ଭୁବନେଶ୍ୱର: ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର ଆଜି ତାଙ୍କ ଫେସବୁକ୍ ପେଜ୍ ରେ ଏକ ପୋଷ୍ଟ ଛାଡ଼ିଛନ୍ତି । ସେଥିରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସେ ମଲାଘୋଡ଼ା ବୋଲି ଟିପ୍ପଣୀ ଦେଇଛନ୍ତି । ‘ଅଟକିଲା ଜନନୀ ଏକ୍ସପ୍ରେସ୍’ ଶୀର୍ଷକରେ ଦୈନିକ ଖବରକାଗଜରେ ପ୍ରକାଶିତ ଏକ ଖବର କ୍ଲିପିଂକୁ ସେ ପୋଷ୍ଟ କରି ତାହା ଉପରେ ଏଭଳି ଅଶାଳୀନ ଟିପ୍ପଣୀ ରଖିଛନ୍ତି । ଲେଖିଛନ୍ତି, ଜନନୀ ଏକ୍ସପ୍ରେସ୍ କୁ ଲୋକେ ଯେମିତି ଠେଲି ଠେଲି ନେଉଛନ୍ତି ସେଥିରୁ ଓଡ଼ିଶାର ସରକାରୀ କଳ କବଜା ଯେ ଜଙ୍କ ଧରିଗଲାଣି ଆଉ ବୁଝିବାକୁ ବାକି ନାହିଁ । ନବୀନବାବୁଙ୍କୁ ଠେଲି ଠେଲି କିଛି ନ୍ୟସ୍ତସ୍ୱାର୍ଥ ଗୋଷ୍ଠୀ ଆଗକୁ ନେବାକୁ ଚେଷ୍ଟା କରୁଛନ୍ତି ହେଲେ ମଲା ଘୋଡ଼ାକୁ ଯେତେ ପିଟିଲେବି ଆଉ କେତେ ଆଗେଇବ ? ଓଡ଼ିଶାର ମା’ ମାନଙ୍କୁ ଜଗନ୍ନାଥ ଶାହା..
ଟିଭିରେ ହେଉ କି ସୋସିଆଲ୍ ମିଡ଼ିଆରେ ହେଉ, ଲେଖାଶ୍ରୀଙ୍କ ପାଇଁ ଅରୁଚିକର ମନ୍ତବ୍ୟ ନୂଆ ନ ହେଲେ ମଧ୍ୟ ମୁଖ୍ୟମନ୍ତ୍ରୀଙ୍କ ପ୍ରତି ଏଭଳି ମନ୍ତବ୍ୟ ଶାଳୀନତାର ସୀମା ଲଂଘିଥିବା କୁହାଯାଉଛି । ଖୋଦ୍ ତାଙ୍କ ଦଳର ଅନେକ ନେତା ଏହାକୁ ପସନ୍ଦ କରିନାହାନ୍ତି । ସଂସ୍କାରଧର୍ମୀ ଜାତୀୟ ଦଳ ବୋଲି ଦାବି କରୁଥିବା ବିଜେପିର ଜଣେ ସମ୍ବ୍ରାନ୍ତ, ଉଚ୍ଚଶିକ୍ଷିତ(ରେଭେନ୍ସା କଲେଜର ପୂର୍ବତନ ଅଧ୍ୟାପିକା) ଓ ଦାୟିତ୍ୱସମ୍ପନ୍ନ( ବିଜେପି ରାଜ୍ୟ ସମ୍ପାଦିକା) ନେତ୍ରୀ ବିରୋଧ କରିବା ନାଁରେ ରାଜ୍ୟର ମୁଖ୍ୟମନ୍ତ୍ରୀଙ୍କ ପ୍ରତି ଟିପ୍ପଣୀ ଦେବାକୁ ଯାଇ ଶାଳୀନତା ବାହାରକୁ ଚାଲିଯିବା ସେମାନଙ୍କୁ ହଜମ ହୋଇନାହିଁ । ଏହାଦ୍ୱାରା ବିଜେପି ଲୋକଙ୍କ ସମ୍ମାନ ଓ ସହାନୁଭୂତିଠାରୁ ଦୂରେଇ ଯାଉଛି ବୋଲି ଦଳର ଜଣେ ବରିଷ୍ଠ ନେତା ନିଜ ନାଁ ଗୋପନ ରଖି କହିଛନ୍ତି । ରାଜନୈତିକ ମୂଲ୍ୟବୋଧ ଓ ବିଚାରାଧାରାକୁ ଏଭଳି ହୀନ ମନ୍ତବ୍ୟ ଆଘାତ ଦେଉଥିବା ସେ କହିଛନ୍ତି ।
