ଅମିତାଭ-ଅଭିଷେକ ବଚ୍ଚନଙ୍କୁ କରୋନା

ମୁମ୍ବାଇ: ବଲିଉଡ୍ ଶେହେନସାହ ବିଗ୍ ବି ଅମିତାଭ ବଚ୍ଚନ ଓ ପୁଅ ଅଭିଷେକଙ୍କୁ କରୋନା । ଦୁହିଁଙ୍କର କୋଭିଡ୍ ଟେଷ୍ଟ ପଜିଟିଭ୍ ଆସିଥିବାରୁ ଚିକିତ୍ସା ପାଇଁ ମୁମ୍ବାଇସ୍ଥିତ ଲୀଳାବତୀ ହସ୍ପିଟାଲ୍ ରେ ଭର୍ତ୍ତି ହୋଇଛନ୍ତି । ଆଜି ରାତିରେ ପ୍ରଥମେ ବିଗ୍ ବି ଏବଂ ପରେ ଜୁନିୟର୍ ବଚନ ଟୁଇଟ୍ ଯୋଗେ ଏହି ସୂଚନା ଦେଇଛନ୍ତି । ତାଙ୍କ ପରିବାରବର୍ଗ ଏବଂ ଘରୋଇ ଷ୍ଟାଫ୍ ଙ୍କର କୋଭିଡ୍ ଟେଷ୍ଟ କରାଯାଇଥିବା ସେମାନେ ସୂଚନା ଦେବା ସହ ୧୦ ଦିନ ମଧ୍ୟରେ ତାଙ୍କ ସଂସ୍ପର୍ଶରେ ଆସିଥିବା ସମସ୍ତେ ନିଜର କୋଭିଡ୍ ଟେଷ୍ଟ କରାଇ ନେବାକୁ ବିଗ୍ ବି ଅନୁରୋଧ କରିଛନ୍ତି ।

ଅତ୍ୟନ୍ତ ଶୃଙ୍ଖଳିତ ଜୀବନଯାପନ କରୁଥିବା ୭୭ ବର୍ଷୀୟ ଅମିତାଭ ବଚ୍ଚନ କରୋନାରେ ଆକ୍ରାନ୍ତ ହୋଇ ହସ୍ପିଟାଲ୍ ରେ ଭର୍ତ୍ତି ହେବାର ଖବର ଆଲୋଡ଼ନ ସୃଷ୍ଟି କରିଛି । କରୋନା ଭାଇରସ୍ କୁ ଦୂରେଇ ରଖିବା ପାଇଁ ସାମାଜିକ ଦୂରତା ରକ୍ଷା ଓ ମାସ୍କ ପିନ୍ଧିବା ପାଇଁ ଲୋକଙ୍କୁ ସଚେତନାର ବାର୍ତ୍ତା ଦେଉଥିବା ବଲିଉଡ୍ ର ଏହି କିମ୍ବଦନ୍ତୀ ପୁରୁଷ ନିଜେ କଠୋର ଶୃଙ୍ଖଳିତ ଜୀବନଯାପନ କରୁଥିଲେ ମଧ୍ୟ କରୋନାରେ ଆକ୍ରାନ୍ତ ହେବାର ଖବର ସମସ୍ତଙ୍କୁ ତାଜୁବ କରିଛି । କରୋନା ଭାଇରସ୍ ଭୟାବହତାର ଏହା ଜ୍ୱଳନ୍ତ ଉଦାହରଣ ବୋଲି କୁହାଯାଉଛି ।

ତାଙ୍କ ପରିବାରବର୍ଗଙ୍କ ରକ୍ତ ଓ ସ୍ୱାବ୍ ନମୁନା ସଂଗ୍ରହ କରାଯାଇ ଟେଷ୍ଟ ପାଇଁ ପଠାଯାଇଥିଲେ ମଧ୍ୟ ରିପୋର୍ଟ ଆସିନାହିଁ । ବିଗ୍ ବି ଙ୍କ ଆଶୁ ଆରୋଗ୍ୟ ପାଇଁ ଦେଶବାସୀ ପ୍ରାର୍ଥନା କରିଛନ୍ତି । ସମସ୍ତେ ନିରାପଦରେ ରୁହନ୍ତୁ ଏବଂ ସେମାନଙ୍କ ସ୍ୱାସ୍ଥ୍ୟ ପାଇଁ କେହି ଭୟଭୀତ ନ ହେବାକୁ ଅଭିଷେକ ଅନୁରୋଧ କରିଛନ୍ତି । ଉଭୟଙ୍କର ସାମାନ୍ୟ ଲକ୍ଷଣ ରହିଥିବା ତାଙ୍କ ଟ୍ୱିଟ୍ ରେ ଦର୍ଶାଇଛନ୍ତି ଅଭିଷେକ ।
ସେପଟେ ମେଗାଷ୍ଟାର୍ ରେଖାଙ୍କ ସିକୁ୍ୟରିଟି ଗାର୍ଡ କରୋନାରେ ଆକ୍ରାନ୍ତ ହୋଇଥିବା ଖବର ଆସିଛି ।