୍ଲଂଘନ ଏବଂ ବିନା ଛୁଟି ଦରଖାସ୍ତରେ ଚାକିିରି କ୍ଷେତ୍ରରେ ଅନୁପସ୍ଥିତି ପାଇଁ ରାଜ୍ୟ ସରକାରଙ୍କ ଗୃହ ବିଭାଗ ପକ୍ଷରୁ ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟବିଧି ଆରମ୍ଭ ହୋଇଥିଲା । ୨୦୨୦ରେ ଏହାର ତଦନ୍ତ ଦାୟିତ୍ୱ ଅତିରିକ୍ତ ଡିଜି( ରାଜ୍ୟ ଅପରାଧ ନଥି ସଂସ୍ଥା)ଙ୍କୁ ଦିଆଯାଇଥିଲା । ତଦନ୍ତ ପାଇଁ ଭିନ୍ନ ଭିନ୍ନ ସମୟରେ ତାରିଖ ଧାର୍ଯ୍ୟ କରାଯାଇଥିଲା । ତାଙ୍କର ତିନିଗୋଟି ଠିକଣାରେ ରେଜିଷ୍ଟ୍ରି ଚିଠି ଓ ଇ-ମେଲ୍ ପଠାଯାଇଥିଲେ ମଧ୍ୟ ସେ ଗ୍ରହଣ ନ କରିବାରୁ ଫେରି ଆସିଥିଲା ।
ଓଡ଼ିଶା ସରକାରଙ୍କ ଗୃହ ବିଭାଗ ପକ୍ଷରୁ ବିଭାଗ ନୋଟିସ ସହିତ ତଦନ୍ତ ରିପୋର୍ଟର ନକଲ ଗତ ୨.୨.୨୦୨୨ ରେ ତାଙ୍କ ଅବଗତି ନିମନ୍ତେ ପଠାଯାଇଥିଲା । ଉକ୍ତ ନୋଟିସ୍ ପାଇବାର ୧୫ ଦିନ ଭିତରେ ତଦନ୍ତକାରୀ ଅଫିସରଙ୍କ ରିପୋର୍ଟର ଆଧାର ଅନୁଯାୟୀ ନିଜକୁ ଦୋଷାରୋପରୁ ରକ୍ଷା କରିବା ପାଇଁ ଲିଖିତ ଆବେଦନ କିମ୍ବା ମତାମତ ଉପସ୍ଥାନ କରିବାକୁ ସେଥିରେ କୁହାଯାଇଥିଲା । କିନ୍ତୁ ତାହାର ଉତ୍ତର ମିଳିଲା ନାହିଁ । ପରବର୍ତ୍ତୀ ସମୟରେ ପୁଣି ତିନୋଟି ଚିଠି ପଠଶଯାଇଥିଲା । ଅଦ୍ୟାବଧି ଦୁଇଟି ଚିଠି ତାଙ୍କର ହସ୍ତଗତ ନ ହୋଇ ଫେରି ଆସିଥିବା ବେଳେ ଅନ୍ୟ ଏକ ଚିଠି ଏ ପର୍ଯ୍ୟନ୍ତ ଫେରିନାହିଁ ।
ଆଇଜିସ୍ତରୀୟ ଜଣେ ବରିଷ୍ଠ ଆଇପିଏସ ଅଧିକାରୀ ଦୀର୍ଘ ବର୍ଷ ଧରି ବେଆଇନ ଭାବେ ଚାକିରିରୁ ଅନୁପସ୍ଥିତ ରହିବା ଏବଂ ତାଙ୍କର ଖୋଜଖବର ନ ମିଳିବା ରହସ୍ୟର ବିଷୟ ହୋଇଛି ।