ପୂର୍ବରୁ ଲେଖାଶ୍ରୀଙ୍କ ଅଶାଳୀନ ଓ ଅରୁଚିକର ମନ୍ତବ୍ୟର ଲମ୍ବା ତାଲିକା ରହିଛି । ଓଡ଼ିଆ ମହିଳା ଗୁଜୁରାଟରେ ଦେହ ବେପାର କରୁଥିବା ଏକ ଟିଭି ବିତର୍କରେ କହି ସେ ଅତ୍ୟନ୍ତ ବିବାଦୀୟ ହୋଇଥିଲେ । ମୁଖ୍ୟମନ୍ତ୍ରୀଙ୍କୁ ଅନ୍ଧ ଧ୍ରୃତରାଷ୍ଟ୍ର ବୋଲି କହିଥିଲେ । ବାପା ବୟସର ଦାମ ରାଉତଙ୍କୁ ଶିଖଣ୍ଡୀ କହି ଛିଗୁଲାଇଥିଲେ । ନିକଟରେ ଶିଶୁ ଦିବସ ଉତ୍ସବରେ ମୁଖ୍ୟମନ୍ତ୍ରୀଙ୍କ ଓଡ଼ିଆ ଭାଷଣକୁ ନେଇ ଫେସବୁକ୍ ରେ ଅତ୍ୟନ୍ତ ନିମ୍ନ ଓ ଅରୁଚିକର କଥା ଲେଖିଥିଲେ । ସେପଟେ କିଛି ଦିନ ତଳେ ମନ୍ତ୍ରୀ ଦାମୋଦର ରାଉତଙ୍କ ‘ସ୍ୱାମୀ ଛାଡ଼ି ଅଙ୍ଗନବାଡ଼ି’ ମନ୍ତବ୍ୟକୁ ନେଇ ଲେଖାଶ୍ରୀ ଓ ତାଙ୍କ ଦଳର ନେତା, ନେତ୍ରୀମାନେ ଧୂମ୍ ଧଡ଼ାସ କରିଥିଲେ । ମହିଳାଙ୍କୁ ସମ୍ମାନର ନାରା ଦେଇ ରାଜରାସ୍ତା କମ୍ପାଇଥିଲେ । ମନ୍ତ୍ରୀ ଦାମ ରାଉତ ମହିଳାମାନଙ୍କ ପ୍ରତି ଶାଳୀନତାର ସୀମା ଟପିଥିବା ଗର୍ଜି ତାଙ୍କର କ୍ଷମା ଚାହିଁଥିଲେ । ପରେ ଦାମବାବୁ ସେଥିପାଇଁ ଦୁଃଖପ୍ରକାଶ କରିଥିଲେ ।
ଆଜି ମୁଖ୍ୟମନ୍ତ୍ରୀଙ୍କୁ ଲେଖାଶ୍ରୀଙ୍କ ମଲା ଘୋଡ଼ା ଟିପ୍ପଣୀ ବିଜେଡ଼ି ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି । ପୁରୁଖା ନେତାମାନେ ଏଭଳି ମନ୍ତବ୍ୟକୁ ଔଦ୍ଧତ୍ୟର ଶେଷସୀମା ବୋଲି କହିଛନ୍ତି । ଦଳର ମୁଖପାତ୍ର ଡ. ସସ୍ମିତ୍ ପାତ୍ର କହିଛନ୍ତି, ଡ. ଲେଖାଶ୍ରୀ ସାମନ୍ତସିଂହାର ରାଜନୀତିର ନୂଆ ପାଠ ପଢ଼ୁଛନ୍ତି । ୪ ବର୍ଷ ହେଲା ରାଜନୀତିକୁ ଆସିଥିବା ଜଣେ ନେତ୍ରୀ ରାଜ୍ୟର ଚାରି ଚାରି ଥରର ମୁଖ୍ୟମନ୍ତ୍ରୀଙ୍କ ପ୍ରତି ଏଭଳି ମନ୍ତବ୍ୟ ଦେବା ତାଙ୍କ ଅଯୋଗ୍ୟତା ଓ ରାଜନୀତିରେ ଅପରିପକ୍ୱତାର ପ୍ରମାଣ ଦେଇଛି । ଅଳ୍ପ ବିଦ୍ୟା ଭୟଙ୍କରୀ । ରାଜନୀତିର ସେହି ଅଳ୍ପ ବିଦ୍ୟାଧାରୀଙ୍କଠାରୁ ରାଜନୈତିକ ଶାଳୀନତା ଆଶା କରିବା ବୃଥା ବୋଲି ସସ୍ମିତ୍ କହିଛନ୍ତି ।
No Result
View All Result
