ନୂଆଦିଲ୍ଲୀ: ବିଜେପି ସଂସଦୀୟ ବୋର୍ଡରୁ ନୀତିନ ଗଡ଼କରୀଙ୍କୁ ହଟାଇ ଦିଆଯାଇଛି । ଦଳର ଏହି ସର୍ବୋଚ୍ଚ ନୀତି ନିର୍ଦ୍ଧାରଣ କମିଟିରୁ ଗଡ଼କରୀଙ୍କ ସହ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ମଧ୍ୟ ବିଦା ହୋଇଛନ୍ତି । ୬ ନୂଆ ମୁହଁଙ୍କୁ ନେଇ ସଂସଦୀୟ ବୋର୍ଡର ପୁନର୍ଗଠନ କରାଯାଇଛି । ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ କିନ୍ତୁ ଏଥିରେ ସ୍ଥାନ ମିଳିନାହିଁ । ଅନ୍ୟ ଗୁରୁତ୍ୱପୂର୍ଣ୍ଣ କେନ୍ଦ୍ରୀୟ ନିର୍ବାଚନ କମିଟି(ସିଇସି) ରେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଏବଂ କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବଙ୍କ ସହ ୪ ଜଣଙ୍କୁ ସ୍ଥାନ ମିଳିଥିବା ବେଳେ ପୂର୍ବତନ କେନ୍ଦ୍ରମନ୍ତ୍ରୀ ଜୁଏଲ୍ ଓରାମ୍ ବାଦ୍ ପଡ଼ିଛନ୍ତି । ନୂଆ ସଂସଦୀୟ ବୋର୍ଡ ଏବଂ ସିଇସିରେ ଓଡ଼ିଶାରୁ କାହାରିକୁ ସ୍ଥାନ ମିଳିନାହିଁ ।
ରାଷ୍ଟ୍ରୀୟ ସ୍ୱୟଂ ସେବକ ସଂଘ ମାର୍କା ବିଜେପିର ବରିଷ୍ଠ ନେତା ତଥା କେନ୍ଦ୍ରମନ୍ତ୍ରୀ ନୀତିନ ଗଡ଼କରୀଙ୍କୁ ଦଳର ସର୍ବୋଚ୍ଚ ନୀତି ନିର୍ଦ୍ଧାରଣ କମିଟିରୁ ହଟାଇ ଦିଆଯିବା ଘଟଣାକୁ ବେଶ୍ ଗୁରୁତ୍ୱପୂର୍ଣ୍ଣ ବିବେଚନା କରାଯାଉଛି । ଦଳର ପୂର୍ବ ରାଷ୍ଟ୍ରୀୟ ସଭାପତିଙ୍କୁ ଏହି ବୋର୍ଡରେ ସ୍ଥାନ ଦେବା ଏକ ପରମ୍ପରା ହୋଇଥିଲେ ମଧ୍ୟ ଗଡ଼କରୀଙ୍କ କ୍ଷେତ୍ରରେ ବ୍ୟତିକ୍ରମ ଘଟିଛି । ରାଜନାଥ ସିଂହଙ୍କ କ୍ଷେତ୍ରରେ ପୂର୍ବରୁ ଏଭଳି ବ୍ୟତିକ୍ରମ ହୋଇଥିଲେ ମଧ୍ୟ ପରବର୍ତ୍ତୀ ସମୟରେ ଏହି ତ୍ରୁଟିକୁ ସଂଶୋଧନ କରାଯାଇଥିଲା ।
ଖାଲି ସେତିକି ନୁହେଁ, ସଂସଦୀୟ ବୋର୍ଡରୁ ହଟିବା ପରେ କେନ୍ଦ୍ରୀୟ ନିର୍ବାଚନ କମିଟିରୁ ଗଡ଼କରୀ ଓ ଚୌହାନଙ୍କ ସଦସ୍ୟତା ଆପେ କଟିଯାଇଛି । କାରଣ ସଂସଦୀୟ ବୋର୍ଡ ସଦସ୍ୟମାନେ କେନ୍ଦ୍ରୀୟ ନିର୍ବାଚନ କମିଟିର ମଧ୍ୟ ସଦସ୍ୟ । ଏମାନଙ୍କ ସହ ଅତିରିକ୍ତ ସଦସ୍ୟ ଭାବେ ଆଉ କେତେ ଜଣଙ୍କୁ ମନୋନୀତ କରାଯାଇଥାଏ ।
ମୋଦି-ଶାହଙ୍କ ଜମାନାରେ ଗଡ଼କରୀଙ୍କ ପ୍ରଭାବ ଉପରେ ଏହାକୁ ପ୍ରଚଣ୍ଡ ପାହାର ବୋଲି କୁହାଯାଉଛି । ୨୦୧୪ ରେ ଅମିତ ଶାହ ସଭାପତି ଥିବା ବେଳେ ଲାଲକୃଷ୍ଣ ଆଡଭାନୀ, ମୁରଲୀ ମନୋହର ଯୋଶୀଙ୍କ ଭଳି ନେତାଙ୍କୁ ସଂସଦୀୟ ବୋର୍ଡରୁ ଲଜ୍ଜାଜନକ ବିଦାୟ ନେବାକୁ ପଡ଼ିଥିଲା । ସେମାନଙ୍କୁ ମାର୍ଗଦର୍ଶକ କରି ବସାଇ ଦିଆଗଲା । ଗଡ଼କରୀଙ୍କୁ ସେହି ରାସ୍ତା ଦେଖାଇ ଦିଆଯାଇଛି ବୋଲି କୁହାଯାଉଛି ।
ପୁନର୍ଗଠିତ ସଂସଦୀୟ ବୋର୍ଡରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହ, ଦଳ ସଭାପତି ଜେ.ପି.ନଡ୍ଡା, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏବଂ ଦଳର ସମ୍ପାଦକ ବି.ଏଲ୍ ସନ୍ତୋଷଙ୍କ ସମେତ ୬ ନୂଆ ମୁହଁଙ୍କୁ ସ୍ଥାନ ମିଳିଛି । ସେମାନେ ହେଲେ କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ବି.ଏସ.ୟେଦୁରପ୍ପା, ଆସାମର ପୂର୍ବତନ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୋୱାଲ୍, କେ.ଲକ୍ଷ୍ମଣ, ଇକବାଲ ସିଂହ ଲାଲପୁରା, ସୁଧା ଯାଦବ ଏବଂ ସତ୍ୟନାରାୟଣ ଜଟିଆ ।
ନୂଆ ନିର୍ବାଚନ କମିଟିରେ ଏହି ୧୧ ନେତାଙ୍କ ସହ ଆଉ ୪ ନୂଆ ନେତାଙ୍କୁ ସ୍ଥାନ ମିଳିଛି । ସେମାନେ ହେଲେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍, କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବ, ଓମ୍ ମାଥୁର ଏବଂ ବନଥୀ ଶ୍ରୀନିବାସନ୍ । ପୂର୍ବ କମିଟିରେ ଥିବା ଜୁଏଲ୍ ଓରାମ୍, ଶାହାନୱାଜ୍ ହୁସେନ ଏବଂ ବିଜୟା ରହତକରଙ୍କୁ ବାଦ୍ ଦିଆଯାଇଛି ।
