ଭୁବନେଶ୍ୱର: ଗୋଟିଏ ସପ୍ତାହ ବିତିଗଲା ପରେ ବି ପ୍ରଳୟଙ୍କରୀ ‘ଫନି’ ରେ ଧ୍ୱସ୍ତ ବିଧ୍ୱସ୍ତ ପୁରୀ ଓ ଭୁବନେଶ୍ୱର ସହର ସଜାଡି ହୋଇପାରିନାହିଁ । ପୁରୀ ଅବସ୍ଥା ନିକଟ ଭବିଷ୍ୟତରେ ସଜାଡ଼ି ହେବାର ସମ୍ଭାବନା ଦିଶୁ ନ ଥିଲା ବେଳେ ଭୁବନେଶ୍ୱରରେ ସ୍ଥିତି କ୍ରମେ ସ୍ୱାଭାବିକ ହେଉଛି । ତେବେ ସହରର ଅନେକ ଜାଗା ଏବେ ବି ଅନ୍ଧାରରେ । ବିଜୁଳି ଓ ପାଣି ବିନା ଲୋକ ଛଟପଟ ଅବସ୍ଥାରେ ପଡ଼ିଛନ୍ତି । ୧୨ ତାରିଖ ସୁଦ୍ଧା ସବୁ ଅଞ୍ଚଳକୁ ବିଜୁଳି ସଂଯୋଗ ହୋଇଯିବ ବୋଲି ରାଜ୍ୟ ସରକାର ଦମ୍ଭ ମାରିଥିବାରୁ ରାଜଧାନୀବାସୀ ଅନେଇ ବସିଛନ୍ତି । ଗତକାଲି ରାତି ଯାଏଁ ସହରର ଅଣ ଭିଆଇପି ଅଞ୍ଚଳରୁ ଗଛ ଓ ଭଙ୍ଗା ବିଜୁଳି ଖୁଣ୍ଟ ଉଠି ନ ଥିବାରୁ ପ୍ରଶାସନ ଉପରେ ଲୋକଙ୍କ ଅସନ୍ତୋଷ ବଢ଼ିଯାଇଥିଲା । ଆଜି ପ୍ରଶାସନର ଚେତା ପଶିଛି । ରାଜଧାନୀରେ ଡୋର୍ ଟୁ ଡୋର୍ କାମ ଆରମ୍ଭ କରିଛି । ଓଲଡ୍ ଟାଉନ, ଲକ୍ଷ୍ମୀସାଗର ଆଦି ଅଞ୍ଚଳରେ ଯୁଦ୍ଧ ବଳ ଖଟେଇ ଦେଇଛି ।
ଅଣଦେଖା ଅନୁଭବ ହେଉଥିବା ଏହିସବୁ ଅଞ୍ଚଳରେ ଆଜି ସକାଳୁ ସକାଳୁ ଗଛସଫା କାମ ଆରମ୍ଭ ହୋଇଥିଲା । ଏନଡିଆରଏଫ ଓ ଓଡ୍ରାଫ ଟିମ୍ ରାସ୍ତାଘାଟ ଓ ଘର ଆଗରେ ପଡ଼ିରହିଥିବା ଗଛଗୁଡ଼ିକୁ କାଟି ସଫା କରିଥିଲେ । ରାସ୍ତା ଅବରୋଧ କରିଥିବା ବିଜୁଳି ଖୁଣ୍ଟିଗୁଡ଼ିକୁ ବିଦୁ୍ୟତ କର୍ମଚାରୀମାନେ କ୍ଲିଅର୍ କରିଥିଲେ । ଆଜି ଗୋଟିଏ ଦିନରେ ୮୦ ପ୍ରତିଶତ କାମ ହୋଇଥିବା କୁହାଯାଉଛି ।
ସେପଟେ ବାତ୍ୟା ଦ୍ୱାରା ବିଶେଷ ପ୍ରଭାବିତ ୫ଟି ଜିଲ୍ଲା କଟକ, ପୁରୀ, ଖୋର୍ଦ୍ଧା, ଜଗତସିଂହପୁର ଏବଂ କେନ୍ଦ୍ରାପଡ଼ା ଜିଲ୍ଲାର ସରକାରୀ ଅଫିସଗୁଡ଼ିକ ଦ୍ୱିତୀୟ ଶନିବାର ଓ ରବିବାରରେ ଖୋଲା ରଖିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଦେ୍ର୍ଦଶ ଦେଇଛନ୍ତି । ବାବୁ ଓ କର୍ମଚାରୀଙ୍କ ଏହି ଦୁଇଦିନର ଛୁଟିକୁ ବାତିଲ କରାଯାଇଛି । ରିଲିଫ୍ ଓ ଥଇଥାନ କାର୍ଯ୍ୟ ତ୍ୱରାନ୍ୱିତ କରିବା ପାଇଁ ଏହି ପଦକ୍ଷେପ ନିଆଯାଇଥିବା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି ।
