ରାଜଧାନୀରେ ଧାମନଗର ଉପନିର୍ବାଚନ ତାତି

– ଅର୍ଚ୍ଚନା କେଳେଙ୍କାରୀ/ଧର୍ମେନ୍ଦ୍ର ସାହୁ ଆତ୍ମହତ୍ୟା ପ୍ରସଙ୍ଗରେ ବିଜେପିର ଆନ୍ଦୋଳନ

– ନିର୍ବାଚନ ବେଳେ ବିଜେପି ଏମିତି ନାଟକ କରେ: ବିଜେଡି

ଭୁବନେଶ୍ୱର: ଧାମନଗରରେ ଉପନିର୍ବାଚନ ମାହୋଲ ସରଗରମ ଥିଲା ବେଳେ ରାଜଧାନୀ ଭୁବନେଶ୍ୱରରେ ରାଜନୈତିକ ତାତି ଦେଖିବାକୁ ମିଳିଛି । ଅର୍ଚ୍ଚନା ନାଗ କେଳେଙ୍କାରୀ ଏବଂ ଧର୍ମେନ୍ଦ୍ର ସାହୁଙ୍କ ଆତ୍ମହତ୍ୟା ମାମଲାରେ ମନ୍ତ୍ରୀ ସମୀର ଦାଶଙ୍କ ସଂପୃକ୍ତି ଅଭିଯୋଗ ପ୍ରସଙ୍ଗକୁ ଧରି ବିଜେପି ଏଠି ହାଙ୍ଗାମା କରିଛି । ଶାସକ ଦଳର ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ବିଜେପି ପକ୍ଷରୁ ନବୀନ ନିବାସ ଘେରାଉ ଉଦ୍ୟମ ବେଳେ ଶିଶୁଭବନ ଛକରେ ପୁଲିସ ସହ ମୁହାଁମୁହିଁ ହୋଇଥିଲା । ପ୍ରବଳ ଧସ୍ତାଧସ୍ତି ମଧ୍ୟରେ ଆନ୍ଦୋଳନକାରୀମାନଙ୍କୁ ଆଗକୁ ବଢ଼ିବାକୁ ନ ଦେଇ ପୁଲିସ ସେଠାରୁ ଉଠାଇ ନେଇଥିଲା । ଆନ୍ଦୋଳନକାରୀଙ୍କୁ ନେଇ ଯାଉଥିବା ଏକ ପୁଲିସ ଭ୍ୟାନ୍ କୁ କିଛି ଉତ୍ତ୍ୟକ୍ତ କର୍ମୀ ରାଜମହଲ ଛକରେ ଭଙ୍ଗାରୁଜା କରିଥିଲେ । ଏଥିରେ ଜଣେ ପୁଲିସ ଅଧିକାରୀ ଆହତ ହୋଇଛନ୍ତି ।

ଆଜି ଦିନ ୧୨ଟା ବେଳେ ବିଜେପି ଅଫିସ୍ ରୁ ଏକ ବିଶାଳ ଶୋଭାଯାତ୍ରା ନବୀନ ନିବାସ ଅଭିମୁଖେ ବାହାରିଥିଲା । ଶୋଭାଯାତ୍ରାର ନେତୃତ୍ୱ ନେଇଥିଲେ ରାଷ୍ଟ୍ରୀୟ ପ୍ରବକ୍ତା ଡ. ସମ୍ବିତ୍ ପାତ୍ର, ରାଜ୍ୟ ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ, ଲେଖାଶ୍ରୀ ସାମନ୍ତସିଂହାର ପ୍ରମୁଖ । ସେମାନେ ଘଣ୍ଟ ବାଢ଼େଇ ବାଢ଼େଇ ଆଗରେ ଚାଲୁଥିବା ବେଳେ ପଛରେ କର୍ମୀମାନେ ସରକାର ବିରୋଧୀ ନାରା ଦେଉଥିଲେ । ‘ଓଡ଼ିଶା ଶାସନ ରଙ୍ଗମହଲରେ’ ଲେଖାଥିବା ଏକ ବିରାଟ ବ୍ୟାନର ସେମାନେ ଧରିିଥିଲେ । ସେଥିରେ ଅର୍ଚ୍ଚନା ନାଗ ଏବଂ ଧର୍ମେନ୍ଦ୍ର ସାହୁଙ୍କ ଫଟୋ ସାଙ୍ଗରେ ମନ୍ତ୍ରୀ ସମୀର ଦାଶ, ପୂର୍ବତନ ମନ୍ତ୍ରୀ ପ୍ରତାପ ଜେନା, ଦିବ୍ୟଶଙ୍କର ମିଶ୍ରଙ୍କର କାର୍ଟୁନ୍ ଫଟୋ ଲାଗିଥିଲା ।

