ଚିହ୍ନା ହେଲେଣି ଜେଏନୟୁ ହମଲାର ମାଷ୍ଟରମାଇଣ୍ଡ!

ନୂଆଦିଲ୍ଲୀ: ଜେଏନୟୁ କ୍ୟାମ୍ପସରେ ପଶି ହମଲା କରିଥିବା ମୁଖାପିନ୍ଧା ଦୃବୃର୍ତ୍ତମାନେ କିଏ? ବିଜେପିର ଛାତ୍ର ସଂଗଠନ ଏବିଭିପି ନା ବାମପନ୍ଥୀ ଏସଏଫଆଇ, ଏଆଇଏସଏ ଏବଂ ଡିଏସଏଫ ସମର୍ଥକ? ପ୍ରତ୍ୟକ୍ଷଦର୍ଶୀଙ୍କ ବୟାନ ଓ ସୋସିଆଲ୍ ମିଡ଼ିଆକୁ ଆସିଥିବା ମେଳି ପୂର୍ବର ପ୍ରସ୍ତୁତି ଫଟୋ ଏବଂ ହ୍ୱାଟସଆପ୍ ମେସେଜ୍ ରୁ ଦୃବୃର୍ତ୍ତମାନେ ଏବିଭିପି ସମର୍ଥକ ବୋଲି କୁହାଯାଉଛି । ଅନ୍ୟପକ୍ଷରେ ଗୁରୁତର ଆକ୍ରମଣର ଶିକାର ଜେଏନୟୁ ଛାତ୍ରସଂଘ ସଭାପତି ଆଇଶା ଘୋଷଙ୍କ ଏକ ଭିଡ଼ିଓକୁ ଧରି ଦ୍ୱନ୍ଦ ସୃଷ୍ଟି କରିବାକୁ ଉଦ୍ୟମ କରିଛି ଗୋଦି ମିଡ଼ିଆ । କିଛି ମୁଖାପିନ୍ଧା ଯୁବକଙ୍କ ଗହଣରେ ଆଇସାଙ୍କୁ ଏହି ଭିଡ଼ିଓରେ ଦେଖିବାକୁ ମିଳୁଛି ।

ତେବେ ଏବିଭିପିର ଭୂମିକା ସମ୍ପର୍କରେ ଅଧିକରୁ ଅଧିକ ତଥ୍ୟ ସାମନାକୁ ଆସିଛି । ହାତରେ ରଡ୍ ଓ ଲାଠି ଧରିଥିବା ଏକ ଗୋଷ୍ଠୀର ଫଟୋ ଭାଇରାଲ୍ ହୋଇଛି । ଜେଏନୟୁ କ୍ୟାମ୍ପସ୍ ବାହାରେ ଏହି ଫଟୋ ରବିବାର ଅପରାହ୍ନରେ ଉଠାଯାଇଛି । ଯେଉଁଥିରେ ଅଛନ୍ତି ଏବିଭିପିର ଜେଏନୟୁ କାର୍ଯ୍ୟକାରୀ କମିଟି ସଭ୍ୟ ବିକାଶ ପଟେଲ । ତାଙ୍କ ପାଖରେ ଚିହ୍ନଟ ଛାତ୍ରଜଣଙ୍କ ବି ଏବିଭିପିର । ତାଙ୍କ ନାଁ ଶିବପୂଜନ ମଣ୍ଡଳ । ଜେଏନୟୁରେ ସ୍ନାତକ ପ୍ରଥମବର୍ଷର ସେ ଛାତ୍ର । ଅନ୍ୟ ଏକ ଫଟୋରେ ଲାଠି ଓ ଲୁହା ରଡ୍ ଧାରୀ ଦଳେ ଯୁବକଙ୍କ ଗହଣରେ ମଣ୍ଡଳ ଜେଏନୟୁ କ୍ୟାମ୍ପସ୍ ରେ ପଶୁଛନ୍ତି । ଅନ୍ୟ ଏକ ଭିଡ଼ିଓରେ ମଣ୍ଡଳ ହାତରେ ରଡ୍ ଧରି ଜେଏନୟୁ କ୍ୟାମ୍ପସରୁ ଫେରୁଥିବା ଦେଖିବାକୁ ମିଳୁଛି ।

ପଟେଲ ଓ ମଣ୍ଡଳ ସୋସିଆଲ୍ ମିଡ଼ିଆ ଆକାଉଣ୍ଟକୁ ଉଡ଼ାଇ ଦେଇଥିବା ବେଳେ ଆରଏସଏସ ବନ୍ଧୁ ଗୋଷ୍ଠୀର ଏକ ହ୍ୱାଟସଆପ୍ ଗ୍ରୁପ୍ ରେ ବାମପନ୍ଥୀ ଛାତ୍ରଗୋଷ୍ଠୀ ଉପରେ ଆଟାକ୍ ପାଇଁ ଏବିଭିପି ସମର୍ଥକଙ୍କ କଥାବାର୍ତ୍ତାରର ସ୍କ୍ରିନ୍ ସଟ୍ ପଦାକୁ ଆସିଛି । ସେଥିରେ ପଟେଲ ସାମିଲ ଥିବା ତାଙ୍କ ମୋବାଇଲ୍ ନମ୍ବର ସ୍ପଷ୍ଟ କରୁଛି । ଏହି ଗ୍ରୁପ୍ ଚାଟିଂରେ ଚିହ୍ନଟ ଅନ୍ୟ ଦୁଇଜଣ ହେଉଛନ୍ତି ଜେଏନୟୁର ସଂସ୍କୃତ ଛାତ୍ର ଯୋଗେନ୍ଦ୍ର ଭରଦ୍ୱାଜ୍ ଏବଂ ପିଏଚଡି ଛାତ୍ର ସନ୍ଦୀପ ସିଂ । ସେମାନେ ଏବିଭିପିର ସମର୍ଥକ ବୋଲି ସେମାନଙ୍କ ଟୁଇଟର ଆକାଉଣ୍ଟ ପ୍ରୋଫାଇଲ୍ ରୁ ଜଣାପଡ଼ିଛି । ହ୍ୱାଟସଆପ୍ କଥାବାର୍ତ୍ତାରେ ଭରଦ୍ୱାଜ୍ ଲେଫ୍ଟ ଟେରର୍ ଖତମ୍ କରିବାକୁ ଆହ୍ୱାନ ଦେଉଛନ୍ତି । ସେମାନଙ୍କୁ ଧରି ନିର୍ଘାତ୍ ପିଟିବାକୁ କହୁଛନ୍ତି ।

ଏହି ଫଟୋ ଓ ହ୍ୱାଟସଆପ୍ କଥାବାର୍ତ୍ତାର ସ୍କ୍ରିନସଟ୍ ଗଣମାଧ୍ୟମରେ ଆସିବା ପରେ ଏବିଭିପି ଗାଲୁ ପେଲିବାକୁ ଉଦ୍ୟମ କରିଛି । ଉକ୍ତ ଫଟୋ ଓ ହ୍ୱାଟସଆପ୍ କଥାବାର୍ତ୍ତା ସତ ନୁହେଁ, ହାତତିଆରି ବୋଲି ସଫେଇ ଦିଆଯାଇଛି ।

ଅନ୍ୟ କେତେକ ମିଡ଼ିଆ ରିପୋର୍ଟରେ ଜେଏନୟୁ ହମଲାକାରୀମାନେ ଏବିଭିପିର ବୋଲି ପ୍ରମାଣ ଦିଆଯାଇଛି । ଜେଏନୟୁ ଛାତ୍ର, ଶିକ୍ଷକ ଓ ଅନ୍ୟ କର୍ମଚାରୀଙ୍କ ପ୍ରତ୍ୟକ୍ଷଦର୍ଶୀ ବିବରଣୀ ଏବଂ ଭାଇରାଲ୍ ଭିଡ଼ିଓ ଆଧାରରେ ଏହା କୁହାଯାଉଛି । ରଡ ଓ ଲାଠି ଧରିଥିବା ମୁଖାପିନ୍ଧା ଦୁବୃର୍ତ୍ତମାନେ ଜେଏନୟୁ ହଷ୍ଟେଲ୍ ସହିତ ସମ୍ପୂର୍ଣ୍ଣ ପରିଚିତ । ରୁମ୍ କୁ ରୁମ୍ ବୁଲି ସେମାନେ ବାମପନ୍ଥୀ ସମର୍ଥକଙ୍କୁ ନିର୍ଘାତ୍ ପିଟୁଥିବା ବେଳେ ଏବିଭିପି ମାର୍କା ଛାତ୍ରଙ୍କ ପାଖ ମାଡୁ ନ ଥିଲେ ବୋଲି ପ୍ରତ୍ୟକ୍ଷଦର୍ଶୀ ଛାତ୍ରଛାତ୍ରୀ ବିଭିନ୍ନ ଗଣମାଧ୍ୟମକୁ କହିଛନ୍ତି । ଏବିଭିପିର ଜେଏନୟୁ ଛାତ୍ରସଂଘ ସଭାପତି ପ୍ରାର୍ଥୀ ମନୀଷ ଜଙ୍ଗିଡ଼ ଆକ୍ରମଣର ଶିକାର ହୋଇଥିବା ଯାହା କୁହାଯାଉଛି ତାହା ସମ୍ପୂର୍ଣ୍ଣ ମିଛ ବୋଲି ଛାତ୍ରସଂଘର କର୍ମକର୍ତ୍ତା କହିଛନ୍ତି ।

