ଭୁବନେଶ୍ୱର: ମଧ୍ୟପ୍ରାଚ୍ୟ ଯୁଦ୍ଧ ଯୋଗୁଁ ଜାଳେଣିି ଗ୍ୟାସ୍ ଅଭାବ ସିଧାସଳଖ ଏଲପିଜି ଗ୍ରାହକଙ୍କ ଉପରେ ପଡ଼ିଛି । ଭବିଷ୍ୟତରେ ରୋଷେଇ ଗ୍ୟାସ୍ ର ଅଭାବ ଆଶଙ୍କା ରହିଛି । ଏହାକୁ ଦୃଷ୍ଟିରେ ରଖି ଏଲପିଜି ଗ୍ୟାସ ଯୋଗାଣରେ କେନ୍ଦ୍ର ସରକାର ଅତ୍ୟାବଶ୍ୟକ ସାମଗ୍ରୀ ଆଇନ(ଏସମା) ଲାଗୁ କରିଛନ୍ତି । ଫଳରେ ଘରୋଇ ଗ୍ରାହକଙ୍କୁ ଗ୍ୟାସ୍ ଯୋଗାଣରେ କୌଣସି ସମସ୍ୟା ହେବ ନାହିଁ ।
କେନ୍ଦ୍ର ସରକାରଙ୍କ ଦାବି ଅନୁଯାୟୀ, ଘରୋଇ ବ୍ୟବହାରୀଙ୍କ ପାଇଁ ଦେଶରେ ଏଲପିଜି ଗ୍ୟାସ୍ ଯଥେଷ୍ଟ ମହଜୁଦ ଅଛି । ସେଥିରେ କୌଣସି ସମସ୍ୟା ନାହିଁ । ତେଣୁ ସାଧାରଣ ଲୋକ ଭୟଭୀତ ହୁଅନ୍ତୁ ନାହିଁ କି ଗ୍ୟାସ୍ ଗଚ୍ଛିତ ରଖନ୍ତୁ ନାହିଁ । ଗ୍ୟାସ୍ କିଣିବା ପାଇଁ ଲମ୍ବା ଲାଇନ୍ ରେ ଛିଡ଼ା ନ ହେବାକୁ ପରାମର୍ଶ ଦିଆଯାଇଛି । ଆମେରିକା, କାନାଡ଼ା ଭଳି ଅନ୍ୟ ଦେଶରୁ ଏଲପିଜି ଆମଦାନୀ ପାଇଁ ସରକାର ଉଦ୍ୟମ ଜାରି ରଖିଛନ୍ତି ବୋଲି କୁହାଯାଇଛି ।
ଇସ୍ରାଏଲ୍-ଇରାନ ଯୁଦ୍ଧ ଯୋଗୁଁ ସମୁଦ୍ର ପଥରେ ଗ୍ୟାସ୍ ଆସିବାରେ ବାଧା ସୃଷ୍ଟି ହୋଇଛି । ଭାରତକୁ ଆସୁଥିବା ଗ୍ୟାସ୍ ର ମୋଟ ୮୦ରୁ ୯୦ ପ୍ରତିଶତ ଏହି ବାଟ ଦେଇ ଆସିଥାଏ । ଯୁଦ୍ଧ ଯୋଗୁଁ ସେହି ବାଟରେ ଜାହାଜ ଚଳାଚଳ ପ୍ରାୟତଃ ବନ୍ଦ ହୋଇଯାଇଛି । ତେବେ ଭାରତରେ ଏଲପିଜି ଗ୍ୟାସ୍ ସଙ୍କଟ ଯେଭଳି ନ ହୁଏ ସେଥିପ୍ରତି ସରକାର ସଜାଗ ହୋଇଛନ୍ତି । ଦେଶର ସମସ୍ତ ଅଏଲ ରିଫାଇନାରି ତଥା ପେଟ୍ରୋକେମିକାଲ୍ ୟୁନିଟ୍ ଗୁଡ଼ିକୁ ଅଧିକରୁ ଅଧିକ ଏଲପିଜି ଗ୍ୟାସ୍ ତିଆରି ପାଇଁ ନିର୍ଦ୍ଦେଶ ଦିଆଯାଇଛି । ଗ୍ୟାସ୍ ତିଆରି ପାଇଁ ବ୍ୟବହୃତ କଞ୍ଚାମାଲକୁ ଅନ୍ୟ ପ୍ଲାଷ୍ଟିକ୍ କିମ୍ବା ପେଟ୍ରୋକେମିକାଲସ୍ ପ୍ରସ୍ତୁତରେ ବ୍ୟବହାର କରାଯାଇପାରିବ ନାହିଁ । କେବଳ ରୋଷେଇ ପାଇଁ ଗ୍ୟାସ୍ କୁ ଇଣ୍ଡେନ୍, ଭାରତ ଏବଂ ଏଚପି ଗ୍ୟାସ୍ କମ୍ପାନୀକୁ ଦିଆଯିବ । ଯାହା ଫଳରେ ରୋଷେଇ କରୁଥିବା ସାଧାରଣ ପରିବାର ଏହା ପାଇପାରିବେ ।
ସୂଚନାଯୋଗ୍ୟ, ମଧ୍ୟପ୍ରାଚ୍ୟ ଯୁଦ୍ଧ ଯୋଗୁଁ ଓଡ଼ିଶା ସମେତ ସାରା ଦେଶରେ ଗ୍ୟାସ୍ ସଙ୍କଟ ଦେଖାଦେଇଛି । ଇତିମଧ୍ୟରେ ରାଷ୍ଟ୍ରାୟତ୍ତ କମ୍ପାନୀଗୁଡ଼ିକ ଉଭୟ ଘରୋଇ ଓ ବାଣିଜ୍ୟିକ ଏଲପିଜି ଦର ବଢ଼ାଇଛନ୍ତି । ୧୪.୨ କିଗ୍ରା ବିଶିଷ୍ଟ ଘରୋଇ ଦର ୬୦ ଟଙ୍କା ବଢ଼ିଥିଲା ବେଳେ ୧୯ କେଜି ବିଶିଷ୍ଟ ବାଣିଜ୍ୟିକ ଏଲପିଜି ଦର ୧୧୫ ଟଙ୍କା ବୃଦ୍ଧି ପାଇଛି । ଖାଲି ସେତିକି ନୁହେଁ, ତୈଳ କମ୍ପାନୀଗୁଡ଼ିକ ଗ୍ୟାସ୍ ଯୋଗାଣ ଉପରେ କଟକଣା ଲଗାଇଛନ୍ତି । ଶିଳ୍ପାନୁଷ୍ଠାନ, ହୋଟେଲ, ରେସ୍ତୋରାଁକୁ ବାଣିଜ୍ୟିକ ଏଲପିଜି ଯୋଗାଣ ବନ୍ଦ କରାଯାଇଥିଲା ବେଳେ ଘରୋଇ ଏଲପିଜି ସିଲିଣ୍ଡର ବୁକିଂର ଲକ୍-ଇନ୍ ଅବଧି ବଢ଼ାଇ ଦିଆଯାଇଛି ।
ଘରୋଇ ଗ୍ରାହକଙ୍କ ପାଖରେ ସିଲିଣ୍ଡର ପହଞ୍ଚୁ ନ ଥିବା ଅଭିଯୋଗ ପରେ କେନ୍ଦ୍ର ସରକାର ଏସମା ଆଇନ ଲାଗୁ କରିଛନ୍ତି । ଯୋଗାଣରେ ସ୍ଥିରତା ଓ କଳାବଜାରୀ ରୋକିବାକୁ ସରକାର ଏହି ପଦକ୍ଷେପ ନେଇଛନ୍ତି ।
ଗ୍ୟାସ୍ ସଙ୍କଟ ପରିସ୍ଥିତିର ଆଜି ସମୀକ୍ଷା କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଇରାନ ଯୁଦ୍ଧ ପରେ ଏଲପିଜି ଅଭାବକୁ ନେଇ ସୃଷ୍ଟି ହୋଇଥିବା ସମସ୍ୟାର ସମାଧାନ ଉପରେ ପେଟ୍ରୋଲିୟମ୍ ମନ୍ତ୍ରୀ ହରଦୀପ ସିଂହ ପୁରି ଓ ବୈଦେଶିକ ମନ୍ତ୍ରୀ ଏସ୍ ଜୟଶଙ୍କରଙ୍କ ସହ ବିସ୍ତୃତ ଆଲୋଚନା କରିଛନ୍ତି ।
