ପାଣ୍ଡିଆନଙ୍କୁ ନେଇ ମିଛ କମ୍ପମାନ!

ଭୁବନେଶ୍ୱର: ଏଠି ବିଚିତ୍ର ରାଜନୀତି, ବିଚିତ୍ର ସରକାର । ବିରୋଧୀ ଆସନରେ ଥିବା ବେଳେ ଯାହାଙ୍କୁ ସରକାରୀ ମାଫିଆ କହି ଚିଲ୍ଲାଉଥିଲେ, ଏବେ ସରକାରକୁ ଆସିବା ପରେ ମଧ୍ୟ ସେହି ଧାରା ଚାଲିଛି । ଦଣ୍ଡ ଦେବାର କ୍ଷମତା ଥାଇ ବି ସାହାସ ନାହିଁ । ବେଳେ ବେଳେ ବାହାଦୁରି ମାରିବା ପାଇଁ ସେହି ତଥାକଥିତ ‘ଲୁଟେରା’ଙ୍କୁ ଇଙ୍ଗିତ କରୁଥିଲେ ମଧ୍ୟ ଛେପ ଢ଼ୋକି ହୋଇଯାଉଛି । ବିଧାନସଭାରେ ଲାଜେଇ ଲାଜେଇ ତଥ୍ୟ ଓଗାଳୁଛନ୍ତି ମନ୍ତ୍ରୀ । କାର୍ଯ୍ୟାନୁଷ୍ଠାନ କଥା ପଚାରିଲା ବେଳକୁ ମୁରୁକି ହସି ଚାଲିଯାଉଛନ୍ତି ।

ଗତକାଲି ବିଧାନସଭାରେ ମୁଲତବୀ ଆଲୋଚନା ବେଳେ ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ପୂର୍ବ ସରକାରରେ ପାୱାରଫୁଲ୍ ଭି.କେ ପାଣ୍ଡିଆନଙ୍କ ନାଁ ନ ନେଇ ସରକାରୀ କଳର କିଭଳି ଅପବ୍ୟବହାର ହେଉଥିଲା ତାହାର ଉଦାହରଣ ରଖିଥିଲେ । ନବୀନ ପଟ୍ଟନାୟକଙ୍କଠାରୁ ପାଣ୍ଡିଆନ୍ ଅଧିକ ପାୱାରଫୁଲ୍ ବୋଲି ଠାରରେ କହିଥିଲେ । ସେହି ପାଣ୍ଡିଆନଙ୍କ ସୁରକ୍ଷାରେ ୭୨ ସୁରକ୍ଷା କର୍ମୀ ନିୟୋଜିତ ଥିଲେ ଏବଂ ପୁଲିସ ତାଙ୍କ ସୁରକ୍ଷା ପାଇଁ ଝାଳ ବୁହାଉଥିଲେ ବୋଲି ସେ ଆକ୍ଷେପ କରିଥିଲେ ।

ବିଧାନସଭାରେ ଆଇନମନ୍ତ୍ରୀ ମିଛ କହି ନ ଥିବେ । ଯଦି ସତ କହିଥିବେ, ତେବେ ପାଣ୍ଡିଆନଙ୍କ ସୁରକ୍ଷାରେ ୭୨ ପୁଲିସ ନିୟୋଜିତ ହେବା ନିହାତି ଭାବରେ ବେଆଇନ କାର୍ଯ୍ୟ । ପାଣ୍ଡିଆନ୍ କିଏ ଏବଂ ତାଙ୍କ ପାଇଁ ଏତେ ଆୟୋଜନ କାହିଁକି ଥିଲା ବୋଲି ବିଜେଡି ବାଲାଙ୍କୁ ତାତ୍ସଲ୍ୟ କରିଥିଲେ ଆଇନମନ୍ତ୍ରୀ ।

ଆଜି ଆଇନମନ୍ତ୍ରୀଙ୍କୁ କଡ଼ା ଜବାବ ଦେଇଛନ୍ତି ବିଜେଡି ବିଧାୟକ ଶାରଦା ଜେନା । ଯଦି ଏତେକଥା ଧରିଲଣି ତେବେ କାର୍ଯ୍ୟାନୁଷ୍ଠାନ ନେଉନ କାହିଁକି? ସେଥିପାଇଁ ସରକାରଙ୍କୁ କିଏ ଅଟକାଇଛି ବୋଲି ସେ ପ୍ରଶ୍ନ କରିଛନ୍ତି । ସେପଟେ କଂଗ୍ରେସ ବିଧାୟକମାନେ ଏହାକୁ ବିଜେପି-ବିଜେଡିର ନାଟକବାଜି ବୋଲି କହିଛନ୍ତି । ଉଭୟ ଦଳର ଏହା ଚତୁରେ କୋଳାକୋଳି ବୋଲି ଆକ୍ଷେପ କରିଛନ୍ତି ।