ଜେଏନୟୁ ଫି ବୃଦ୍ଧି ଓ ସିଏଏ ବିରୋଧରେ ଛାତ୍ରସଂଘର ଆନେ୍ଦାଳନକୁ ଦବାଇବା ପାଇଁ ଏହି ଗୁଣ୍ଡାଗର୍ଦ୍ଦି କରାଯାଇଥିବା କୁହାଯାଉଛି । ଖବର ଅନୁଯାୟୀ, ଶନିବାର ଦିନ ଫି ବୃଦ୍ଧି ବିରୋଧରେ ଜେଏନୟୁ ଛାତ୍ରସଂଘ ଆନେ୍ଦାଳନ କରିଥିଲା । ଅନଲାଇନ୍ ରେଜିଷ୍ଟ୍ରେସନକୁ ବନ୍ଦ କରିବା ପାଇଁ ସ୍କୁଲ୍ ଅଫ ବାଇଓଟେକନୋଲୋଜି ପାଖରେ ଥିବା କମ୍ପୁ୍ୟଟର ଇଣ୍ଟିଗ୍ରେଟେଡ଼ ସର୍ଭିସ ବ୍ଲକ୍ ସାମନାରେ ଛାତ୍ରଛାତ୍ରୀମାନେ ଏକାଠି ହୋଇଥିଲେ । ତେବେ ଏହାକୁ ନେଇ ଉତକ୍ଷିପ୍ତ ହୋଇଥିଲେ ଏବିଭିପି ସମର୍ଥକ । ଛାତ୍ରସଂଘର ମୁକାବିଲା ପାଇଁ ପ୍ରସ୍ତୁତି ହୋଇଥିଲେ ।

ମିଡ଼ିଆ ରିପୋର୍ଟ ଅନୁଯାୟୀ, ରବିବାର ମଧ୍ୟାହ୍ନରୁ ଜେଏନୟୁ ଆଡମିନିଷ୍ଟ୍ରେଟିଭ୍ ବ୍ଲକ୍ ସାମନାରେ ଏବିଭିପିର ୨୦୦ରୁ ଅଧିକ ସମର୍ଥକ ମେଳି କରିଥିଲେ । ହାତରେ ଲୁହାରଡ଼ ଓ ଲାଠି ଧରି ସଂଧ୍ୟାବେଳେ ଆଗ ସିଧା ପେରିୟାର୍ ହଷ୍ଟେଲ୍ ରେ ପଶିଥିଲେ । ବାଟରେ ଯାହାକୁ ଦେଖିଲେ ଡରେଇଲେ, ପିଟିଲେ । ଜିନିଷ, ଗାଡ଼ିମଟର ଗୁଣ୍ଡ କଲେ । ସେଠି ଅଧଘଣ୍ଟା ଉତ୍ପାତ କଲା ପରେ ସାବରମତୀ ହଷ୍ଟେଲ୍ ପଶି ଥରେଇଲେ ।

