ଭୁବନେଶ୍ୱର: ରାଷ୍ଟ୍ରାୟତ୍ତ ଉଦ୍ୟୋଗ ‘ବ୍ରିଜ୍ ଆଣ୍ଡ ରୁଫ୍ କର୍ପୋରେସନ୍’ ର ଗ୍ରୁପ୍ ଜିଏମ୍ ଚଞ୍ଚଲ ମୁଖାର୍ଜୀଙ୍କୁ ୧୦ ଲକ୍ଷ ଟଙ୍କା ଲାଞ୍ଚ ଦିଆଯିବା ମାମଲାରେ ବରିଷ୍ଠ ଆଇଏଏସ୍ ଅଫିସର ବିଷ୍ଣୁପଦ ସେଠୀଙ୍କ ଭୂମିକା ଦାଣ୍ଡରେ ପଡ଼ି ହାଟରେ ଗଡୁଛି । ଗତ ୭ ତାରିଖ ସଂଧ୍ୟାରେ ଭୁବନେଶ୍ୱରର ହୋଟେଲ୍ ମେ ଫେୟାର୍ ସାମନାରୁ ସିବିଆଇ ଟିମ୍ ୪ ଜଣଙ୍କୁ ଉଠାଇ ନେଇଥିଲା । ୧୦୦ କୋଟିର କାମ ହାତେଇବା ପାଇଁ ଡିଲ୍ ହେବାକୁ ଯାଉଥିବା ବେଳେ ସିବିଆଇ ହାବୁଡରେ ଏମାନେ ପଡ଼ିଥିଲେ ବୋଲି ବିଶ୍ୱସ୍ତ ସୂତ୍ରର ସୂଚନା ଆଧାରରେ ଆମେ (ମିଡ ଡେ ଓଡିଶା) ଖବର କରିଥିଲୁ । ଏହି ଘଟଣାରେ ଜଣେ ବରିଷ୍ଠ ଅଧିକାରୀଙ୍କର ସଂପୃକ୍ତି ରହିଥିବା ଆମେ ପ୍ରଥମେ ଜଣାଇଥିଲୁ । ବରିଷ୍ଠ ଆଇଏଏସ୍ ଅଫିସର ବିଷ୍ଣୁପଦ ସେଠୀଙ୍କୁ ସିବିଆଇ ସମନ ପରେ ତାହା ସତ୍ୟ ବୋଲି ପ୍ରମାଣିତ ହୋଇଛି ।
ଡିସେମ୍ବର ୧୧ ତାରିଖରେ ସିବିଆଇ ନିକଟରେ ହାଜର ହେବା ପାଇଁ ବିଷ୍ଣୁପଦ ସେଠୀଙ୍କୁ ନିଦେ୍ର୍ଦଶ ଥିଲା । ୧୦ ତାରିଖରେ ସିବିଆଇ ତାଙ୍କୁ ଏଥିପାଇଁ ଚିଠି କରିଥିଲା । ମାତ୍ର ସେ ସିବିଆଇରେ ହାଜର ହୋଇଛନ୍ତି ନା ନାହିଁ ଏ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ଗୋଟିଏ ସୂତ୍ରର ସୂଚନା କହୁଛି ଯେ ଶ୍ରୀ ସେଠୀ ସ୍ୱାସ୍ଥ୍ୟଗତ କାରଣ ଦର୍ଶାଇ ସିବିଆଇକୁ ସମୟ ମାଗିଛନ୍ତି । ମାତ୍ର ତାହା କେତେ ଦୂର ସତ୍ୟ ଜଣାପଡ଼ିନାହିଁ । ଗତକାଲି ବିଷ୍ଣୁପଦଙ୍କ ତିନି ଡ୍ରାଇଭରଙ୍କୁ ଜେରା