ରାତି କର୍ଫ୍ୟୁ ରହିଲା, କଡ଼ା ହେଲା ଜୋରିମାନା

– ସାରା ରାଜ୍ୟରେ ରାତି ୯ରୁ ସକାଳ ୫ ଯାଏଁ କର୍ଫ୍ୟୁ
– କଣ୍ଟେନମେଣ୍ଟ ଜୋନ୍ ରେ ରହିଲା ଲକଡାଉନ୍ କଟକଣା
– ରାଉରକେଲା ସମେତ ୪ ଜିଲ୍ଲାରେ ସପ୍ତାହାନ୍ତ ସଟଡାଉନ୍
– ମାସ୍କ ନ ପିନ୍ଧିଲେ ୫ ହଜାର ଟଙ୍କା ପର୍ଯ୍ୟନ୍ତ ଫାଇନ୍

ଭୁୁବନେଶ୍ୱର: ଅଗଷ୍ଟ ମାସ ପାଇଁ ସାରା ରାଜ୍ୟରେ ରାତ୍ରିକାଳୀନ କର୍ଫ୍ୟୁ ବଳବତ୍ତର ରହିବ । ରାତି ୯ଟାରୁ ସକାଳ ୫ଟା ଯାଏଁ ଦୋକାନବଜାର, ଯାତାୟତ ପୂର୍ବଭଳି ବନ୍ଦ ରହିବ । କେବଳ ଅତ୍ୟାବଶ୍ୟକ ସେବାକୁ ଅନୁମତି ଦିଆଯାଇଛି । ସେହିଭଳି କଣ୍ଟେନମେଣ୍ଟ ଜୋନ୍ ରେ ଲକଡାଉନ୍ ସମ୍ପୂର୍ଣ୍ଣ ବଳବତ୍ତର ରହିବ । ହଟସ୍ପଟ୍ ୪ଟି ଜିଲ୍ଲା ଗଞ୍ଜାମ, ଖୋର୍ଦ୍ଧା, ଗଜପତି, କଟକ ଜିଲ୍ଲା ସମେତ ରାଉରକେଲା ମହାନଗର ନିଗମରେ ସପ୍ତାହାନ୍ତ ସଟଡାଉନ୍ କଟକଣା ରହିବ । କେବଳ ୧ ଓ ୨ ତାରିଖ(ଶନି ଏବଂ ରବିବାର) ସକାଳ ୫ଟାରୁ ଦିନ ୧ଟା ପର୍ଯ୍ୟନ୍ତ କଟକଣାମୁକ୍ତ ରହିବ । ମାସର ଅନ୍ୟ ଶନିବାର ଓ ରବିବାର କିନ୍ତୁ ସମ୍ପୂର୍ଣ୍ଣ ସଟଡାଉନ୍ ରହିବ ।

ଅଗଷ୍ଟ ୩୧ ପର୍ଯ୍ୟନ୍ତ ରାଜ୍ୟର ଧାର୍ମିକ ସ୍ଥଳଗୁଡ଼ିକ ଜନସାଧାରଣଙ୍କ ପାଇଁ ପୂର୍ବଭଳି ବନ୍ଦ ରହିବ । ଆନ୍ତର୍ଜାତୀୟ ବିମାନ ଚଳାଚଳ ବନ୍ଦ ରହିବ । ସିନେମା ହଲ୍, ସୁଇମିଂ ପୁଲ୍, ମନୋରଂଜନ ପ୍ରେକ୍ଷାଳୟ, ଥିଏଟର ଆଦି ବନ୍ଦ ରହିବ । ସାମାଜିକ କାର୍ଯ୍ୟକ୍ରମ, ରାଜନୈତିକ ସଭାସମିତି, ଖେଳକୁଦ, ଧାର୍ମିକ ସଭା ହୋଇପାରିବ ନାହିଁ । ସ୍କୁଲ, କଲେଜ, ଅଙ୍ଗନବାଡ଼ି କେନ୍ଦ୍ର ଖୋଲିବ ନାହିଁ । ତେବେ ପରୀକ୍ଷା ଏବଂ ପ୍ରଶାସନିକ କାର୍ଯ୍ୟ ଚାଲିବ । କେନ୍ଦ୍ର ସରକାରଙ୍କ ଗାଇଡଲାଇନ୍ ଆଧାରରେ ଅଗଷ୍ଟ ୫ରୁ ଯୋଗ କେନ୍ଦ୍ର ଏବଂ ଜିମନାସିୟମ୍ ଖୋଲିବ । ବାକି ଅନ୍ୟାନ୍ୟ କଟକଣା ଯେଭଳି ପୂର୍ବରୁ ଥିଲା ପ୍ରାୟ ସେୟା ରହିଛି ।

୫୦% କର୍ମଚାରୀଙ୍କୁ ନେଇ ସରକାରୀ ଅଫିସ ଚାଲିବ । ମାସ ସାରା ଶନିବାର ଦିନ ସରକାରୀ ଅଫିସ ବନ୍ଦ ରହିବ ।
ଅଗଷ୍ଟ ୧ ରୁ ୩୧ ତାରିଖ ପର୍ଯ୍ୟନ୍ତ ଏସବୁ କଟକଣା ଲାଗୁ ରହିବ ବୋଲି ସ୍ୱତନ୍ତ୍ର ରିଲିଫ୍ କମିଶନର ପ୍ରଦୀପ ଜେନା କହିଛନ୍ତି । ଏ ସଂକ୍ରାନ୍ତୀୟ ସରକାରୀ ନିଦେ୍ର୍ଦଶନାମା ଜାରି ହୋଇଛି ।

