ଭୁବନେଶ୍ୱର: ପଶ୍ଚିମବଙ୍ଗ ରାଜ୍ୟପାଳ ଜଗଦୀପ୍ ଧନଖଡ଼ ଏନଡିଏ ଉପରାଷ୍ଟ୍ରପତି ପ୍ରାର୍ଥୀ ଘୋଷଣା ହେବାର ୨୪ ଘଣ୍ଟା ନ ପୂରୁଣୁ ବିଜେଡି ତାଙ୍କୁ ସମର୍ଥନ ଘୋଷଣା କରିଛି । ଏନଡିଏର ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ଓଡ଼ିଆ ମାଟିର ଆଦିବାସୀ ଝିଅ ଭାବେ ବିଜେଡି ଆଗତୁରା ସମର୍ଥନ ଦେଇଥିଲା । ମାତ୍ର ଉପରାଷ୍ଟ୍ରପତି ପ୍ରାର୍ଥୀ ଶ୍ରୀ ଧନଖଡ଼ଙ୍କ କ୍ଷେତ୍ରରେ ବିଜେଡିର ଅନୁରୂପ ଆଭିମୁଖ୍ୟ ରାଜନୈତିକ ମହଲରେ ଚର୍ଚ୍ଚାର ବିଷୟ ହୋଇଛି । ବିଜେପି ନେତୃତ୍ୱାଧୀନ ଏନଡିଏ ପ୍ରତି ବିଜେଡ଼ିର ଦୁର୍ବଳତା ସ୍ପଷ୍ଟ ହୋଇଥିବା କୁହାଯାଉଛି ।
ବିଜେଡି ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ଉପରାଷ୍ଟ୍ରପତି ପ୍ରାର୍ଥୀ ଧନକଡ଼ଙ୍କୁ ସମର୍ଥନ ଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ କଥା ହୋଇଥିଲେ । ଆଉ ଏହି କଥାବାର୍ତ୍ତା ପରେ ବିଜେଡି ତାଙ୍କୁ ସମର୍ଥନ ଦେବା ପାଇଁ ନିଷ୍ପତ୍ତି ନେଇଛି । ଜୁଲାଇ ୧୯ ରେ ନାମାଙ୍କନପତ୍ର ଦାଖଲ ବେଳେ ଉପସ୍ଥିତ ରହିବାକୁ ମଧ୍ୟ ବିଜେଡି ନିଷ୍ପତ୍ତି ନେଇଛି ।
ଏନଡିଏ ବାହାରେ ବିଜେଡି ହେଉଛି ପ୍ରଥମ ଦଳ ଯିଏ ଉପରାଷ୍ଟ୍ରପତି ପ୍ରାର୍ଥୀଙ୍କୁ ସମର୍ଥନ ଘୋଷଣା କରିଛି । ପ୍ରଧାନମନ୍ତ୍ରୀଙ୍କ ଅନୁରୋଧକୁ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ଅବିଳମ୍ବେ ଗ୍ରହଣ କରିଛନ୍ତି । ଅଗଷ୍ଟ ୬ ତାରିଖରେ ଉପରାଷ୍ଟ୍ରପତି ନିର୍ବାଚନ ହେବାକୁ ଥିବା ବେଳେ ସମର୍ଥନ ଘୋଷଣାରେ ବିଜେଡି ସବା ଆଗରେ ରହିଛି ।
ସୂଚନାଥାଉକି, ଗତଥର ଉପରାଷ୍ଟ୍ରପତି ନିର୍ବାଚନରେ ଏନଡିଏ ପ୍ରାର୍ଥୀ ଭେଙ୍କିୟା ନାଇଡୁଙ୍କୁ ବିଜେଡି ସମର୍ଥନ ଦେଇ ନ ଥିଲା । ଉପା ପ୍ରାର୍ଥୀ ଗୋପାଳକୃଷ୍ଣ ଗାନ୍ଧୀଙ୍କୁ ନବୀନ ସମର୍ଥନ ଜଣାଇଥିଲେ । ଗତଥର ଏନଡିଏ ରାଷ୍ଟ୍ରପତି ପ୍ରାର୍ଥୀ ରାମନାଥ କୋବିନ୍ଦଙ୍କୁ ବିଜେଡି କିନ୍ତୁ ସମର୍ଥନ ଦେଇଥିଲା ।
