ଭୁବନେଶ୍ୱର: କେନ୍ଦ୍ରାପଡ଼ା ଜିଲ୍ଲା ରାଜନଗରରେ ଶାସକ ଦଳର କର୍ମୀଙ୍କ ଗୁଣ୍ଡାଗିରି ଦେଖିବାକୁ ମିଳିଛି । ପରାଜିତ ବିଧାୟକ ପ୍ରାର୍ଥୀ ଲଳିତ ବେହେରାଙ୍କ ନେତୃତ୍ୱରେ ୪୦ରୁ ଅଧିକ କର୍ମୀ ବିଡିଓଙ୍କ କାର୍ଯ୍ୟାଳୟରେ ପଶି ମହିଳା ବିଡିଓଙ୍କୁ ଆକ୍ରମଣ କରିଛନ୍ତି । ନିଜେ ପରାଜିତ ପ୍ରାର୍ଥୀ ବିଡିଓଙ୍କ ଟେବୁଲରୁ କମ୍ପ୍ୟୁଟର ଉଠାଇ ବିଡିଓଙ୍କ ଉପରକୁ ଫିଙ୍ଗିଥିଲେ । ସୌଭାଗ୍ୟବଶତଃ ବିଡିଓ ବର୍ତ୍ତି ଯାଇଛନ୍ତି । ସରକାରୀ ଅଫିସ୍ ରେ ବସି କାର୍ଯ୍ୟ କରୁଥିବା ଜଣେ ମହିଳା ବିଡିଓଙ୍କ ପ୍ରତି ଶାସକ ଦଳ ନେତାଙ୍କର ଏଭଳି କାଣ୍ଡ ଆଲୋଡ଼ନ ସୃଷ୍ଟି କରିଛି ।
ଅଭିଯୋଗ ଅନୁଯାୟୀ, ଗତକାଲି ଦିନ ପ୍ରାୟ ୧୨ଟା ସମୟରେ ବିଜେପି ନେତା ଲଳିତ ବେହେରାଙ୍କ ନେତୃତ୍ୱରେ ୪୦ରୁ ଅଧିକ କର୍ମୀ ରାଜନଗର ବିଡିଓ ତିଳୋତ୍ତମା ପୃଷ୍ଟିଙ୍କ କାର୍ଯ୍ୟାଳୟରେ ପଶିଥିଲେ । ହୋ ହଲ୍ଲା କରି ବିଡିଓଙ୍କୁ ଘେରିଯାଇଥିଲେ । ସେମାନଙ୍କ କଥାରେ କାହିଁକି କାମ ହେଉନାହିଁ ତାହାର ଜବାବ ମାଗିଥିଲେ । ଶାସକଦଳ କର୍ମୀଙ୍କ ଉଗ୍ର ରୂପରେ ବିଡିଓ ଭୟଭୀତ ହୋଇଥିଲେ ମଧ୍ୟ ସାହାସର ସହିତ ସାମନା କରିଥିଲେ । ସରକାରଙ୍କ ନିୟମ ଅନୁଯାୟୀ କାମ ହେବ ବୋଲି ସେମାନଙ୍କୁ ବୁଝାଇଥିଲେ । ମାତ୍ର ବିଜେପି କର୍ମୀମାନେ ତାହା ଶୁଣିବାକୁ ପ୍ରସ୍ତୁତ ନ ଥିଲେ । ଅଲବତ୍ ଆମ କଥାରେ କାମ ହେବ କହି ବିଡିଓଙ୍କ ଉପରକୁ ମାଡି ଆସିଥିଲେ । ସେମାନଙ୍କ ନେତୃତ୍ୱ ନେଉଥିବା ଲଳିତ ବେହେରା ବିଡିଓଙ୍କ ଟେବୁଲ୍ ରୁ କମ୍ପ୍ୟୁଟର୍ ଉଠାଇ ବିଡିଓଙ୍କୁ ଲକ୍ଷ୍ୟ କରି ଫିଙ୍ଗି ଦେଇଥିଲେ । ସୌଭାଗ୍ୟକୁ କିଛି କର୍ମୀ ଆଗକୁ ଆସିଯିବାରୁ ବିଡିଓ ବର୍ତ୍ତିଯାଇଥିଲେ । ସେମାନଙ୍କ କଥାରେ କାମ ନହେଲେ ପରିସ୍ଥିତି ଭୟଙ୍କର ହେବ ବୋଲି ଧମକ ଦେଇ ଚାଲି ଆସିଥିଲେ ବିଜେପି ଗୁଣ୍ଡାବାହିନୀ ।
