ବିଜେଡିରୁ ସଫା ‘ବିଭୀଷଣ’ ଦମ୍ପତ୍ତି

ଭୁବନେଶ୍ୱର: ଧାମନଗରର ପୂର୍ବତନ ବିଧାୟକ ମୁକ୍ତିକାନ୍ତ ମଣ୍ଡଳ ଓ ଏବଂ ଭଦ୍ରକର ପୂର୍ବତନ ସାଂସଦ ଶ୍ରୀମତୀ ମଞ୍ଜୁଲତା ମଣ୍ଡଳଙ୍କୁ ବିଜେଡିରୁ ବିଦା କରିଦେଇଛନ୍ତି ସୁପ୍ରିମୋ ନବୀନ ପଟ୍ଟନାୟକ । ଗତ ନିର୍ବାଚନର ବହୁ ପୂର୍ବରୁ ଏହି ଦମ୍ପତ୍ତି ଦଳରେ ବିଭୀଷଣ ଭୂମିକାରେ ଅବତୀର୍ଣ୍ଣ ହୋଇଥିଲେ । ସମ୍ପୂର୍ଣ୍ଣ ରୂପେ ଦଳ ବିରୋଧରେ କାର୍ଯ୍ୟ କରୁଥିଲେ । ବହୁ ବିଳମ୍ବରେ ଆଜି ସେମାନଙ୍କୁ ଦଳରୁ ନିଲମ୍ବିତ କରାଯାଇଛି । ଏହି ଦମ୍ପତ୍ତିଙ୍କ ପ୍ରସ୍ଥାନ ଭଦ୍ରକ ବିଜେଡିରେ ଖୁସିର ଲହରି ଖେଳାଇଛି ।

ଏକଦା ବିଜେଡିର ଗେହ୍ଲା ହୋଇଥିଲେ ମଣ୍ଡଳ ଦମ୍ପତ୍ତି । ଲୋକପ୍ରିୟ ବିଧାୟକ ରାଜେନ୍ଦ୍ର ଦାସଙ୍କୁ କାଟି ୨୦୧୪ରେ ମୁକ୍ତିକାନ୍ତଙ୍କୁ ଧାମନଗରରୁ ବିଜେଡି ଟିକେଟ ଦିଆଯାଇଥିଲା ଏବଂ ସେ ବିଧାୟକ ହୋଇଥିଲେ । ୨୦୧୯ରେ ତାଙ୍କ ପତ୍ନୀ ମଞ୍ଜୁଲତାଙ୍କୁ ଭଦ୍ରକ ଲୋକସଭା ଆସନରୁ ବିଜେଡି ଟିକେଟ ମିଳିଥିଲା ଏବଂ ସେ ସାଂସଦ ହୋଇଥିଲେ । ସେତେବେଳେ ଧାମନଗରରୁ ଟିକେଟ ପାଇଥିବା ରାଜେନ୍ଦ୍ର ଦାସଙ୍କୁ ହରାଇବାରେ ତାଙ୍କର ପ୍ରମୁଖ ଭୂମିକା ଥିବା ଚର୍ଚ୍ଚା ହୋଇଥିଲା । ତେବେ ହାଇକମାଣ୍ଡ ସେତେବେଳେ ଏହାକୁ ଅଣଦେଖା କରିଥିଲେ । ପରବର୍ତ୍ତୀ ସମୟରେ ସାଂସଦ ପତ୍ନୀଙ୍କୁ ଆଗରେ ରଖି ଅସଲରେ ମୁକ୍ତିକାନ୍ତ ସବୁ କାର୍ଯ୍ୟ ବୁଝିଥିଲେ । ସବୁ ବିଧାନସଭା ନିର୍ବାଚନମଣ୍ଡଳୀରେ ନିଜସ୍ୱ ସଂଗଠନ ଆରମ୍ଭ କରିଥିଲେ । ତତ୍କାଳୀନ ଭଦ୍ରକ ଜିଲ୍ଲା ବିଜେଡି ସଭାପତି ଜଗନ୍ନାଥ ସ୍ୱାଇଁ ତାଙ୍କୁ ଏଥିରେ ସହଯୋଗ କରୁଥିଲେ । ଉଭୟଙ୍କର ଦଳବିରୋଧୀ କାର୍ଯ୍ୟକୁ ନେଇ ଅସନ୍ତୋଷ ସୃଷ୍ଟି ହୋଇଥିଲା ।

୨୦୨୪ ନିର୍ବାଚନରେ ଧାମନଗରରୁ ମୁକ୍ତିକାନ୍ତ ଟିକେଟ୍ ପାଇବାକୁ ବଞ୍ଚିତ ହେଲା ପରେ ଭିତିରିଆ ଭାବେ ବିଜେପିକୁ ପୂରା ସହଯୋଗ କରିଥିବା ଅଭିଯୋଗ ହୋଇଥିଲା । ପତ୍ନୀଙ୍କୁ ପୁନର୍ବାର ସାଂସଦ ଟିକେଟ୍ ମିଳିଥିଲେ ମଧ୍ୟ ତାଙ୍କର ଅନ୍ତର୍ଘାତୀ କାର୍ଯ୍ୟ ଜାରି ରହିଥିଲା । ତାଙ୍କର ଗୋଟିଚାଳନା ଯୋଗୁଁ ଧାମନଗରରୁ ବିଜେଡି ପ୍ରାର୍ଥୀ ସଞ୍ଜୟ ଦାସ ଏବଂ ବାସୁଦେବପୁରରୁ ବିଷ୍ଣୁବ୍ରତ ରାଉତରାୟ ପରାଜୟ ବରଣ କରିଥିବା ଅଭିଯୋଗ ହୋଇଥିଲା ।

ଇତିମଧ୍ୟରେ ଜଗନ୍ନାଥ ସ୍ୱାଇଁଙ୍କୁ ଜିଲ୍ଲା ସଭାପତି ପଦରୁ ହଟାଇ ଦେଇଥିଲେ ନବୀନ । ଚାନ୍ଦବାଲି ବିଧାୟକ ବ୍ୟୋମକେଶ(ବାପି) ରାୟଙ୍କୁ ଜିଲ୍ଲା ସଭାପତି ଭାବେ ନିଯୁକ୍ତି ଦେଇଥିଲେ । ମୁକ୍ତିକାନ୍ତ ଏଥିରେ ଆହୁରି କ୍ଷୁବ୍ଧ ହୋଇ ବିଜେପି ଆଡକୁ ପାଦ ଟେକି ଦେଇଥିଲେ । ତାଙ୍କର କାର୍ଯ୍ୟ ନେଇ ବିଧାୟକ ବାପି ରାୟ, ସଞ୍ଜୀବ ମଲ୍ଲିକ, ପୂର୍ବତନ ବିଧାୟକ ବିଷ୍ଣୁପଦ ରାଉତରାୟ ଏବଂ ରାଜେନ୍ଦ୍ର ଦାସ ପ୍ରମୁଖ ନବୀନ ପଟ୍ଟନାୟକଙ୍କ ପାଖରେ ଫେରାଦ ହୋଇଥିଲେ ।