ଏହି ପଟୁଆରରେ ଡିଜେ ବାଜୁଥିଲା । ଡିଜେ ସାଉଣ୍ଡରେ ରାସ୍ତାଘାଟ ଫାଟୁଥିଲା । ଡ୍ରମ ତାଳେ ତାଳେ କିଛି ମହିଳା କର୍ମୀ ଏବଂ କିନ୍ନର ନାଚୁଥିଲେ । କର୍ମୀମାନେ ଢ଼ୋଲ, ଝାଞ୍ଜ ବାଡୋଉଥିଲେ । କୁମ୍ଭକର୍ଣ୍ଣ ନିଦ୍ରାରେ ଶୋଇଥିବା ମୁଖ୍ୟମନ୍ତ୍ରୀଙ୍କୁ ଜାଗ୍ରତ କରାଇବାକୁ ଘଣ୍ଟ, ଢ଼ୋଲ, ଝାଞ୍ଜ ବାଡୋଉଛୁ ବୋଲି ସମ୍ବିତ୍ ପାତ୍ର ଟିଭି କ୍ୟାମେରା ଆଗରେ ଘଣ୍ଟ ପିଟି ପିଟି କହୁଥିଲେ ।

ଶୋଭାଯାତ୍ରା ଆଗକୁ ମାଡ଼ି ଆସୁଥିଲା ବେଳେ ଶିଶୁଭବନଠାରେ ସେମାନଙ୍କୁ ଅଟକାଇବା ପାଇଁ ଆଗରୁ ବ୍ୟାରିକେଡ୍ ପ୍ରସ୍ତୁତ କରାଯାଇଥିଲା । ୫ ପ୍ଲାଟୁନ୍ ରୁ ଅଧିକ ପୁଲିସ ଏବଂ ଅଧିକାରୀମାନେ ସେଠାରେ ମୁତୟନ ଥିଲେ । ଆନ୍ଦୋଳନକାରୀମାନେ ସେଠି ପହଞ୍ଚିଲା ମାତ୍ରେ ପୁଲିସ ସେମାନଙ୍କୁ ଅଟକାଇବାକୁ ଚେଷ୍ଟା କରିଥିଲେ ମଧ୍ୟ ସେମାନେ ମଧ୍ୟ ବଳ ଲଗାଇଥିଲେ । ବ୍ୟାରିକେଡ୍ ଭାଙ୍ଗି ଆଗକୁ ଯିବାକୁ ଉଦ୍ୟମ କରିଥିଲେ ।

ଫଳରେ ପୁଲିସ ସହ ବିଜେପି କର୍ମୀଙ୍କର ଧସ୍ତାଧସ୍ତି ହୋଇଥିଲା । କିଛି କର୍ମୀ ରାସ୍ତା ଉପରେ ଶୋଇଯାଇଥିଲା ବେଳେ ମହିଳା କର୍ମୀମାନେ ଧାରଣାରେ ବସିଥିଲେ । ତେବେ ପୁଲିସ ସେମାନଙ୍କୁ ହଟାଇବା ଉଦ୍ୟମରେ ବିଫଳ ହେବା ପରେ ଜଣ ଜଣ କରି ଭ୍ୟାନ୍ ଭିତରକୁ ଟେକି ନେଇଥିଲେ । ଆନ୍ଦୋଳନରେ ସାମିଲ ହୋଇଥିବା କିଛି କିନ୍ନର ପୁଲିସକୁ କିନ୍ତୁ ପାଣି ପିଆଇ ଦେଇଥିଲେ ।
ଆନ୍ଦୋଳନକାରୀଙ୍କୁ ଧରି ଫେରୁଥିବା ଗୋଟିଏ ପୁଲିସ ଭ୍ୟାନ୍ କୁ ଆଉ କିଛି ଆନ୍ଦୋଳନକାରୀ ରାଜମହଲ ଛକରେ ଅଟକାଇ ଟେକାମାଡ଼ କରିଥିବା ଅଭିଯୋଗ ହୋଇଛି । ସେଥିରେ ଜଣେ ପୁଲିସ ଏସଆଇ ଆହତ ହୋଇଛନ୍ତି ।

ବିଜେପିର ଏହି ଆନ୍ଦୋଳନ ପ୍ରସଙ୍ଗରେ ବିଜେଡି ମୁଖପାତ୍ର ଲେଲିନ୍ ମହାନ୍ତି ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି । ମୁଖ୍ୟ ପ୍ରସଙ୍ଗକୁ ନେଇ ଭାରତୀୟ ଜନତା ପାର୍ଟି କେବେ ବି ମୁହଁ ଖୋଲିନାହାନ୍ତି । ଯେତେବେଳେ ନିର୍ବାଚନ ଥାଏ, ନିଜସ୍ୱ ସ୍ୱାର୍ଥ ଥାଏ ସେତେବେଳେ ହିଁ ଏହି ଦଳ ପ୍ରସଙ୍ଗକୁ ନେଇ ଆଗକୁ ଆସନ୍ତି । ଧାମନଗର ଉପନିର୍ବାଚନରେ ନିଶ୍ଚିତ ପରାଜୟ ଜାଣି ସେମାନେ ଏଭଳି ନାଟକବାଜି ଚଳାଇଥିବା ବିଜେଡି ମୁଖପାତ୍ର କହିଛନ୍ତି ।