କେବଳ ସୁରକ୍ଷା କଥାରେ ନୁହେଁ, ବିଗତ ସରକାରରେ ଯେତେ ସବୁ ତ୍ରୁଟି ବିଚ୍ୟୁତି ସବୁ ଦୋଷ ପାଣ୍ଡିଆନଙ୍କର ବୋଲି ବିଜେପି ସରକାରର ବଡ଼ପଣ୍ଡାମାନେ କହି ଆସୁଛନ୍ତି । ତାଙ୍କର ୫-ଟି ଶାସନକୁ ଅବୈଧ ବୋଲି କହୁଛନ୍ତି । କଥା କଥାରେ ଶାସକ ଦଳର ମନ୍ତ୍ରୀ ଓ ବିଧାୟକମାନେ ପାଣ୍ଡିଆନଙ୍କର ଧଜିଆ ଉଡ଼ାଉଛନ୍ତି । ଖୋଦ୍ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଭରା ସଭାରେ ତାଙ୍କୁ ଭାଷା ଅଭାଷାରେ ଗାଳି କରୁଛନ୍ତି ।

ଯଦି ପୂର୍ବ ସରକାରରେ ତଥାକଥିତ ଅରାଜକତା, ଦୁର୍ନୀତି, ଚୋରି, ଡକାଏତି ଆଦି ଯାବତୀୟ କାରନାମା ପାଇଁ ସେଇ ପାଣ୍ଡିଆନ୍ ଦାୟୀ ତେବେ ତାଙ୍କ ବିରୋଧରେ କାହିଁକି କାର୍ଯ୍ୟାନୁଷ୍ଠାନ ନିଆଯାଉନାହିଁ ବୋଲି ବିଭିନ୍ନ ମହଲରେ ପ୍ରଶ୍ନ ହେଉଛି । ସରକାରକୁ ଆସିବାର ୧୭ ମାସ ପରେ ମଧ୍ୟ ମୁଖ୍ୟମନ୍ତ୍ରୀଙ୍କୁ କାର୍ଯ୍ୟାନୁଷ୍ଠାନରୁ କିଏ ଅଟକାଇଛି?

ସୂଚନାଥାଉକି, ଗତ ସାଧାରଣ ନିର୍ବାଚନରେ ବିଜେପିର ମୁଖ୍ୟ ଟାର୍ଗେଟ୍ ଥିଲେ ପାଣ୍ଡିଆନ୍ ଏବଂ କୋଟେରି । ସେଥିପାଇଁ ବିଜେପି ଓଡ଼ିଆ ଅସ୍ମିତାର ନାରା ଦେଇଥିଲା ଯାହା ସଫଳତା ପାଇଥିଲା । ଖୋଦ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିର୍ବାଚନ ପ୍ରଚାର ସଭାରେ ଓଡ଼ିଶାରେ ଅଣଓଡ଼ିଆ ରାଜ୍ କୁ ବରଦାସ୍ତ କରାଯିବ ନାହିଁ ବୋଲି ଚେତାବନୀ ଦେଇଥିଲେ । ରାଜ୍ୟରେ ବିଜେପି କ୍ଷମତାକୁ ଆସିଲେ ଭ୍ରଷ୍ଟାଚାରୀଙ୍କ ଅଣ୍ଟା ଭାଙ୍ଗି ଦିଆଯିବ ବୋଲି କହିଥିଲେ ।

ରତ୍ନଭଣ୍ଡାରରୁ ମୂଲ୍ୟବାନ ଅଳଙ୍କାର ସବୁ ଲୁଟ୍ ହୋଇ ଚେନ୍ନାଇକୁ ଚାଲାଣ ହୋଇଯାଇଛି ବୋଲି ପାଣ୍ଡିଆନଙ୍କୁ ଲକ୍ଷ୍ୟ କରି ଅନ୍ୟ ନେତାମାନେ ମଧ୍ୟ ବିଷୋଦଗାର କରିଥିଲେ । ଚିଟଫଣ୍ଡ ଟଙ୍କା ଖାଇଥିବା ଚୋରଙ୍କୁ ବନ୍ଧାଯିବ ବୋଲି ସେହି ପାଣ୍ଡିଆନଙ୍କୁ ଲକ୍ଷ୍ୟ କରି ରାଜ୍ୟର ବିଜେପି ନେତାମାନେ ତମ୍ବିତୋଫାନ କରିଥିଲେ । ତୃତୀୟ ମହଲାରେ ମୁଖ୍ୟମନ୍ତ୍ରୀଙ୍କ ପାଇଁ କାର୍ଯ୍ୟ କରୁଥିବା ପାଣ୍ଡିଆନଙ୍କ ସମେତ ଡି.ଏସ୍. କୁଟ୍ଟେ, ଆଶିଷ ସିଂ, ରୂପାରୋସନ ସାହୁ, ଆଦିତ୍ୟ ମହାପାତ୍ର ଆଦି ଅଫିସରଙ୍କୁ ବିଜେଡି ଏଜେଣ୍ଟ ଆଖ୍ୟା ଦିଆଯାଇଥିଲା । ନିର୍ବାଚନ ସମୟରେ ଶ୍ରୀ କୁଟ୍ଟେ ଏବଂ ଶ୍ରୀ ସିଂଙ୍କ ବିରୋଧରେ ନିର୍ବାଚନ କମିସନଙ୍କ ପାଖରେ ବିଜେପି ଫେରାଦ ହୋଇଥିଲା । ନିର୍ବାଚନ କମିଶନ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରିଥିଲେ ।

