ମାଟିରେ ମିଶିଲା ନଏଡ଼ା ଟ୍ୱିନ୍ ଟାୱାର

ନୂଆଦିଲ୍ଲୀ: ନଏଡ଼ାର ବହୁ ଚର୍ଚ୍ଚିତ ଟ୍ୱିନ୍ ଟାୱାର୍ ଆଜି ମାଟିରେ ମିଶିଛି । ୩୨ ଓ ୨୯ ମହଲାର ଦୁଇଟି ଯାକ ଟାୱାର ବିଶାଳ ଗର୍ଜନ ସହ ମାତ୍ର ୯ ସେକେଣ୍ଡରେ ଧୂଳିସାତ୍ ହୋଇଯାଇଛି । ବେଆଇନ ଭାବେ ଏହାର ନିର୍ମାଣ ହୋଇଥିବାରୁ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ଏହାକୁ ଭଙ୍ଗା ଯାଇଛି । ଭାରତରେ ଏହା ସବୁଠାରୁ ବଡ଼ ଉଚ୍ଛେଦ କାର୍ଯ୍ୟ ହୋଇଥିବାରୁ ଦେଶବାସୀଙ୍କ ଉତ୍କଣ୍ଠା ରହିଥିଲା ।

ପୂର୍ବ ନିର୍ଦ୍ଧାରିତ ସମୟ ଅପରାହ୍ନ ସାଢ଼େ ଦୁଇଟା ବେଳେ ଗ୍ରୀନ୍ ବଟନ୍ ଦବାଯାଇ ବିସ୍ଫୋରଣ କରାଯାଇଥିଲା । ୯୧୫ ଫ୍ଲାଟ୍ ବିଶିଷ୍ଟ ଏହି ଟ୍ୱିନ୍ ଟାୱାର ଭାଙ୍ଗିବା ପାଇଁ ବ୍ୟାପକ ପ୍ରସ୍ତୁତି ହୋଇଥିଲା । ଏଥିପାଇଁ ୩୭୦୦ କେଜି ବିସ୍ଫୋରକ ସାମଗ୍ରୀ ବ୍ୟବହୃତ ହୋଇଥିଲା । ବିପଦ ଆଶଙ୍କାରେ ଟାୱାର ଆଖପାଖରେ ରହୁଥିବା ୫୦୦୦ ଲୋକଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଥିଲା । ଦୁଇଟି ଯାକ ଟାୱାର ଚାରିପଟେ ୧୦୦ ମିଟରକୁ ନିଷିଦ୍ଧାଞ୍ଚଳ କରାଯାଇଥିଲା ।

ସୂଚନାଯୋଗ୍ୟ, ନଏଡ଼ାର ସେକ୍ଟର ୯୩-ଏରେ ସୁପରଟେକ୍ ଲିମିଟେଡ ୭.୫ ଲକ୍ଷ ବର୍ଗଫୁଟରେ ଏହି ଦୁଇଟିଯାକ ଟାୱାର ନିର୍ମାଣ କରିଥିଲା । ୩୨ ମହଲା ବିଶିଷ୍ଟ ଆପେକ୍ସ ଟାୱାର ଉଚ୍ଚତା ୧୦୩ ମିଟର ହୋଇଥିବା ବେଳେ ୨୯ ମହଲା ବିଶିଷ୍ଟ ସିୟେନ ଟାୱାର ଉଚ୍ଚତା ୯୭ ମିଟର ହୋଇଥିଲା । ତେବେ ବେଆଇନ ଭାବେ ଟାୱାର ନିର୍ମାଣ, ଦୁଇଟି ଯାକ ଟାୱାର ମଧ୍ୟରେ ଦୂରତା କମ୍ ହେବା ଆଦି ଯାବତୀୟ ଅନିୟମିତତାକୁ ନେଇ ୨୦୧୨ ମସିହାରେ ମାମଲା କୋର୍ଟକୁ ଯାଇଥିଲା ।

୨୦୧୪ ରେ ଆହ୍ଲାବାଦ ହାଇକୋର୍ଟ ଏହାକୁ ଭାଙ୍ଗିବା ପାଇଁ ନିଦେ୍ର୍ଦଶ ଦେଇଥିଲେ । ତେବେ ବିଲଡର ସଂସ୍ଥା ଏହାକୁ ସୁପ୍ରିମକୋର୍ଟରେ ଚାଲେଂଜ କରିଥିଲେ । ମାତ୍ର ଦେଶର ସର୍ବୋଚ୍ଚ ନ୍ୟାୟାଳୟ ଗତବର୍ଷ ଅଗଷ୍ଟରେ ଆହ୍ଲାବାଦ ହାଇକୋର୍ଟ ରାୟକୁ କାଏମ ରଖିଥିଲେ । ୩ ମାସ ମଧ୍ୟରେ ଏହି ବେଆଇନ ନିର୍ମାଣ ଭାଙ୍ଗିବାକୁ ନିର୍ଦ୍ଦେଶ ଦେଇଥିଲେ । ମାତ୍ର ବୈଷୟିକ କାରଣରୁ ଏହା ବର୍ଷେ ବିଳମ୍ବ ହୋଇଥିଲା ।

କୁତବ ମିନାରଠାରୁ ଅଧିକ ଉଚ୍ଚତାର ଏହି ଟ୍ୱିନ୍ ଟାୱାର ଭାଙ୍ଗିବା ଡିଜାଇନିଂ ପ୍ରସ୍ତୁତ କରିଥିଲେ ଦକ୍ଷିଣ ଆଫ୍ରିକାର ଜେଟ୍ କମ୍ପାନୀ । ମୁମ୍ବାଇର ଏଡିଫାଇସ ଇଂଜିନିୟରିଂ କମ୍ପାନୀ ସମ୍ପୂର୍ଣ୍ଣ ଭାବେ ଭାଙ୍ଗିବା ଦାୟିତ୍ୱ ନେଇଥିଲା । ଏଥିପାଇଁ ୬ ମାସର କସରତ ହୋଇଥିଲା । ଭାଙ୍ଗିବା ପାଇଁ ପ୍ରାୟ ୨୦ କୋଟି ଟଙ୍କା ଖର୍ଚ୍ଚ ହୋଇଛି । ଏଥିରୁ ୫ କୋଟି ଟଙ୍କା ସୁପରଟେକ୍ କମ୍ପାନୀ ପ୍ରଦାନ କରିଥିବା ବେଳେ ଅବଶିଷ୍ଟ ୧୫ କୋଟି ଟଙ୍କା ୫୦ ହଜାର ଟନ୍ ଧ୍ୱଂସାବଶେଷରୁ ସଂଗ୍ରହ କରାଯିବ ।

ଏହି ଟାୱାର୍ ରେ ଘର କିଣିଥିବା ଗ୍ରାହକମାନଙ୍କୁ ସୁପରଟେକ୍ ଏବେ ୧୨ ପ୍ରତିଶତ ସୁଧ ସହ ସେମାନଙ୍କ ଅର୍ଥ ଫେରସ୍ତ କରିବ ।