କରିଥିଲା ସିବିଆଇ । ତାଙ୍କ ବାବୁ କେଉଁଆଡ଼େ ଯାଉଥିଲେ, କାହା ପାଖକୁ ଯାଉଥିଲେ, ବାବୁଙ୍କ ପାଖକୁ କିଏ କିଏ ଆସୁଥିଲେ, କେଉଁଠି ଭେଟଘାଟ ହେଉଥିଲା ସିବିଆଇ ଅଧିକାରୀମାନେ ପଚାରି ବୁଝିଥିଲେ । ସେହିଭଳି ଆଦିତ୍ୟ ଦେବ ଇନଫ୍ରା ପ୍ରାଇଭେଟ ଲିମିଟେଡର ନିଦେ୍ର୍ଦଶକ ତଥା ସୁପର କ୍ଲାସ୍ କଣ୍ଟ୍ରାକ୍ଟର ଦେବଦତ୍ତ ମହାପାତ୍ରଙ୍କ ପତ୍ନୀଙ୍କୁ ମଧ୍ୟ ସିବିଆଇ ପଚରା ଉଚୁରା କରିଥିଲା । ଆଜି ବ୍ରିଜ୍ ଆଣ୍ଡ ରୁଫ୍ କର୍ପୋରେସନ୍ ଅଫିସ ଉପରେ ରେଡ୍ କରିଥିଲା ସିବିଆଇ ଟିମ୍ ।
ସୂଚନାଯୋଗ୍ୟ, ଗତ ୭ ତାରିଖ ରାତିରେ ସିବିଆଇର ୬ ଜଣିଆ ଟିମ୍ ବ୍ରିଜ୍ ଆଣ୍ଡ ରୁଫ୍ କର୍ପୋରେସନ୍ ର ଗ୍ରୁପ୍ ଜିଏମ୍ ଚଞ୍ଚଲ ମୁଖାର୍ଜୀ, ଆଦିତ୍ୟ ଦେବ ଇନଫ୍ରା ପ୍ରାଇଭେଟ ଲିମିଟେଡର ନିର୍ଦ୍ଦେଶକ ଦେବଦତ୍ତ ମହାପାତ୍ର, ଅନ୍ୟତମ ସୁପର୍ କ୍ଲାସ୍ କଣ୍ଟ୍ରାକ୍ଟର ତଥା ପେଣ୍ଟା ଏ ଷ୍ଟୁଡିଓର ନିର୍ଦ୍ଦେଶକ ସନ୍ତୋଷ ମହାରଣାଙ୍କୁ ଗିରଫ କରିଥିଲା । ଦେବଦତ୍ତଙ୍କ କାରରୁ ୧୦ ଲକ୍ଷ ଟଙ୍କା ଏବଂ କିଛି ସୁନା ଜବତ ହୋଇଥିଲା । ଏକ ଟେଣ୍ଡର କାମ ହାତେଇବା ପାଇଁ ଡିଲ୍ ହେଉଥିବା ବେଳେ ସେମାନେ ସିବିଆଇ ହାବୁଡ଼ରେ ପଡ଼ିଥିଲେ ।
ଏହି ମାମଲାରେ ବରିଷ୍ଠ ଆଇଏଏସ୍ ବିଷ୍ଣୁପଦ ସେଠୀଙ୍କ ଲିଙ୍କ୍ ଥିବା ସିବିଆଇ ଜାଣିବାକୁ ପାଇଛି । ତାଙ୍କଠାରୁ ଗୁରୁତ୍ୱପୂର୍ଣ୍ଣ ତଥ୍ୟ ହାସଲ ପାଇଁ ସିବିଆଇରୁ ହାଜିରା ନୋଟିସ୍ ହୋଇଛି । ମାତ୍ର ଶ୍ରୀ ସେଠୀ ସ୍ୱାସ୍ଥ୍ୟଗତ କାରଣ ଦର୍ଶାଇ ସମୟ ଗଡ଼ାଇଥିବା ଜଣାପଡ଼ିଛି । ଏହା ଉପରେ ସିବିଆଇର ପଦକ୍ଷେପ ଆସନ୍ତାକାଲି ସ୍ପଷ୍ଟ ହେବ ବୋଲି ସୂଚନା ମିଳିଛି ।
