ମୁଖ୍ୟମନ୍ତ୍ରୀଙ୍କ ଉତ୍ତରରେ ଅସଙ୍ଗତି!

ଭୁବନେଶ୍ୱର: ଓଡ଼ିଶାରେ କେତେ ସରକାରୀ ପଦବୀ ଖାଲି ପଡ଼ିଛି? ଲାଗ ଲାଗ ବିଧାନସଭାରେ ଏହି ପ୍ରଶ୍ନର ଭିନ୍ନ ଭିନ୍ନ ଉତ୍ତର ଆସୁଛି । ସାଧାରଣ ପ୍ରଶାସନ ବିଭାଗର ଦାୟିତ୍ୱରେ ଥିବା ଖୋଦ୍ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଦ୍ୱାରା ଲିଖିତ ଉତ୍ତରରେ ଏଭଳି ଅସଙ୍ଗତି ଦେଖିବାକୁ ମିଳୁଛି ।

ଗତ ବିଧାନସଭା ଅଧିବେଶନରେ ବିଧାୟକ ଗଣେଶ୍ୱର ବେହେରା ଏ ସମ୍ପର୍କରେ ପ୍ରଶ୍ନ କରିଥିଲେ । ମୁଖ୍ୟମନ୍ତ୍ରୀଙ୍କ ଉତ୍ତର ଥିଲା ଯେ ରାଜ୍ୟର ବିଭିନ୍ନ ସରକାରୀ ବିଭାଗରେ ୨ ଲକ୍ଷ ୫ ହଜାରରୁ ଅଧିକ ଚାକିରି ଖାଲି ପଡ଼ିଛି । ଖାଲି ପଦବୀର ବିଭାଗୱାରୀ ତଥ୍ୟ ମଧ୍ୟ ଦେଇଥିଲେ । ଗୃହ ବିଭାଗରେ ସର୍ବାଧିକ ୧୯,୮୮୯ ପଦବୀ ଖାଲି ଥିବା ସେଥିରେ କୁହାଯାଇଥିଲା । ୧୮ ମାସରେ ୪୦ ହଜାର ପଦବୀ ପୂରଣ ହୋଇସାରିଛି ବୋଲି ମୁଖ୍ୟମନ୍ତ୍ରୀ ଉତ୍ତର ଦେଇଥିଲେ ।

ବିଜେଡି ବିଧାୟକ ଚକ୍ରମଣି କହଁରଙ୍କର ଆଜି ସମାନ ଲିଖିତ ପ୍ରଶ୍ନର ଉତ୍ତରରେ ମୁଖ୍ୟମନ୍ତ୍ରୀ କହିଛନ୍ତି ଯେ ୨୦୨୬ ଫେବ୍ରୁଆରୀ ୧୨ ତାରିଖ ସୁଦ୍ଧା ବିଭିନ୍ନ ବିଭାଗରେ ୯୪ ହଜାର ୪୮୫ ପଦବୀ ଖାଲି ପଡ଼ିଛି । ବିଦ୍ୟାଳୟ ଓ ଗଣଶିକ୍ଷା ବିଭାଗରେ ସର୍ବାଧିକ ୨୦,୨୮୯ ପଦବୀ ଖାଲି ପଡ଼ିଥିବା ବେଳେ ଗୃହ ବିଭାଗରେ ୧୬,୦୩୨ ଏବଂ ସ୍ୱାସ୍ଥ୍ୟ ବିଭାଗରେ ୧୦,୪୫୭ ପଦବୀ ଖାଲି ପଡ଼ିଛି । ୧୨.୦୬.୨୪ରୁ ୧୨.୦୨.୨୬ ମଧ୍ୟରେ ୩୯,୫୦୫ ନିଯୁକ୍ତି ସରିଛି ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ମୁଖ୍ୟମନ୍ତ୍ରୀଙ୍କ ଏହି ଉତ୍ତରକୁ ଗଣିତ ପକାଇ ବୁଝିଲେ ୬ ମାସ ଅବଧି ଭିତରେ ୧ ଲକ୍ଷ ୫ ହଜାର ୫୨୦ ଜଣଙ୍କୁ ନିଯୁକ୍ତି ମିଳିଛି । କାରଣ ଗତଥର ୨ ଲକ୍ଷ ୫ ହଜାରରୁ ଅଧିକ ସରକାରୀ ପଦ ଖାଲିଥିବା ମୁଖ୍ୟମନ୍ତ୍ରୀ କହିଥିଲା ବେଳେ ଏଥର ୯୪ ହଜାର ୪୮୫ ପଦବୀ ଖାଲିଥିବା ମୁଖ୍ୟମନ୍ତ୍ରୀଙ୍କ ପାଟିରେ କୁହାଯାଇଛି । ସେହିଭଳି ୧୮ ମାସରେ ୪୦ ହଜାର ପଦବୀ ପୂରଣ ହୋଇଛି ବୋଲି ଗତଥର ମୁଖ୍ୟମନ୍ତ୍ରୀ କହିଥିଲା ବେଳେ ଏଥର ପ୍ରାୟ ୨୦ ମାସରେ ୩୯,୫୦୫ ନିଯୁକ୍ତି ସରିଥିବା କୁହାଯାଇଛି ।

(ଓଡ଼ିଶା ନ୍ୟୁଜ୍)