ନୂଆଦିଲ୍ଲୀ: ଭେଟେରାନ୍ କଂଗ୍ରେସ ନେତ୍ରୀ, ପୂର୍ବତନ କେନ୍ଦ୍ରମନ୍ତ୍ରୀ, ୪ ଥରର ରାଜ୍ୟପାଳ ଶ୍ରୀମତୀ ମାର୍ଗାରେଟ୍ ଆଲଭା ମିଳିତ ବିରୋଧୀ ଦଳର ଉପରାଷ୍ଟ୍ରପତି ପ୍ରାର୍ଥୀ ହୋଇଛନ୍ତି । ଆଜି ଅପରାହ୍ନରେ ବସିଥିବା ବୈଠକରେ ତାଙ୍କ ନାଁ ଉପରେ ମୋହର ବାଜିଛି । ଏନସିପି ମୁଖ୍ୟ ଶରଦ ପାୱାର ଏହି ନିଷ୍ପତ୍ତି ଘୋଷଣା କରିଛନ୍ତି । ଗତକାଲି ଏନଡିଏ ପକ୍ଷରୁ ପଶ୍ଚିମବଙ୍ଗ ରାଜ୍ୟପାଳ ଜଗଦୀପ୍ ଧନକରଙ୍କୁ ଉପରାଷ୍ଟ୍ରପତି ପ୍ରାର୍ଥୀ ଘୋଷଣା କରାଯାଇଥିଲା ।
୭୭ ବର୍ଷୀୟା ମାର୍ଗାରେଟ୍ ଆଲଭା କଂଗ୍ରେସ ଦଳର ଜଣେ ପୋଖତ ରାଜନେତା ଭାବେ ଜଣାଶୁଣା । ରାଜୀବ ଗାନ୍ଧୀଙ୍କ ସରକାରରେ ସେ କ୍ୟାବିନେଟ୍ ମନ୍ତ୍ରୀ ଭାବେ ଦାୟିତ୍ୱ ତୁଲାଇଥିଲେ । ସଂସଦକୁ ସେ ୫ ଥର ନିର୍ବାଚିତ ହୋଇଛନ୍ତି । ଗୋଆ, ଗୁଜୁରାଟ, ରାଜସ୍ଥାନ ଏବଂ ଉତ୍ତରାଖଣ୍ଡର ରାଜ୍ୟପାଳ ଭାବେ ମଧ୍ୟ କାର୍ଯ୍ୟ କରିଛନ୍ତି ।
ଉପରାଷ୍ଟ୍ରପତି ପ୍ରାର୍ଥୀ ଭାବେ ତାଙ୍କର ମନୋନୟନକୁ ଶ୍ରୀମତୀ ଆଲଭା ବିନମ୍ରତାର ସହ ଗ୍ରହଣ କରିଛନ୍ତି । ନେତୃତ୍ୱ ତାଙ୍କ ଉପରେ ଆସ୍ଥା ରଖିଥିବାରୁ ସେ ଟୁଇଟ୍ କରି ଧନ୍ୟବାଦ ଜଣାଇଛନ୍ତି ।
ସୂଚନାଥାଉକି, ବର୍ତ୍ତମାନର ଉପରାଷ୍ଟ୍ରପତି ଭେଙ୍କିୟା ନାଇଡୁଙ୍କ କାର୍ଯ୍ୟକାଳ ଆସନ୍ତା ଅଗଷ୍ଟ ୧୦ ତାରିଖରେ ଶେଷ ହେବ । ଅଗଷ୍ଟ ୬ ତାରିଖରେ ଉପରାଷ୍ଟ୍ରପତି ନିର୍ବାଚନ ହେବ । ରାଷ୍ଟ୍ରପତି ନିର୍ବାଚନ ଅଙ୍କରେ ଏନଡିଏ ସହଜଜନକ ସ୍ଥିତିରେ ଥିବା ବେଳେ ଉପରାଷ୍ଟ୍ରପତି ନିର୍ବାଚନ ଅଙ୍କ ସ୍ପଷ୍ଟ ହୋଇନାହିଁ । ଯାହା ବି ହେଲେ, ମିଳିତ ବିରୋଧୀ ଦଳ ପକ୍ଷରେ ଉପରାଷ୍ଟ୍ରପତି ନିର୍ବାଚନ ମଧ୍ୟ ସହଜ ହେବ ନାହିଁ ।