ଅନ୍ୟପକ୍ଷରେ କୋଭିଡ୍ ନିୟମ ପାଳନକୁ ଆହୁରି କଡ଼ାକଡ଼ି କରାଯାଇଛି । ସାଧାରଣ ସ୍ଥାନରେ ଲୋକ ଏକାଠି ହେବା ସମ୍ପୂର୍ଣ୍ଣ ବାରଣ କରାଯାଇଛି । ଉଲ୍ଲଂଘନକାରୀଙ୍କ ବିରୋଧରେ ଏପିଡେମିକ୍ ଡିଜିଜ୍ ଆକ୍ଟ(ସଂଶୋଧିତ) ଅନୁଯାୟୀ ଦଣ୍ଡବିଧାନ ହେବ । ମାସ୍କ ନ ପିନ୍ଧିଲେ ଏଣିକି ଅଧିକ ଜୋରିମାନା ଦେବାକୁ ହେବ । ପ୍ରଥମ ଦୁଇ ଥର ଉଲ୍ଲଂଘନ ପାଇଁ ୧ ହଜାର ଟଙ୍କା ଲେଖାଏଁ ଏବଂ ତା’ପରେ ୫ ହଜାର ଟଙ୍କା ଫାଇନ୍ ପଡ଼ିବ । ବାହାଘର ଉତ୍ସବରେ ବର, କନ୍ୟାଙ୍କୁ ମିଶାଇ ସର୍ବାଧିକ ୫୦ ଜଣ ଉପସ୍ଥିତ ରହିପାରିବେ । ଅଧିକ ଗହଳି ହେଲେ ୧୦ ହଜାର ଟଙ୍କା ଫାଇନ୍ ପଡ଼ିବ । ବାହାଘରସ୍ଥଳକୁ ସିଲ୍ କରାଯିବ । ଆଗାମୀ ଦିନରେ ଏହାର ଜୋରିମାନା ରାଶି ଆହୁରି ବଢ଼ିବ ।

କୌଣସି କ୍ଷେତ୍ରରେ କଂଗ୍ରିଗେସନ୍ ବା ୧୦ ଜଣଙ୍କଠାରୁ ଅଧିକ ଲୋକଙ୍କ ଗହଳିକୁ ଅନୁମତି ଦିଆଯିବ ନାହିଁ । ଉଲ୍ଲଂଘନକାରୀ ୧୦ ହଜାର ଟଙ୍କା ଫାଇନ୍ ଦେବେ । ଦୋକାନ ବଜାରରେ ସାମାଜିକ ଦୂରତା କଡ଼ାକଡ଼ି ପାଳନ ହେବ । ଯେଉଁ ଦୋକାନରେ ଏହାର ଉଲ୍ଲଂଘନ ହେବ ମାଲିକଙ୍କ ଉପରେ ୧୦ ହଜାର ଟଙ୍କା ଫାଇନ୍ ପଡ଼ିବ । ସଂପୃକ୍ତ ଦୋକାନକୁ ୭ ଦିନ ପାଇଁ ସିଲ୍ କରି ଦିଆଯିବ । ଦ୍ୱିତୀୟ ଥର ପାଇଁ ଉଲ୍ଲଂଘନ ହେଲେ ୧୦ ହଜାର ଟଙ୍କା ଫାଇନ୍ ଏବଂ ଦୋକାନ ମାସେ ପାଇଁ ସିଲ୍ କରାଯିବ ।

ମୁଖ୍ୟ ଶାସନ ସଚିବ ଅସିତ୍ କୁମାର ତ୍ରିପାଠୀ ଏହା ସୂଚନା ଦେବା ସହ ଜନସାଧାରଣଙ୍କ ସହଯୋଗ ଲୋଡ଼ିଛନ୍ତି । ସେ କହିଛନ୍ତି, କରୋନା ଭଳି ଅଚିହ୍ନା ରୋଗର ମୁକାବିଲା କ୍ଷେତ୍ରରେ ଆମ ପାଇଁ ବହୁତ ଚାଲେଂଜ ରହିଛି । ଏହି ଯୁଦ୍ଧରେ ଆମେ କେଉଁଠି ଅଛୁ, ତାହା ଏବଠୁଁ କହି ହେବନାହିଁ । ତେବେ ଏ ପର୍ଯ୍ୟନ୍ତ ଆମେ ଭଲ ସ୍ଥିତିରେ ଅଛୁ । ଆମର ମୋର୍ଟାଲିଟି ରେଟ୍ ଦେଶରେ ସର୍ବନିମ୍ନ ଥିଲା ବେଳେ ଡିସଚାର୍ଜ ରେଟ୍ ମଧ୍ୟ ଉପରେ । ତେଣୁ ଆମକୁ ଦୃଢ଼ତାର ସହ ଆଗକୁ ଯିବା ହେବ । ରାଜ୍ୟରେ ଲୋକଙ୍କ ଜୀବନରକ୍ଷା ଆମର ମୂଳ ଲକ୍ଷ୍ୟ । ଜୀବିକା ମଧ୍ୟ ଆମ ପାଇଁ ଗୁରୁତ୍ୱପୂର୍ଣ୍ଣ । ଆମେ ଏହି ଯୁଦ୍ଧରେ ନିଶ୍ଚିତ ଜିତିବା ଏହି ଦୃଢ଼ ବିଶ୍ୱାସ ଅଛି । ସମସ୍ତଙ୍କ ସହଯୋଗ ନେଇ ଆମକୁ ଯିବାକୁ ପଡ଼ିବ ବୋଲି ମୁଖ୍ୟ ଶାସନ ସଚିବ କହିଛନ୍ତି ।