ଭୁୁବନେଶ୍ୱର: ଭୁବନେଶ୍ୱରସ୍ଥିତ ଇନଷ୍ଟିଚ୍ୟୁଟ୍ ଅଫ ଲାଇଫ ସାଇନସ(ଆଇଏଲଏସ) ନିର୍ଦ୍ଦେଶକ ଡକ୍ଟର ଅଜୟ ପରିଡ଼ାଙ୍କର ଆକସ୍ମିକ ବିୟୋଗ ହୋଇଛି । ଏକ କନଫରେନ୍ସରେ ଯୋଗଦେବା ପାଇଁ ସେ ଗୌହାଟୀ ଯାଇଥିଲେ । ସେଠାରେ ତାଙ୍କର ହୃଦଘାତ୍ ରେ ପରଲୋକ ହୋଇଥିବା ଆଇଏଲସି ସୂତ୍ରରୁ ସୂଚନା ମିଳିଛି । କୋଭିଡ୍ ସମୟରେ ସମସ୍ତଙ୍କୁ ସଠିକ୍ ପରାମର୍ଶ ଦେଇ ଘରେ ଘରେ ପରିଚିତ ଥିବା ଡକ୍ଟର ପରିଡ଼ାଙ୍କ ଅକାଳ ବିୟୋଗ ବିଭିନ୍ନ ମହଲରେ ଶୋକର ଛାୟା ଖେଳାଇ ଦେଇଛି ।
କେଉଁ ପରିସ୍ଥିତିରେ ତାଙ୍କର ହୃତଘାତ ହେଲା ଏବଂ ମରଶରୀର ଓଡ଼ିଶାକୁ କେତେବେଳେ ଅଣାଯିବ ତାହାର ବିସ୍ତୃତ ସୂଚନା ମିଳିପାରିନାହିଁ । ତେବେ ମୃତ୍ୟୁ ଖବର ପ୍ରଚାର ହେବା ପରେ ଯାଜପୁର ଜିଲ୍ଲା ଭଗବାନପୁରସ୍ଥିତ ତାଙ୍କ ପୈତୃକ ଗାଁରୁ ଆତ୍ମୀୟ ସ୍ୱଜନ ଭୁବନେଶ୍ୱର ଅଭିମୁଖେ ବାହାରିଥିବା ଜଣାପଡ଼ିଛି ।
ଜଣେ ବିଶିଷ୍ଟ ବୈଜ୍ଞାନିକ(ବାୟୋଲୋଜିଷ୍ଟ), ଗବେଷକ ଭାବେ ଜଣାଶୁଣା ଡକ୍ଟର ପରିଡ଼ା କୋଭିଡ୍ ସମୟରେ ସରକାରଙ୍କ ପକ୍ଷରୁ ଗୁରୁ ଦାୟିତ୍ୱ ତୁଲାଇଥିଲେ । ପ୍ରତିଟି କ୍ଷେତ୍ରରେ ରାଜ୍ୟ ସରକାରଙ୍କୁ ମାର୍ଗଦର୍ଶନ କରୁଥିଲେ । କୋଭିଡ୍ ତତ୍ତ୍ୱକୁ ଅତି ସରଳ ଭାବେ ଲୋକଙ୍କ ପାଖରେ ପହଞ୍ଚାଇବା ସହ କୋଭିଡ୍ ଠାରୁ ଦୂରେଇ ରହିବାର ସଠିକ୍ ପରାମର୍ଶ ଦେଉଥିଲେ । ଏଥିପାଇଁ ସେ ଘରେ ଘରେ ପରିଚିତ ଥିଲେ । ଲୋକେ ଉତ୍ସୁକତାର ସହ ତାଙ୍କ ପରାମର୍ଶକୁ ଅପେକ୍ଷା କରୁଥିଲେ ।
ବିଜ୍ଞାନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ୨୦୧୪ ମସିହାରେ ତାଙ୍କୁ ଭାରତ ସରକାରଙ୍କ ପଦ୍ମଶ୍ରୀ ସମ୍ମାନରେ ସମ୍ମାନିତ କରାଯାଇଥିଲା ।
