ଭୁବନେଶ୍ୱର: କର୍କଟ ରୋଗୀଙ୍କ ସେବା ଓ ସହାୟତା ପାଇଁ ସମର୍ପିତ ଅନୁଷ୍ଠାନ ‘କୋଣାର୍କ କ୍ୟାନ୍ସର ଫାଉଣ୍ଡେସନ’ (କେସିଏଫ୍) ଭୁବନେଶ୍ୱର ଶାଖାର ଷଷ୍ଠ ବାର୍ଷିକୋତ୍ସବ ସ୍ଥାନୀୟ ତେରାପନ୍ଥ ଭବନଠାରେ ମହାସମାରୋହରେ ଅନୁଷ୍ଠିତ ହୋଇଯାଇଛି।
କାର୍ଯ୍ୟକ୍ରମର ଶୁଭାରମ୍ଭ ସନ୍ଧ୍ୟା ୬ଟାରେ ପାରମ୍ପରିକ ଗଣେଶ ବନ୍ଦନା ସହ ହୋଇଥିଲା। ଏଥିରେ ମୁଖ୍ୟ ଅତିଥି ଭାବେ ରୋଟାରୀ-୩୨୬୨ର ଡିଜି, ଶ୍ରୀ ମନୋଜ ତ୍ରିପାଠୀ ଯୋଗଦେଇ ଫାଉଣ୍ଡେସନର ମହତ କାର୍ଯ୍ୟକୁ ପ୍ରଶଂସା କରିଥିଲେ। ଅନୁଷ୍ଠାନର ମ୍ୟାନେଜିଂ ଟ୍ରଷ୍ଟି ଅରୂପ ପଟ୍ଟନାୟକ ମୁଖ୍ୟ ଅଭିଭାଷଣ ପ୍ରଦାନ କରି କର୍କଟ ରୋଗୀଙ୍କ ଜୀବନରେ ଆଶାର ସଞ୍ଚାର କରିବା ପାଇଁ ଫାଉଣ୍ଡେସନର ପ୍ରତିବଦ୍ଧତା ବିଷୟରେ ଆଲୋକପାତ କରିଥିଲେ।
ପରବର୍ତ୍ତୀ ଅଧ୍ୟାୟରେ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଏକ ରିପୋର୍ଟ ମାଧ୍ୟମରେ ଅନୁଷ୍ଠାନର ପ୍ରାରମ୍ଭ ମୁହୂର୍ତ୍ତ ଓ ବର୍ତ୍ତମାନ ଅବସ୍ଥାର ପାର୍ଥକ୍ୟ ବିଷୟରେ ସମସ୍ତଙ୍କୁ ଜଣାଇଲେ। ଏହି ଅବସରରେ ଦୁଇଜଣ କର୍କଟ ପୀଡ଼ିତା ନିଜର ସଂଘର୍ଷମୟ ଜୀବନ ଯାତ୍ରା ବର୍ଣ୍ଣନା କରିବା ସହ ଫାଉଣ୍ଡେସନର ସହଯୋଗ କିପରି ତାଙ୍କ ଜୀବନରେ ସକାରାତ୍ମକ ପ୍ରଭାବ ପକାଇଛି ତାହା ବର୍ଣ୍ଣନା କରିଥିଲେ ।
ଉତ୍ସବର ସାମାଜିକ ସେବା ଅଂଶରେ, ୧୧ ଜଣ କ୍ୟାନ୍ସର ପୀଡ଼ିତାଙ୍କୁ ବିନା ମୂଲ୍ୟରେ ଉନ୍ନତ ମାନର କୃତିମ ସ୍ତନ ଓ କେଶ ପ୍ରଦାନ କରାଯାଇଥିଲା । ଏହା କ୍ୟାନ୍ସର ଜୀବନ ଯୁଦ୍ଧାରୀମାନଙ୍କୁ ମାନସିକ ସମର୍ଥନ ଓ ଆତ୍ମବିଶ୍ୱାସ ବୃଦ୍ଧିରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବ ବୋଲି ବିଶ୍ଵାସ ରଖାଯାଇଛି ।
ମୁଖ୍ୟ ଅତିଥି ନିଜ ଅଭିଭାଷଣରେ କହିଥିଲେ, “କର୍କଟ ରୋଗୀଙ୍କ ସେବା କ୍ଷେତ୍ରରେ କୋଣାର୍କ କ୍ୟାନ୍ସର ଫାଉଣ୍ଡେସନର କାର୍ଯ୍ୟଧାରା ଏକ ଅନନ୍ୟ ଉଦାହରଣ। ଏହା ସମାଜରେ କର୍କଟ ଯୋଦ୍ଧାମାନଙ୍କ ପାଇଁ ନୂଆ ଆଶାର ସଞ୍ଚାର କରୁଛି।” ଏହା ସହିତ ଆଗାମୀ ଦିନରେ ରୋଟାରୀ ଏବଂ କୋଣାର୍କ କ୍ୟାନ୍ସର ଫାଉଣ୍ଡେସନ ମିଳିତ ଭାବେ କିପରି ସେବା କାର୍ଯ୍ୟକୁ ଆହୁରି ବ୍ୟାପକ କରିବେ, ସେ ସମ୍ପର୍କରେ ସେ ଗୁରୁତ୍ୱପୂର୍ଣ୍ଣ ସୂଚନା ଦେଇଥିଲେ।
ଉତ୍ସବର ଶେଷରେ କ୍ୟାନ୍ସର ପୀଡ଼ିତ ଓ ସେମାନଙ୍କ ପରିବାରଗଣ ଅଭିନନ୍ଦନ ସହ ଦାନଶୀଳ ଏବଂ ସେବାପରାୟଣ ମାନବମାନଙ୍କୁ ଧନ୍ୟବାଦ ଜଣାଇଥିଲେ।