ଦୃବୃର୍ତ୍ତଙ୍କ ମାଡ଼ରେ ଗୁରୁତର ଆହତ ହୋଇଥିବା ଛାତ୍ରସଂଘର ସଭାପତି ଆଇଶା ଘୋଷ କହିଛନ୍ତି, ଜେଏନୟୁ ସୁରକ୍ଷା କର୍ମୀ ଏବଂ ଗୁଣ୍ଡାମାନଙ୍କ ସଲାସୁତରାରେ ଏହି ସଂଘବଦ୍ଧ ଆକ୍ରମଣ ହୋଇଛି । ଉପସଭାପତି ସକେତ ମୁନ୍ ଙ୍କ କହିବାନୁଯାୟୀ, ଦୁଇଘଣ୍ଟା ଧରି ଆମେ ପୁଲିସକୁ ଖବର ଦେଇ ଚାଲିଥିଲେ ମଧ୍ୟ ପୁଲିସର ଦେଖା ମିଳିଲାନି । ଆମେନଷ୍ଟି ଇଣ୍ଟର ନ୍ୟାସନାଲ୍ ଇଣ୍ଡିଆ ଜେଏନୟୁ ହମଲା ପାଇଁ ପୁଲିସକୁ ଦାୟୀ କରିଛି । ଜାମିଆ ଭଳି ଜେଏନୟୁରେ ପୁଲିସ ଫେଲ୍ ମାରିଥିବା ଦର୍ଶାଇଛି । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହାକୁ ‘ଫାସିଷ୍ଟ ସର୍ଜିକାଲ୍ ଷ୍ଟ୍ରାଇକ୍’ ବୋଲି କହିଛନ୍ତି ।

ଜେଏନୟୁ ହମଲାକୁ ନେଇ ସାରା ଦେଶରେ ଭୀଷଣ ପ୍ରତିକ୍ରିୟା ସୃଷ୍ଟି ହୋଇଛି । ବିଭିନ୍ନ ବିଶ୍ୱବିଦ୍ୟାଳୟ ଛାତ୍ରସଂଘ ଓ ସଂଗଠନ ଏହାର ପ୍ରତିବାଦରେ ରାସ୍ତାକୁ ଓହ୍ଲାଇଛନ୍ତି । ରାଜନୈତିକ ବ୍ୟକ୍ତିବିଶେଷ ଓ ବୁଦ୍ଧିଜୀବୀମାନେ ତୀବ୍ର ସମାଲୋଚନା କରିଛନ୍ତି । କଂଗ୍ରେସ ପକ୍ଷରୁ ଗୃହମନ୍ତ୍ରୀ ଅମିତ୍ ଶାହାଙ୍କ ଇସ୍ତଫା ଦାବି କରାଯାଇଥିବା ବେଳେ ବିଶ୍ୱବିଦ୍ୟାଳୟକୁ ରାଜନୈତିକ ଆଡ୍ଡା ହେବାକୁ ଦିଆଯିବନି ବୋଲି ମାନବସମ୍ବଳ ବିକାଶ ମନ୍ତ୍ରୀ ରମେଶ ପୋଖ୍ରିିୟାଲ୍ କହିଛନ୍ତି । ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜେଏନୟୁ ଘଟଣାକୁ ନାପସନ୍ଦ କରିଛନ୍ତି । ଛାତ୍ରମାନଙ୍କ ଉପରେ ଏଭଳି ଆକ୍ରମଣ ଗ୍ରହଣୀୟ ନୁହେଁ ବୋଲି ସେ କହିଛନ୍ତି ।

ଆକ୍ରମଣ ଘଟଣାକୁ ନେଇ ଜେଏନୟୁ ଛାତ୍ରଛାତ୍ରୀମାନେ ଆତଙ୍କିତ ହୋଇପଡ଼ିଛନ୍ତି । ଅଧିକାଂଶ ଛାତ୍ରଛାତ୍ରୀ ଭୟରେ ହଷ୍ଟେଲ୍ ଛାଡ଼ିଛନ୍ତି । ସେପଟେ କ୍ୟାମ୍ପସ୍ ଭିତରେ ଓ ବାହାରେ ପୁଲିସ ଛାଉଣି କରିଛନ୍ତି । ମାମଲାର ମାଷ୍ଟରମାଇଣ୍ଡ ଖୋଜିବାକୁ ଦିଲ୍ଲୀ ପୁଲିସ ଛାନଭିନ୍ ଚଳାଇଛି ।