ଭୁବନେଶ୍ୱର: ରିୟଲ୍ ଇଷ୍ଟେଟ୍ ବ୍ୟବସାୟ ପ୍ରତିଷ୍ଠାନ ଡିଏନ ଗ୍ରୁପ୍ ଉପରେ ଆୟକର ବିଭାଗ ପକ୍ଷରୁ ବଡ଼ ଧରଣର ରେଡ୍ ହୋଇଛି । ଭୁବନେଶ୍ୱର ଆଇଆରସି ଭିଲେଜସ୍ଥିତ ସଂସ୍ଥାର ମୁଖ୍ୟ କାର୍ଯ୍ୟାଳୟ ସମେତ ୨୫ ରୁ ଅଧିକ ଜାଗାରେ ଆଜି ବଡ଼ି ସକାଳୁ ଏକକାଳୀନ ଚଢ଼ଉ ଚାଲିଛି । ୟୁନିଟ୍-୪ରେ ଭଡ଼ାରେ ରହୁଥିବା ସଂସ୍ଥାର ଜଣେ କର୍ମଚାରୀଙ୍କ ଘରୁ ନଗଦ ୩୦ କୋଟି ଟଙ୍କା ଜବତ ହୋଇଥିବା କୁହାଯାଉଛି । ଡିଏନ ଗ୍ରୁପ୍ ଦ୍ୱାରା ଟିକସ ଫାଙ୍କି ଅଭିଯୋଗରେ ଏହି ରେଡ୍ ହେଉଥିବା ଅଫିସିଆଲ୍ ସୂତ୍ର କହୁଥିବା ବେଳେ ଏହା ପଛରେ ରାଜନୀତି ଖେଳ ଥିବା ଚର୍ଚ୍ଚା ହେଉଛି ।
ସୂଚନା ଅନୁଯାୟୀ, ଆୟକର ଟିମ୍ ଭୁବନେଶ୍ୱର ସମେତ ରାଜ୍ୟ ଓ ରାଜ୍ୟ ବାହାରର ୨୫ ରୁ ଅଧିକ ଜାଗାରେ ଏକକାଳୀନ ଚଢ଼ଉ କରିଛନ୍ତି । ସେମାନେ ସଂସ୍ଥାର ଆୟ ବ୍ୟୟ କାଗଜପତ୍ର ଯାଞ୍ଚ କରିବା ସହ ଠିକ୍ ଭାବରେ ଆୟକର ଦିଆଯାଉଛି ନା ନାହିଁ ଯାଞ୍ଚ କରୁଛନ୍ତି । ଭୁବନେଶ୍ୱରରେ ଆଇଆରସି ଭିଲେଜ୍ ସ୍ଥିତ ଡିଏନ ଗ୍ରୁପ୍ ର ମୁଖ୍ୟ କାର୍ଯ୍ୟାଳୟ, ଘାଟିକିଆସ୍ଥିତ ବିପୁଳ ଗାର୍ଡେନ୍ ରେ ରହୁଥିବା ସଂସ୍ଥାର ମାଲିକ ଜଗଦୀଶ ପ୍ରସାଦ ନାୟକ, ନିର୍ଦ୍ଦେଶକ ରତ୍ନମାଳା ସ୍ୱାଇଁ ଓ କିଛି ଅଧିକାରୀଙ୍କର ଘର ଏବଂ ୟୁନିଟ୍-୪ ସ୍ଥିତ ବିଏସଏନଏଲ କଲୋନୀରେ ଭଡ଼ାରେ ରହୁଥିବା ଜଣେ କର୍ମଚାରୀ ଚନ୍ଦ୍ରଶେଖର ପଣ୍ଡାଙ୍କ ଘରେ ଚଢ଼ଉ ଚାଲିଛି ।
ବିଭିନ୍ନ ଗଣମାଧ୍ୟମର ରିପୋର୍ଟ ଅନୁଯାୟୀ, ଚନ୍ଦ୍ରଶେଖରଙ୍କ ଘରୁ ତିନି ଟ୍ରଙ୍କ୍ ଏବଂ ଗୋଟିଏ ଆଟାଚ୍ ଭର୍ତ୍ତି ଟଙ୍କା ଆୟକର ଅଧିକାରୀମାନେ ଜବତ କରିଛନ୍ତି । ଏଥିରେ ୩୦ କୋଟି ଟଙ୍କା ଅଛି । ତେବେ ଆୟକର ବିଭାଗର ଅଧିକାରୀମାନେ ଏ ସମ୍ପର୍କରେ କିଛି କହିନାହାନ୍ତି । ଖୋଳତାଡ଼ ଜାରି ରହିଥିବାରୁ ସୂଚନା ଦେବାକୁ ସେମାନେ ମନା କରିଛନ୍ତି ।
