ଭୁବନେଶ୍ୱର: ଦେଶର ସର୍ବୋଚ୍ଚ ସାମ୍ବିଧାନିକ ପଦବୀ ଏଥର ଓଡ଼ିଶା ଭାଗ୍ୟକୁ ଜୁଟିଛି । ମୟୁରଭଞ୍ଜ ଜିଲ୍ଲାର ଆଦିବାସୀ ନେତ୍ରୀ, ଓଡ଼ିଶାର ପୂର୍ବତନ ମନ୍ତ୍ରୀ ତଥା ଝାଡ଼ଖଣ୍ଡର ପୂର୍ବତନ ରାଜ୍ୟପାଳ ଦ୍ରୌପଦୀ ମୁର୍ମୁ ଏନଡିଏର ରାଷ୍ଟ୍ରପତି ପ୍ରାର୍ଥୀ ହୋଇଛନ୍ତି । ଆଜି ରାତିରେ ବିଜେପି ସଂସଦୀୟ ବୈଠକ ପରେ ଏକ ସାମ୍ବାଦିକ ସମ୍ମିଳନୀରେ ଦଳର ରାଷ୍ଟ୍ରୀୟ ଅଧ୍ୟକ୍ଷ ଜେ.ପି.ନଡ୍ଡା ଏନଡିଏର ରାଷ୍ଟ୍ରପତି ପ୍ରାର୍ଥୀ ଭାବେ ଦ୍ରୌପଦୀ ମୁର୍ମୁଙ୍କ ନାଁ ଘୋଷଣା କରିଛନ୍ତି । ସେ ହେବେ ଦେଶର ପ୍ରଥମ ମହିଳା ଆଦିବାସୀ ରାଷ୍ଟ୍ରପତି ।
ଜଣେ ଆଦିବାସୀ ଓ ମହିଳାଙ୍କୁ ରାଷ୍ଟ୍ରପତି ପ୍ରାର୍ଥୀ ଘୋଷଣା କରି ବିଜେପି ସମସ୍ତଙ୍କୁ ଚମକାଇ ଦେଇଥିଲା ବେଳେ ଓଡ଼ିଶା ପାଇଁ ଏହା ଖୁସି ଓ ଗର୍ବ ଆଣିଛି । ସାରା ରାଜ୍ୟରେ ଏହା ଖୁସିର ଲହରି ଖେଳାଇ ଦେଇଛି । ପ୍ରାର୍ଥୀ ଘୋଷଣା ହେବା ପରେ ଦ୍ରୌପଦୀ କହିଛନ୍ତି ଟିଭିରୁ ଏହା ଦେଖି ମୁଁ ଖୁସି ଏବଂ ଆଶ୍ଚର୍ଯ୍ୟ । ଆସନ୍ତା ୨୫ ତାରିଖରେ ସେ ମନୋନୟନପତ୍ର ଦାଖଲ କରିବେ ବୋଲି ଏଏନଆଇ ସୂତ୍ରରୁ ଜଣାପଡ଼ିଛି ।
ପୂର୍ବରୁ ଆଜି ସଂଧ୍ୟାରେ ଯଶୋବନ୍ତ ସିହ୍ନାଙ୍କୁ ମିଳିତ ବିରୋଧୀ ଦଳ ପକ୍ଷରୁ ରାଷ୍ଟ୍ରପତି ପ୍ରାର୍ଥୀ ଭାବେ ଘୋଷଣା କରିଥିଲା । ରାଷ୍ଟ୍ରପତି ନିର୍ବାଚନରେ ବିଜେଡି ଏବଂ ୱାଇଏସଆର୍ କଂଗ୍ରେସର ନିର୍ଣ୍ଣାୟକ ଭୂମିକା ରହିଛି । ସଂଖ୍ୟା ଦୃଷ୍ଟିରୁ ସେମାନଙ୍କ ସମର୍ଥନ ପାଇଲେ ଏନଡିଏ ରାଷ୍ଟ୍ରପତି ପ୍ରାର୍ଥୀଙ୍କ ନିଶ୍ଚିତ । ବିଜେଡି ଏବଂ ୱାଇଏସଆର୍ କଂଗ୍ରେସ ସେମାନଙ୍କର ଆଭିମୁଖ୍ୟ ସ୍ପଷ୍ଟ କରି ନ ଥିଲେ ମଧ୍ୟ ଦ୍ରୌପଦୀ ମୁର୍ମୁଙ୍କ ପ୍ରାର୍ଥୀତ୍ୱ ସେମାନଙ୍କ ସମର୍ଥନର ବାଟ ପରିଷ୍କାର କରିଛି । ନିଜ ରାଜ୍ୟର ଜଣେ ଦଳିତ ଆଦିବାସୀ ନେତ୍ରୀଙ୍କୁ ରାଷ୍ଟ୍ରପତି ପ୍ରାର୍ଥୀ ଭାବେ ବିଜେଡି ସମର୍ଥନ କରିବା ନିଶ୍ଚିତ ବୋଲି ସ୍ପଷ୍ଟ ହୋଇଯାଇଛି । ୱାଇଏସଆର୍ କଂଗ୍ରେସ ମଧ୍ୟ ସମାନ ନୀତି ଆପଣେଇବ ବୋଲି ସ୍ପଷ୍ଟ ଆଭାସ ମିଳିଛି ।
୬୪ ବର୍ଷୀୟା ଦ୍ରୌପଦୀ ମୁର୍ମୁ ମୟୁରଭଞ୍ଜ ଜିଲ୍ଲା ରାଇରଙ୍ଗପୁର ଅନ୍ତର୍ଗତ ବଇଦପୋଷି ଗାଁର ଏକ ଆଦିବାସୀ ପରିବାରରେ ଜନ୍ମଗ୍ରହଣ କରିଥିଲେ । ୧୯୯୭ ମସିହାରେ ସେ ରାଜନୈତିକ ଜୀବନ ଆରମ୍ଭ କରି ରାଇରଙ୍ଗପୁରରେ କାଉନସିଲର ନିର୍ବାଚିତ ହୋଇଥିଲେ । ବିଜେପିର ଏସଟି ମୋର୍ଚ୍ଚାର ଉପସଭାପତି ଦାୟିତ୍ୱରେ ଥିଲେ । ୨୦୦୦ ଓ ୨୦୦୪ ମସିହାରେ ରାଇରଙ୍ଗପୁରରୁ ବିଧାନସଭାକୁ ନିର୍ବାଚିତ ହୋଇଥିଲେ । ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ବିଜେଡି-ବିଜେପି ମେଣ୍ଟ ସରକାରରେ ସେ ବାଣିଜ୍ୟ ଓ ପରିବହନ ରାଷ୍ଟ୍ରମନ୍ତ୍ରୀ(ସ୍ୱାଧୀନ) ଥିଲେ । ପରବର୍ତ୍ତୀ ସମୟରେ ୨୦୧୫ ମସିହାରେ ଝାଡ଼ଖଣ୍ଡର ରାଜ୍ୟପାଳ ଭାବେ ନିଯୁକ୍ତି ପାଇଥିଲେ । ଝାଡ଼ଖଣ୍ଡର ସେ ଥିଲେ ପ୍ରଥମ ମହିଳା ଆଦିବାସୀ ରାଜ୍ୟପାଳ । ୨୦୨୧ ମସିହାରୁ ସେ ସକ୍ରିୟ ରାଜନୀତିରୁ ଦୂରେଇ ଯାଇଥିଲେ ।
ଦ୍ରୌପଦୀ ମୁର୍ମୁ ଜଣେ ଭଲ ରାଷ୍ଟ୍ରପତି ହେବେ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟୁଇଟ୍ କରିଛନ୍ତି । ସମାଜ ପାଇଁ ସେ ଅନେକ କାମ କରିଛନ୍ତି ଏବଂ ଦଳିତଙ୍କ ଉନ୍ନତିରେ ତାଙ୍କର ଅବଦାନ ବହୁତ ବୋଲି ପ୍ରଧାନମନ୍ତ୍ରୀ କହିଛନ୍ତି । ଗୃହମନ୍ତ୍ରୀ ଅମିତ୍ ଶାହା ମଧ୍ୟ ଅନୁରୂପ ପ୍ରତିକ୍ରିୟା ଦେଇଛନ୍ତି ।
