ଭୁବନେଶ୍ୱର: ଏଥର ରଥଯାତ୍ରା ସ୍ମରଣୀୟ ହେବ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଦିନକ ଆଗରୁ ବିବୃତି ଦେଇଥିଲେ । ମାତ୍ର ଘରେ ନ ପଶୁଣୁ ଚାଳ ବାଜିଛି । ରଥଯାତ୍ରାକୁ ମଝିରେ ଦୁଇ ଦିନ ଥିଲା ବେଳେ ଆରମ୍ଭ ହୋଇଛି ବିଭ୍ରାଟ । ମହାପ୍ରଭୁଙ୍କ ଚିକିତ୍ସା ଉଦେ୍ଦଶ୍ୟରେ ଆସିଥିବା ମୋଦକ ଶ୍ରୀମନ୍ଦିର ପରିସରରୁ ଚୋରି ହୋଇଯାଇଛି । ଅନବସର ଏକାଦଶୀ ଦିନ ମହାପ୍ରଭୁଙ୍କ ସର୍ବାଙ୍ଗ ପରେ କବିରାଜ ସେବକ ଭକ୍ତମାନେ ସମୁଦାୟ ୩୧୩ ମୋଦକ ଗାରଦରେ ଜମା ଦେଇଥିଲେ । ମହାପ୍ରଭୁଙ୍କ ଭୋଗ ପାଇଁ ମଣତି ସମୟରେ ୩୧୩ ମୂର୍ତ୍ତି ଅମୁଣିଆ ମୋଦକରୁ ୭୦ କମ୍ ଥିବା ଜଣାପଡିଥିଲା ।
ବଳଭଦ୍ରଙ୍କ ବାଡ଼ଗ୍ରାହୀ ହଳଧର ଦାସ ଏହି ଚୋରି ଘଟଣା ଶ୍ରୀମନ୍ଦିର ପ୍ରଶାସକଙ୍କୁ ପ୍ରଥମେ ଲିଖିତ ଭାବରେ ଜଣାଇ ଥିଲା ବେଳେ ଜଗନ୍ନାଥଙ୍କ ବାଡ଼ଗ୍ରାହୀ ଜଗନ୍ନାଥ ସ୍ୱାଇଁ ମହାପାତ୍ର ଏହା ସତ ବୋଲି କହିଛନ୍ତି ।
ତେବେ ଆଶ୍ଚର୍ଯ୍ୟର କଥା, ଏହି ଅତ୍ୟନ୍ତ ସମ୍ବେନଶୀଳ ଘଟଣାର ସମ୍ପୂର୍ଣ୍ଣ ତଦନ୍ତ ନ ସରୁଣୁ ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଘଟଣାକୁ ମିଛ ବୋଲି କହି ଉଡ଼ାଇ ଦେଇଛନ୍ତି । ବାହାଦୁରି ମାରି ଲୋକଙ୍କୁ ବିଭ୍ରାନ୍ତ କରିବାକୁ ଏପରି କୁହାଯାଇଛି ବୋଲି ସେ ମନ୍ତବ୍ୟ ଦେବା ସହ “ବାହାଦୁରିଆ’ ମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଧମକ ଦେଇଛନ୍ତି । ଏହି ଘଟଣାରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ ଅସ୍ପଷ୍ଟ ମନ୍ତବ୍ୟ ଦେଇଛନ୍ତି ।
ମହାପ୍ରଭୁଙ୍କ ମୋଦକ ଚୋରି ଏବଂ ଆଇନମନ୍ତ୍ରୀଙ୍କ ଏଭଳି ବିବୃତିକୁ ନେଇ ବିଜେଡି କଡ଼ା ପ୍ରତିକ୍ରିୟା ରଖିଛି । ବଡ଼ଠାକୁରଙ୍କ ବାଡ଼ଗ୍ରାହୀ ଏ ବିଷୟ ଲିଖିତ ଆକାରରେ ଜଣାଇଲା ପରେ ମଧ୍ୟ ଆଇନମନ୍ତ୍ରୀ ଓ ମୁଖ୍ୟ ପ୍ରଶାସକ ଏହାକୁ ଚପାଇ ଦେବାକୁ ଉଦ୍ୟମ କରିବା ସରକାରଙ୍କ ଅପାରଗତାକୁ ଦର୍ଶାଉଛି ବୋଲି ଏକ ସାମ୍ବାଦିକ ସମ୍ମିଳନୀରେ ଦଳର ମୁଖପାତ୍ର ଡ. ଲେଲିନ୍ ମହାନ୍ତି କହିଛନ୍ତି । ଗତବର୍ଷ ରଥଯାତ୍ରା ସମୟରେ ବଡ଼ଠାକୁର ପଡ଼ଇଯିବା ଘଟଣାର ରିପୋର୍ଟ ଆଜି ଯାଏଁ ମିଳିଲା ନାହିଁ । ଶ୍ରୀଜଗନ୍ନାଥଙ୍କୁ ନେଇ ଅନେକ ମିଛ ପ୍ରଚାର କରି କ୍ଷମତାକୁ ଆସିଥିବା ବିଜେପି ସରକାରଙ୍କ ଆଇନମନ୍ତ୍ରୀ ନୈତିକ ଦାୟିତ୍ୱ ବହନ କରି ଇସ୍ତଫା ଦିଅନ୍ତୁ ବୋଲି ସେ ଦାବି କରିଛନ୍ତି ।
