ବିମାନ ଦୁର୍ଘଟଣା ମୃତ୍ୟୁସଂଖ୍ୟା ୧୮କୁ ବଢ଼ିଲା

କୋଜିକୋଡ଼/କେରଳ: କେରଳର କୋଜିକୋଡ଼ ବିମାନବନ୍ଦରରେ ଏୟାର ଇଣ୍ଡିଆ ଏକ୍ସପ୍ରେସ୍ ବିମାନ ଦୁର୍ଘଟଣା(କ୍ରାସ୍ ଲ୍ୟାଣ୍ଡିଂ)ରେ ମୃତ୍ୟୁସଂଖ୍ୟା ୧୮କୁ ବୃଦ୍ଧି ପାଇଛି । ୧୨୭ ଜଣ ଆହତ ବିଭିନ୍ନ ହସ୍ପିଟାଲ୍ ରେ ଚିକିତ୍ସିତ ହେଉଛନ୍ତି । କେଉଁ ପରିସ୍ଥିତିରେ ବିମାନ ଦୁର୍ଘଟଣା ହେଲା ଏଏଆଇବି, ଡିଜିସିଏ ଏବଂ ବିମାନ ବନ୍ଦର ସୁରକ୍ଷା ବାହିନୀ ପକ୍ଷରୁ ତଦନ୍ତ ଆରମ୍ଭ ହୋଇଛି । ବିମାନର ଡିଜିଟାଲ୍ ଫ୍ଲାଇଟ୍ ରେକର୍ଡର ଡାଟା ମିଳିଥିବା ଡିଜିସିଏ ପକ୍ଷରୁ ସୂଚନା ଦିଆଯାଇଛି । ଇତିମଧ୍ୟରେ ଉଦ୍ଧାର କାର୍ଯ୍ୟ ପାଇଁ ଦିଲ୍ଲୀ ଓ ମୁମ୍ବାଇରୁ ଦୁଇଟି ବିମାନ କେରଳରେ ପହଞ୍ଚିଛି ।

‘ବନ୍ଦେ ଭାରତ ମିଶନ’ ର ଏହି ବିମାନଟି ୧୯୦ ଯାତ୍ରାଙ୍କୁ ଧରି ଦୁବାଇରୁ ଆସିଥିଲା । ସେଥିରେ ୧୭୪ ଯାତ୍ରୀ, ୧୦ ଶିଶୁ, ଦୁଇ ପାଇଲଟ୍ ଏବଂ ୪ ବିମାନ କର୍ମଚାରୀ ଥିଲେ । ସଂଧ୍ୟା ପ୍ରାୟ ୭.୫୦ ମିନିଟ୍ ରେ ବିମାନଟି କୋଜିକୋଡ଼ ବିମାନବନ୍ଦରରେ ପହଞ୍ଚିଲା ବେଳକୁ ପ୍ରବଳ ବର୍ଷା ହେଉଥିଲା । ପାଇଲଟ୍ କ୍ୟାପଟେନ୍ ଦୀପକ ବସନ୍ତ ସାଥେ ବିମାନଟିକୁ ସୁରକ୍ଷିତ ଭାବେ ଅବତରଣ କରାଇବାକୁ ଦୁଇଥର ଉଦ୍ୟମ କରିଥିଲେ ମଧ୍ୟ ସମ୍ଭବ ହୋଇ ନ ଥିଲା । ତେବେ ତୃତୀୟ ଉଦ୍ୟମରେ ବିମାନଟିକୁ ଅବତରଣ କଲାବେଳକୁ ରନୱେରେ ଏହା ସ୍ଲିପ୍ କରି ୩୫ ଫୁଟ୍ ତଳକୁ ଗଡଯାଇଥିଲା । ପାଚେରୀରେ ଧକ୍କା ହୋଇ ଦୁଇଖଣ୍ଡ ହୋଇଯାଇଥିଲା ବିମାନ ।

ଦୁର୍ଘଟଣା ସୁନିଶ୍ଚିତ ଜାଣିବା କ୍ଷଣି ପାଇଲଟ୍ ବିମାନ ଇଞ୍ଜିନ୍ ବନ୍ଦ କରିଦେଇଥିବାରୁ ସମ୍ଭବତଃ ବିମାନଟି ଅଗ୍ନିକାଣ୍ଡରୁ ବର୍ତ୍ତି ଯାଇଥିଲା । ତେବେ ଦୁର୍ଘଟଣାରେ ପାଇଲଟ୍ କ୍ୟାପଟେନ୍ ସାଥେ ଏବଂ କୋ ପାଇଲଟ୍ ଅଖିଳେଶ କୁମାରଙ୍କର ମୃତ୍ୟୁ ହୋଇଥିଲା । ବିମାନ ଭିତରେ ଏବଂ ହସ୍ପିଟାଲ୍ ରେ ଆଉ ୧୬ ଜଣ ଯାତ୍ରୀଙ୍କର ମୃତ୍ୟୁ ହୋଇଛି । ହସ୍ପିଟାଲ୍ ରେ ୧୦ ରୁ ଅଧିକ ଗୁରୁତର ଆହତ ଅବସ୍ଥାରେ ଚିକିତ୍ସିତ ହେଉଛନ୍ତି ।

ରାଷ୍ଟ୍ରପତି ରାମନାଥ କୋବିନ୍ଦ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ସବୁ ରାଜନୈତିକ ଦଳର ନେତୃବୃନ୍ଦ ଏହି ଘଟଣାରେ ଦୁଃଖ ପ୍ରକାଶ କରିଛନ୍ତି । କେରଳ ମୁଖ୍ୟମନ୍ତ୍ରୀ ପିନରାଇ ବିଜୟନ୍ ଘଟଣାସ୍ଥଳରେ ପହଞ୍ଚି ଦୁର୍ଘଟଣାସ୍ଥଳ ଅନୁଧ୍ୟାନ କରିଛନ୍ତି । ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଦୁର୍ଘଟଣାକୁ ନେଇ ଦୁଃଖପ୍ରକାଶ କରିବା ସହ ମୃତଙ୍କ ପରିବାରକୁ ସମବେଦନା ଜଣାଇଛନ୍ତି ।