ଭୁବନେଶ୍ୱର: ଜୁଲାଇ ମାସ ଆରମ୍ଭରୁ ରାଜ୍ୟରେ ଭୟଙ୍କର ରୂପ ନେଇଛି କରୋନା । ଦ୍ରୁତ ଗତିରେ ବଢୁଛି ସଂକ୍ରମଣ । ଆଉ ଘରେ ସୀମିତ ନାହିଁ କରୋନା । ଦୋକାନ, ଅଫିସ୍, ଥାନା, ହସ୍ପିଟାଲ୍ ସବୁଠି ପଶିଲାଣି । ଶୁକ୍ରବାର ଦିନ ରାଜ୍ୟରେ ରେକର୍ଡ ସଂଖ୍ୟକ ୫୬୧ ପଜିଟିଭ୍ ବାହାରିଥିବା ବେଳେ ଗତକାଲି ବାହାରିଥିଲେ ୪୯୫ । ଆଜି ଆଉ ୪୬୯ ପଜିଟିଭ୍ ସହ ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା ୯ ହଜାର ପାର୍ ହୋଇଛି ।
ଖାଲି ସଂକ୍ରମଣ ନୁହେଁ, କରୋନା ମୃତ୍ୟୁ ସଂଖ୍ୟା ବି ବଢ଼ିଲାଣି । ଗତକାଲି ୫ ଜଣଙ୍କର ଜୀବନ ନେଇଥିବା କରୋନା ଆଜି ଆଉ ୨ ଜଣଙ୍କର ଜୀବନ ନେଇଛି । ଗଜପତି ଓ ସୁନ୍ଦରଗଡ଼ ଜିଲ୍ଲାରୁ ଜଣେ ଲେଖାଏଁ ରୋଗୀ ଆଖି ବୁଜିଛନ୍ତି । ରାଜ୍ୟରେ ଏବେ କରୋନା ମୃତ୍ୟୁ ସଂଖ୍ୟା ୩୬ କୁ ବୃଦ୍ଧି ପାଇଛି ।
ଉଭୟ ଆକ୍ରାନ୍ତ ଓ ମୃତ୍ୟୁ ସଂଖ୍ୟାରେ ଗଞ୍ଜାମ ଜିଲ୍ଲା ଏକ ନମ୍ବରରେ ରହିଛି । ଆଜି ମଧ୍ୟ ଗଞ୍ଜାମରୁ ଆସିଛନ୍ତି ସର୍ବାଧିକ ୧୧୬ ପଜିଟିଭ୍ । ଜିଲ୍ଲାରେ ଆକ୍ରାନ୍ତଙ୍କ ସଂଖ୍ୟା ୨୧୮୨ ହୋଇଥିବା ବେଳେ ୨୦ ଜଣ ମୃତ୍ୟୁ ବରଣ କଲେଣି ।
ଆଜି କେଉଁ ଜିଲ୍ଲାରୁ କେତେ
ଅନୁଗୁଳ-୧୧, ବାଲେଶ୍ୱର-୮, ଭଦ୍ରକ-୧୬, ବଲାଙ୍ଗୀର-୩, କଟକ-୯୪, ଗଜପତି-୧୨, ଗଞ୍ଜାମ-୧୧୬, ଯାଜପୁର-୨୫, କଳାହାଣ୍ଡି-୨, କନ୍ଧମାଳ-୧, କେନ୍ଦ୍ରାପଡ଼ା-୫, କେନ୍ଦୁଝର-୨୫, ଖୋର୍ଦ୍ଧା-୨୭, ମାଲକାନଗିରି-୧, ମୟୁରଭଞ୍ଜ-୬, ନବରଙ୍ଗପୁର-୨, ନୟାଗଡ଼-୨୪, ପୁରୀ-୮, ସମ୍ବଲପୁର-୧୩, ସୁନ୍ଦରଗଡ଼-୬୬ । ଅମ୍ଫନ୍ ବାତ୍ୟା ଉଦ୍ଧାର କାର୍ଯ୍ୟରେ କୋଲକତା ଯାଇଥିବା ଆଉ ୪ ଏନଡିଆରଏଫ୍ ଯବାନ କରୋନାରେ ଆକ୍ରାନ୍ତ ହୋଇଛନ୍ତି ।
ତେବେ ଗତ ୨୪ ଘଣ୍ଟାରେ ୪୬୯ ନୂଆ ଆକ୍ରାନ୍ତ ଆସିଥିଲେ ମଧ୍ୟ ୨୨୯ ଜଣ ରୋଗୀ ସୁସ୍ଥ ହୋଇ ଘରକୁ ଫେରିଛନ୍ତି । ଏହିଭଳି ରାଜ୍ୟରେ ଏବେ କରୋନାରେ ଆକ୍ରାନ୍ତଙ୍କ ସଂଖ୍ୟା ୯୦୭୦ ହୋଇଥିଲା ବେଳେ ୫୯୩୪ ସୁସ୍ଥ ହେଲେଣି । ଆକ୍ଟିଭ୍ କେସ୍ ଏବେ ଅଛନ୍ତି ୩୦୯୦ ।
