ଭୁବନେଶ୍ୱର: ବିରି ମାଡ଼ ଦେଖି କୋଳଥ ଚେପା । ରାଜସ୍ୱ ବିଭାଗର କାର୍ଯ୍ୟାନୁଷ୍ଠାନ ଚିଠି ଦେଖି ଭୁବନେଶ୍ୱର ମହାନଗର ନିଗମ(ବିଏମସି)କୁ ତର ସହିନି । ଭୁବନେଶ୍ୱର ପଟିଆରେ ୫ ଏକର ସରକାରୀ ଲିଜ୍ ଜାଗାରେ ନିର୍ମାଣାଧୀନ ବିଶାଳ ରିଅଲ୍ ଇଷ୍ଟେଟ୍ ପ୍ରକଳ୍ପ ‘ଅର୍ବାନ୍ ମାଜେଷ୍ଟିକ୍’ କାମ ଶେଷର ବନ୍ଦ କରିଛନ୍ତି ବିଏମସି କର୍ତ୍ତୃପକ୍ଷ । ବିଏମସିର ଏହି ପଦକ୍ଷେପ ପ୍ରକଳ୍ପ ନିର୍ମାଣକାରୀ ପ୍ରଭାବଶାଳୀଙ୍କ ପିଠିରେ ଛାଟ ଭଳି ହୋଇଛି । ‘ମିଡ ଡେ ଓଡ଼ିଶା’ ପ୍ରଥମେ ଏହି ଖବର ଲୋକଲୋଚନକୁ ଆଣିଥିଲା ।
ଉକ୍ତ ଜାଗାର ଆରଓଆର ସଂଶୋଧନ କରି ପୂର୍ବାବସ୍ଥାକୁ ଫେରାଇ ଆଣିବା ପାଇଁ ସାଧାରଣ ପ୍ରଶାସନ ବିଭାଗ ପକ୍ଷରୁ ସେପ୍ଟେମ୍ବର ୨୧ ତାରିଖରେ ଖୋର୍ଦ୍ଧା ଜିଲ୍ଲା ପ୍ରଶାସନକୁ ଏକ ନିର୍ଦ୍ଦେଶନାମା ଜାରି କରାଯାଇଥିଲା । ଉକ୍ତ ପ୍ରକଳ୍ପର ପ୍ଲାନ୍ ଅନୁମୋଦନକାରୀ ବିଏମସି/ବିଡିଏ ଅନୁମୋଦନ ବାତିଲ କରି ନିର୍ମାଣ କାର୍ଯ୍ୟ ବନ୍ଦ କରିବାକୁ ମଧ୍ୟ କୁହାଯାଇଥିଲା । ମାତ୍ର ହାଇକୋର୍ଟଙ୍କ ରହିତାଦେଶ ଆଳ ଦେଖାଇ ଖୋର୍ଦ୍ଧା ଜିଲ୍ଲାପାଳ ଅଟକି ଯାଇଥିଲେ । ଅକ୍ଟୋବର ୧୦ ତାରିଖରେ ତହସିଲଦାରଙ୍କୁ ଚିଠି କରି କାର୍ଯ୍ୟାନୁଷ୍ଠାନରୁ ବିରତ ରଖିଥିଲେ । ମାତ୍ର ଅକ୍ଟୋବର ୨୩ରେ ସରକାର ପୂର୍ବ ନିଷ୍ପତ୍ତିକୁ ଫେରି ଆସିଥିଲେ । ଉକ୍ତ ବେଆଇନ କାର୍ଯ୍ୟ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ରାଜସ୍ୱ ବିଭାଗ ପକ୍ଷରୁ ଖୋର୍ଦ୍ଧା ଜିଲ୍ଲାପାଳଙ୍କୁ ଚିଠି କରାଯାଇଥିଲା ।
ବିଏମସିର ଏହି କାର୍ଯ୍ୟାନୁଷ୍ଠାନ ରାଜ୍ୟ ସରକାରଙ୍କ ଆଭିମୁଖ୍ୟକୁ ସ୍ପଷ୍ଟ କରିଛି । ବେଆଇନ କାର୍ଯ୍ୟକୁ ଆଦୌ ପ୍ରଶୟ ଦିଆଯିବ ନାହିଁ ବୋଲି ସରକାର ଜଣାଇ ଦେଇଛନ୍ତି । ଅନ୍ୟପକ୍ଷରେ, ସେଠାରେ ଅନାଥ ଶିଶୁମାନଙ୍କ ପାଇଁ ବାସଗୃହ ନିର୍ମାଣ କରିବାକୁ ଶାସକ ଦଳର ଅନେକ ନେତା ପରାମର୍ଶ ଦେଇଛନ୍ତି । ଅନାଥ ଶିଶୁଙ୍କ ଦାୟିତ୍ୱ ପ୍ରତ୍ୟେକ ମନ୍ତ୍ରୀ ଓ ବିଧାୟକ ନେବାକୁ ଇତିମଧ୍ୟରେ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ପ୍ରସ୍ତାବକୁ ସବୁସ୍ତରରୁ ସ୍ୱାଗତ କରାଯାଉଥିବାରୁ ପଟିଆର ସେହି ୫ ଏକର ଜାଗାରେ ଏକ ଅର୍ବାନ୍ ଅରଫାନେଜ୍ ନିର୍ମାଣ ସପକ୍ଷରେ ଅନେକ ମତବ୍ୟକ୍ତ କରିଛନ୍ତି ।
ସୂଚନାଥାଉକି, ପଟିଆ ମୌଜାରେ ୫ ଏକରର ଜାଗାକୁ ରାଜ୍ୟ ସରକାର ଶିଳ୍ପ ପ୍ରତିଷ୍ଠା ଉଦ୍ଦେଶ୍ୟରେ ପଲଟ୍ରୋନିକ୍ ଆଲାଏଡ ଇଣ୍ଡଷ୍ଟ୍ରିଜ୍ ତେଜପାଲ୍ ସିଂଙ୍କୁ ୯୯ ବର୍ଷିଆ ଲିଜ୍ ସୂତ୍ରରେ ଦେଇଥିଲେ । ୧୭.୧୨.୧୯୭୯ରେ ଭୁବନେଶ୍ୱର ତହସିଲଦାରଙ୍କ ଦ୍ୱାରା ଏହି ଲିଜ୍ ଡିଡ୍ ରେଜିଷ୍ଟ୍ରି ହୋଇଥିଲା ।
ମାତ୍ର ପରବର୍ତ୍ତୀ ସମୟରେ ତେଜପାଲ୍ ସିଂ, ପ୍ରୋପ୍ରାଇଟର ପଲଟ୍ରୋନିକ୍ ଆଲାଏଡ ଇଣ୍ଡଷ୍ଟ୍ରିଜ୍ ନାଁରେ ୪୭୪/୫ ଖାତା ନମ୍ବର ପ୍ରସ୍ତୁତ କରାଯାଇ ସଂପୃକ୍ତ ଜାଗାର ଷ୍ଟାଟସ୍ ସ୍ଥିତିବାନ କରିଦିଆଗଲା । ତକ୍ରାଳୀନ ଭୁବନେଶ୍ୱର ତହସିଲଦାର ହାତକାଟି ସରକାରୀ ଜାଗାକୁ ସ୍ଥିତିବାନରେ ବଦଳେଇଦେଲେ ।
୨୦୨୨ ମସିହାରେ ଏହି ଜାଗାକୁ ‘ଘରବାରି’ କିସମ କରି ଦିଆଗଲା । ଓଏଲଆର ଆକ୍ଟର, ୧୯୬୦ର ଧାରା ୮-ଏରେ ଏହାର ସରକାରୀ ଆଦେଶ ପ୍ରକାଶ ପାଇଲା । ଅତଏବ, ୫ ଏକର ଜଙ୍ଗଲ କିସମର ମୂଳ ସରକାରୀ ଜାଗାଟି ସ୍ଥିତିବାନ ପାଲଟି ଘରବାରି କିସମକୁ ବଦଳିଗଲା ।
ପଲଟ୍ରୋନିକ୍ ଆଲାଏଡ ଇଣ୍ଡଷ୍ଟ୍ରିଜ୍ ପ୍ରୋପାଇଟର୍ ତେଜପାଲ୍ ସିଂଙ୍କ ନାଁରେ ଥିବା ଏହି ଜାଗା ପାୱାର ଅଫ୍ ଆଟର୍ଣ୍ଣିଂ ବଳରେ ଜନୈକ ପ୍ରଭାବଶାଳୀ ବ୍ୟକ୍ତିଙ୍କ ପାଖକୁ ଚାଲି ଆସିଛି । ସଂପୃକ୍ତ ପ୍ରଭାବଶାଳୀଙ୍କ ତତ୍ତ୍ୱାବଧାନରେ ସେଠାରେ ୬ଟି ଆପାର୍ଟମେଣ୍ଟ ବ୍ଲକ୍ ନିର୍ମାଣ ଚାଲିଛି । ଶିଳ୍ପ ପ୍ରତିଷ୍ଠା ଉଦ୍ଦେଶ୍ୟରେ ଦିଆଯାଇଥିବା ଏକ ଲିଜହୋଲ୍ଡ ଜାଗା ଉପରେ ରେସିଡେନସିଆଲ୍ କମ୍ପ୍ଲେକ୍ସ ନିର୍ମାଣ ପାଇଁ ୨୦୨୪ ଜାନୁଆରୀ ୨ରେ ବିଏମସି ଅନୁମତି ଦେଇଥିଲା ।
