ଭୁବନେଶ୍ୱର(ମିଡ-ଡେ ଓଡ଼ିଶା): ପାଟିଲ ରାଜେଶ ପ୍ରଭାକର । ୨୦୦୫ ବ୍ୟାଚର୍ ଏହି ଯୁବ ଆଇଏଏସ୍ ସମଗ୍ର ଓଡ଼ିଶାବାସୀଙ୍କ ପାଖରେ ବେଶ୍ ପରିଚିତ । ୨୦୦୯ ସାଧାରଣ ନିର୍ବାଚନ ବେଳେ ଆଠଗଡ଼ ଆସନରେ ବିଜେଡ଼ି ପ୍ରାର୍ଥୀ ରାଜା ସ୍ୱାଇଁଙ୍କ ପ୍ରାର୍ଥୀପତ୍ର ନାକଚ କରି ବେଶ୍ ଚର୍ଚ୍ଚାକୁ ଆସିଥିଲେ ତତ୍କାଳୀନ ଉପଜିଲ୍ଲାପାଳ ପାଟିଲ୍ । ଇତିମଧ୍ୟରେ କୋରାପୁଟ ଓ କନ୍ଧମାଳରେ ଜିଲ୍ଲାପାଳ ଦାୟିତ୍ୱ ତୁଲାଇ ସାରିଥିବା ପାଟିଲ୍ ଏବେ ମୟୁରଭଞ୍ଜରେ ଜିଲ୍ଲାପାଳ । ବର୍ଷେ କି ଦି ବର୍ଷ ନୁହେଁ ଏକକାଳୀନ ୪ ବର୍ଷ ଭାବେ ଗୋଟିଏ ଜିଲ୍ଲାରେ ରହି ସେ ରେକର୍ଡ ସୃଷ୍ଟି କରିଛନ୍ତି ।
୨୭.୦୭.୨୦୧୨ ରେ ମୟୁରଭଞ୍ଜ ଜିଲ୍ଲାପାଳ ଭାବେ ଯୋଗଦେଇଥିଲେ ପାଟିଲ୍ ରାଜେଶ ପ୍ରଭାକର । ସେବେଠାରୁ ତାଙ୍କୁ ରାଜ୍ୟ ସରକାର ଡିଷ୍ଟ୍ରବ୍ କରିନାହାନ୍ତି । ଏହି ସମୟ ମଧ୍ୟରେ ଅନେକବାର ଆଇଏଏସ୍ ଅଦଳବଦଳ ହୋଇଛି । ଜିଲ୍ଲାପାଳସ୍ତରରେ ରୁଟିନ୍ ବଦଳି ହୋଇଛି । ମାତ୍ର ପାଟିଲ୍ ଙ୍କୁ ସରକାର ହାତ ମାରିନାହାନ୍ତି । ଗୋଟିଏ ପଦରେ ଜଣେ ଆଇଏଏସ୍ ଅଧିକାରୀ ସର୍ବାଧିକ ୩ ବର୍ଷ ରହିବାର ନିୟମ ରହିଛି । ମାତ୍ର ପାଟିଲ୍ଙ୍କ କ୍ଷେତ୍ରରେ ସରକାର ଏହି ନିୟମକୁ କାହିଁକି ଆଖି ବୁଜି ଦେଇଛନ୍ତି ବୁଝାପଡୁନାହିଁ ।
ପାଟିଲ୍ଙ୍କ କାର୍ଯ୍ୟଦକ୍ଷତାକୁ ସରକାର ମୟୁରଭଞ୍ଜ ଭଳି ଅନୁନ୍ନତ ଜିଲ୍ଲାରେ କାର୍ଯ୍ୟରେ ଲଗାଇ ସଫଳତା ପାଇଥିବା କେହି ଅସ୍ୱୀକାର କରୁନାହାନ୍ତି । ତେବେ ସରକାର ଯଦି ଭାବୁଥାଆନ୍ତି ପାଟିଲ୍ ସେଠାରୁ ବଦଳି ହୋଇଗଲେ ମୟୁରଭଞ୍ଜ ଜିଲ୍ଲାର ବିକାଶ ବାଧାପ୍ରାପ୍ତ ହେବ ତେବେ ତାହାଠାରୁ ଭଳି ସାଂଘାତିକ କଥା କିଛି ନାହିଁ । ଏହାଦ୍ୱାରା ସରକାର ଅନ୍ୟ ଆଇଏଏସ୍ ଅଫିସରଙ୍କ ଦକ୍ଷତାକୁ ନ୍ୟୁନ ଦୃଷ୍ଟିରେ ଦେଖୁଛନ୍ତି ଅଥବା ସେମାନଙ୍କର ଦକ୍ଷତା ନାହିଁ । ତେବେ ସେ ଯାହା ହେଉନା କାହିଁକି ପାଟିଲ ଗୋଟିଏ ଜିଲ୍ଲାରେ ଏତେବର୍ଷ ଧରି ରହିବା ପଛର ରହସ୍ୟକୁ ନେଇ ଆଇଏଏସ୍ କରିଡରରେ ବେଶ୍ ଚର୍ଚ୍ଚା ।