ଇତିମଧ୍ୟରେ ଶ୍ରୀ ସେଠୀଙ୍କ କାର୍ଯ୍ୟକଳାପ ସମ୍ପର୍କରେ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ସାମନାକୁ ଆସିଛି । ସେ ବର୍ତ୍ତମାନ ରାଜ୍ୟ ସରକାରଙ୍କ ଏସସି/ଏସଟି ତଥା ଭିନ୍ନକ୍ଷମ ସଶକ୍ତିକରଣ ବିଭାଗର ପ୍ରମୁଖ ସଚିବ ଅଛନ୍ତି । ତାଙ୍କ ବିଭାଗ ଅଧୀନରେ ଥିବା ଆବାସିକ ଆଶ୍ରମ ସ୍କୁଲଗୁଡ଼ିକର ଉନ୍ନତିକରଣ କାର୍ଯ୍ୟ ନିମନ୍ତେ ୨୦୨୪ ଅକ୍ଟୋବର ୧୯ ତାରିଖରେ ୪ଟି ରାଷ୍ଟ୍ରାୟତ୍ତ ଉଦ୍ୟୋଗ ବ୍ରିଜ୍ ଆଣ୍ଡ ରୁଫ୍, ୱପକୋସ୍, ଏନବିସିସି ଓ ସିଇଏଲ୍ ସଂସ୍ଥା ମୁଖ୍ୟଙ୍କୁ ସେ ଚିଠି ଲେଖିଥିଲେ । ତେବେ ରାଜ୍ୟ ସରକାରଙ୍କ ସଂସ୍ଥାକୁ କାମ ନ ଦେଇ ରାଷ୍ଟ୍ରାୟତ୍ତ ସଂସ୍ଥାକୁ କାମ ଦେବା ପାଇଁ ତାଙ୍କର ଆଗ୍ରହ ସିବିଆଇ ସନ୍ଦେହ ଘେରକୁ ଆସିଛି ।
ସବୁଠାରୁ ବଡ଼କଥା ହେଉଛି, ଏହି କେନ୍ଦ୍ରୀୟ ସଂସ୍ଥାଠାରୁ ସବଲେଟ୍ ସୂତ୍ରରେ କାର୍ଯ୍ୟ ପାଉଥିଲେ ଆଦିତ୍ୟ ଦେବ ଇନଫ୍ରା ଓ ପେଣ୍ଟା ଏ ଷ୍ଟୁଡିଓ ପ୍ରାଇଭେଟ୍ ଲିମିଟେଡ୍ । ବ୍ରିଜ୍ ଆଣ୍ଡ ରୁଫ୍ ଜିଜିଏମ୍ ଙ୍କ ସମେତ ଏହି ଦୁଇ ସଂସ୍ଥାର ନିର୍ଦ୍ଦେଶକଙ୍କୁ ସିବିଆଇ ଗିରଫ କରିଥିବାରୁ ବିଷ୍ଣୁପଦ ସେଠୀ ଯେ ସନ୍ଦେହରୁ ମୁକୁଳି ପାରିବେ ନାହିଁ ତାହା ସ୍ପଷ୍ଟ । ଉପରୋକ୍ତ ଦୁଇ ସଂସ୍ଥାକୁ ଆଖିରେ ରଖି ସେ କୋଟି କୋଟି ଟଙ୍କାର କାମ କେନ୍ଦ୍ରୀୟ ସଂସ୍ଥାକୁ ଦେଉଥିବା ସନ୍ଦେହ କରାଯାଉଛି । ସିବିଆଇ ଜେରା ପରେ ତାହା ସ୍ପଷ୍ଟ ହେବ ।