ରାଜ୍ୟରେ ବିଜେପି ସରକାର ଆସିଲେ ଏହି ଅଫିସରମାନଙ୍କ କ୍ୟାରିୟର୍ ଖତମ ହୋଇଯିବ ବୋଲି ସମସ୍ତେ ଧରିନେଇଥିଲେ । ମାତ୍ର ବିଜେପି ସରକାର ଆସିବାର ଦେଢ଼ବର୍ଷ ପରେ ମଧ୍ୟ କାର୍ଯ୍ୟାନୁଷ୍ଠାନ ହେଲାନାହିଁ । ଓଲଟି ତଥାକଥିତ ‘ବିଜେଡି ଏଜେଣ୍ଟ’ ଙ୍କୁ ପୁରସ୍କାର ମାଳ ଦେଖିବାକୁ ମିଳିଲା । ଡି.ଏସ୍ କୁଟ୍ଟେ ଏବଂ ଆଶିଷ ସିଂ କେନ୍ଦ୍ରୀୟ ଡେପୁଟେସନ୍ ରେ ଭଲ ଜାଗାରେ ପୋଷ୍ଟିଂ ପାଇଛନ୍ତି । ରୂପାରୋସନ ସାହୁ କିଛି ମାସ ଦକ୍ଷିଣାଞ୍ଚଳ ଆରଡିସି ଭାବେ କାର୍ଯ୍ୟ କଲା ପରେ ଏବେ ରାଜ୍ୟପାଳଙ୍କ ସଚିବ ଭାବେ ଅବସ୍ଥାପିତ ହୋଇଛନ୍ତି । ଏହି ସରକାର ଅମଳରେ ରାଜ୍ୟପାଳଙ୍କ ସଚିବଙ୍କର ଗୁରୁତ୍ୱ କେତେ ତାହା ସମସ୍ତେ ଜାଣନ୍ତି । ଆଦିତ୍ୟ ମହାପାତ୍ର ବିରୋଧୀ ଦଳ ନେତାଙ୍କ ପ୍ରାଇଭେଟ ସେକ୍ରେଟାରୀ ଭାବେ ନବୀନ ପଟ୍ଟନାୟକଙ୍କ ପାଖ ଛାଡ଼ିନାହାନ୍ତି ।

ଆଉ ବାକି ରହିଲେ ନବୀନଙ୍କ ସେହି ତଥାକଥିତ ‘ସୁପରମ୍ୟାନ୍’ ପାଣ୍ଡିଆନ୍ । ତାଙ୍କ ବିରୋଧରେ ମୁଖ୍ୟମନ୍ତ୍ରୀଙ୍କଠାରୁ ଆରମ୍ଭ କରି ଅନ୍ୟ ମନ୍ତ୍ରୀମାନେ ବିଷୋଦଗାର ଜାରି ରଖିଥିଲେ ମଧ୍ୟ କାର୍ଯ୍ୟାନୁଷ୍ଠାନ ଜିରୋ । ପାଣ୍ଡିଆନଙ୍କ ବିରୋଧରେ କୌଣସି ଗୋଟିଏ ଅଭିଯୋଗର ତଦନ୍ତ ହୋଇନାହିଁ । ଯଦି ପୂର୍ବ ବିଜେଡି ସରକାରରେ ସୁପର୍ ଚିଫ୍ ମିନିଷ୍ଟର ହୋଇ ସେ ଓଡ଼ିଶାକୁ ଲୁଟି ପକେଇଛନ୍ତି ତେବେ ରାଜ୍ୟର ବିଜେପି ସରକାର କାହିଁକି ହାତ ବାନ୍ଧି ବସିଛନ୍ତି ତାହା ଲୋକଙ୍କ ଆଖିରେ ରହସ୍ୟାବୃତ୍ତ ହେବାରେ ଲାଗିଛି । ଓଲଟି ସେହି ପାଣ୍ଡିଆନଙ୍କୁ ରାଜ୍ୟ ବିଜେପି ସରକାରଙ୍କ ଦିଲ୍ଲୀ ନିୟନ୍ତା ବୋଲି ଚର୍ଚ୍ଚା କରାଯାଉଛି । ଯାହା ଓଡ଼ିଶା ରାଜନୀତିରେ ବିଚିତ୍ର ଦିଗକୁ ସୂଚୀତ କରୁଛି ।