କ୍ୟାମ୍ପସ୍ ଚୟନରେ କିଟ୍ ଇଂଜିନିୟରିଂ ଛାତ୍ରଛାତ୍ରୀଙ୍କ ରେକର୍ଡ

ଭୁବନେଶ୍ୱର: କରୋନା ଲକଡାଉନ୍ ପାଇଁ ଦେଶର ଅର୍ଥନୀତି ମନ୍ଥର ହୋଇଥିବା ବେଳେ ହୋଇଥିବା ଜୀବିକା ସନ୍ଧାନରେ ସଫଳ ହୋଇଛନ୍ତି କିଟ୍ ରୁ ଉତ୍ତୀର୍ଣ୍ଣ ଇଂଜିନିୟରିଂ ଛାତ୍ରଛାତ୍ରୀ । ୩୬୫୦ ଚାକିରି ଧରି କିଟ୍ କୁ କ୍ୟାମ୍ପସ୍ ଚୟନରେ ଆସିଥିଲେ ୧୫୦ କମ୍ପାନୀ । ଯେଉଁଥିରେ ୧୧୦୦ ଛାତ୍ରଛାତ୍ରୀଙ୍କୁ ଏକାଧିକ ଚାକିରି ଅଫର୍ ମିଳିଛି । ୩୦ ଲକ୍ଷ ଦରମା ପ୍ୟାକେଜ୍ ରେ ବି ନିଯୁକ୍ତି ଅଫର୍ ପାଇଛନ୍ତି ଛାତ୍ରଛାତ୍ରୀ ।

ଲକଡାଉନ୍ ଯୋଗୁଁ ଦେଶର ଅର୍ଥନୀତିରେ ମାନ୍ଦାବସ୍ଥା ସୃଷ୍ଟି ହୋଇଥିବା ବେଳେ ନିଯୁକ୍ତି ପ୍ରକ୍ରିୟା ବାଧାପ୍ରାପ୍ତ ହୋଇଛି । ମାତ୍ର ଏଭଳି ସଙ୍କଟ ସତ୍ତ୍ୱେ କିଟ୍ ବିଶ୍ୱବିଦ୍ୟାଳୟ ଅଧୀନସ୍ଥ ୨୦୨୦ ବ୍ୟାଚ୍ ର ବି.ଟେକ୍ ଛାତ୍ରଛାତ୍ରୀଙ୍କୁ ବଡ଼ ବଡ଼ କମ୍ପାନୀରେ ନିଯୁକ୍ତି ସୁଯୋଗ ମିଳିଥିବା କିଟ୍ କର୍ତ୍ତୃପକ୍ଷ ସୂଚନା ଦେଇଛନ୍ତି ।

ଆମାଜନ୍, ଆସେଂଚ୍ୟୁର, କ୍ୟାପଜେମିନି, ୱିପ୍ରୋ, କଗନିଜାଣ୍ଟ ସମେତ ୧୫୦ ରୁ ଅଧିକ ବହୁଦେଶୀୟ ଏବଂ ଦେଶୀୟ କମ୍ପାନୀ କିଟ୍ କୁ କ୍ୟାମ୍ପସ୍ ଚୟନରେ ଆସିଥିଲେ । ବ୍ୟାଚ୍ ର ୩୫୦୦ ଛାତ୍ରଛାତ୍ରୀମାନଙ୍କ ମଧ୍ୟରୁ ରେକର୍ଡ ସଂଖ୍ୟକ ୧୧୦୦ ଛାତ୍ରଛାତ୍ରୀ ନିଯୁକ୍ତି ସୁଯୋଗ ପାଇ ସଫଳତା ହାସଲ କରିଛନ୍ତି । ଅନେକଙ୍କୁ ଏକାଧିକ କମ୍ପାନୀରେ ନିଯୁକ୍ତି ଅଫର୍ ମିଳିଛି । ଏମାନଙ୍କୁ ମିଶାଇ ବ୍ୟାଚ୍ ର ୯୦% ରୁ ଅଧିକ ଛାତ୍ରଛାତ୍ରୀ ଏକାଡେମିକ୍ ପ୍ଲେସମେଣ୍ଟ ପାଇଥିବା କିଟ୍ ପକ୍ଷରୁ କୁହାଯାଇଛି ।