ଏହି ଘଟଣାର ସମସ୍ତ ଦୃଶ୍ୟ ସିସିଟିଭିରେ କଏଦ ହୋଇଛି । ତାଙ୍କ ଉପରେ ହୋଇଥିବା ଆକ୍ରମଣ ସଂକ୍ରାନ୍ତରେ ବିଡିଓ ଜିଲ୍ଲାପାଳଙ୍କୁ ଜଣାଇଛନ୍ତି । ତେବେ ଏ ପର୍ଯ୍ୟନ୍ତ ଥାନାରେ ଲିଖିତ ଅଭିଯୋଗ ହୋଇ ନ ଥିବା ଜଣାପଡ଼ିଛି । ଏହି ଘଟଣାକୁ ନେଇ ବିଭିନ୍ନ ମହଲରେ ଉଦବେଗ ପ୍ରକାଶ ପାଇଛି । ୨୦୨୫ ଜୁନ୍ ମାସରେ ବିଏମସି ଅତିରିକ୍ତ କମିସନର ରତ୍ନାକର ସାହୁଙ୍କୁ ବିଜେପି ନେତା ଜଗନ୍ନାଥ ପ୍ରଧାନଙ୍କ ସମର୍ଥକମାନେ ମାଡ଼ ମାରିଥିବା ଘଟଣାକୁ ମନେ ଏହା ମନେ ପକାଇଦେଇଛି । ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବିରେ ଓଏଏସ୍ ସଂଘର ଆନ୍ଦୋଳନ ଯୋଗୁଁ ସରକାରଙ୍କୁ ନଇଁବାକୁ ପଡ଼ିଥିଲା । ଭୁବନେଶ୍ୱର(ମଧ୍ୟ) ବିଜେପି ପ୍ରାର୍ଥୀ ଜଗନ୍ନାଥ ପ୍ରଧାନଙ୍କ ସମେତ ୩ ଅଭିଯୁକ୍ତଙ୍କ ଗିରଫ ପରେ ଯାଇ ଆନ୍ଦୋଳନ ହଟିଥିଲା ।
ଆଜି ଶଙ୍ଖଭବନରେ ବିଜେଡି ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ରାଜନଗର ଘଟଣାର ଦୃଢ଼ ନିନ୍ଦା କରାଯାଇଛି । ବିଜେପି ସରକାର ରାଜ୍ୟରେ ଶାସନଭାର ଗ୍ରହଣ କରିବା ପରଠୁ ଆଇନଶୃଙ୍ଖଳା ବ୍ୟବସ୍ଥା ନିମ୍ନଗାମୀ ହେଉଛି ବୋଲି କୁହାଯାଇଛି । ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦଳର ମୁଖପାତ୍ର ତଥା ଗଣମାଧ୍ୟମ ସଂଯୋଜକ ଡ. ଲେଲିନ୍ ମହାନ୍ତି ଦାବି କରିଛନ୍ତି ।
ସେପଟେ ଆକ୍ରମଣକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ରାଜରାସ୍ତାକୁ ଓହ୍ଲାଇଛନ୍ତି ବିଜେଡି କର୍ମୀ । ଶତାଧିକ କର୍ମୀ ରାଜନଗର ହଂସୁଆ ସେତୁ ଉପରେ ରାସ୍ତାରୋକ ଆନେ୍ଦାଳନ କରିଛନ୍ତି । ଫଳରେ ଯାନବାହାନ ଚଳାଚଳରେ ବ୍ୟାଘତ ସୃଷ୍ଟି ହୋଇଛି । ଶହ ଶହ ଗାଡ଼ି ମଟର ଅଟକି ରହିଛି ।
ମହାକାଳପଡ଼ାର ବିଜେପି ବିଧାୟକ ଦୁର୍ଗାପ୍ରସନ୍ନ ନାୟକ ଘଟଣାର ତଦନ୍ତ କରାଯାଇ ଆଇନ ଅନୁଯାୟୀ ପଦକ୍ଷେପ ନିଆଯିବ ବୋଲି କହିଛନ୍ତି ।
