ଭୁବନେଶ୍ୱର: ମନର କୋହ ଓ ଯନ୍ତ୍ରଣାକୁ ଧରି ସମସ୍ତଙ୍କ ଶରଣ ପଶିଥିଲେ । କଲେଜ ସହପାଠୀ, ଅଧ୍ୟକ୍ଷଙ୍କଠାରୁ ଆରମ୍ଭ କରି ଏସପି, ସାଂସଦ, ଉଚ୍ଚଶିକ୍ଷା ମନ୍ତ୍ରୀ, ମୁଖ୍ୟମନ୍ତ୍ରୀ, କେନ୍ଦ୍ରମନ୍ତ୍ରୀଙ୍କୁ ଜଣାଇ ଯନ୍ତ୍ରଣାରୁ ମୁକ୍ତି ଦେବା ପାଇଁ ନେହୁରା ହୋଇଥିଲେ । ଯେଉଁ ଛାତ୍ର ସଂଗଠନକୁ ନିଜର କରିଥିଲେ ସିଏ ବି ସାଙ୍ଗରେ ରହିଲେନି । ଓଲଟି ବିଭିନ୍ନସ୍ତରରୁ ତାଙ୍କୁ ମିଳିଲା ଲାଂଛନା ଏବଂ ଅପମାନ । ଅଭିଯୋଗ ପ୍ରତ୍ୟାହାର ପାଇଁ ବଢ଼ିଲା ଚାପ । ନଚେତ୍ କ୍ୟାରିୟର୍ ବରବାଦ କରି ଦିଆଯିବ ବୋଲି ଧମକ ଦିଆଗଲା । ଲଢ଼େଇ କରିବାର ଶକ୍ତି ଓ ସାମର୍ଥ ହରାଇ ସାରିଲା ପରେ ଶେଷରେ ତିଳ ତିଳ କରି ନିଜକୁ ଜାଳିଦେବାକୁ ଚରମ ନିଷ୍ପତ୍ତି ନେଲେ ।
ଭୁବନେଶ୍ୱର ଏମସ୍ ରେ ଜୀବନମରଣ ସହ ସଂଘର୍ଷ କରୁଥିବା ବାଲେଶ୍ୱର ଫକୀର ମୋହନ ସ୍ୱୟଂଶାସିତ କଲେଜ ଛାତ୍ରୀଙ୍କର ଏହା ଜୀବନ କାହାଣୀ । ତାଙ୍କୁ ନ୍ୟାୟ ଦେଇ ଯନ୍ତ୍ରଣାମୁକ୍ତ କରିବା ପାଇଁ ଆମର ବ୍ୟବସ୍ଥା ଯେ ପଙ୍ଗୁ ପାଲଟିଯାଇଥିଲା ତାହା ଏବେ ଦୁନିଆ ଦେଖୁଛି । ତାଙ୍କ ଗୁହାରି କେହି ଶୁଣି ନ ଥିଲେ । ମାସ ମାସ ଧରି ଭୋଗୁଥିବା ତାଙ୍କର ମାନସିକ ଯନ୍ତ୍ରଣାକୁ କେହି ବୁଝିବାକୁ ଚେଷ୍ଟା କରି ନ ଥିଲେ ।
ପୀଡ଼ିତାଙ୍କ ଅଭିଯୋଗ ସତ୍ୟ ହୋଇଥିଲେ, ଅଭିଯୁକ୍ତ ଏଚଓଡି ସମୀର କୁମାର ସାହୁଙ୍କୁ ସୁରକ୍ଷା ଦେବା ପାଇଁ ଖୋଦ୍ ବିଭାଗର କିଛି ଛାତ୍ରଛାତ୍ରୀ ଏକଜୁଟ୍ ହୋଇ ତାଙ୍କର ଚରିତ୍ର ହନନ କରିବାକୁ ପଛାଇ ନାହାନ୍ତି । ଅଧ୍ୟକ୍ଷଙ୍କୁ ସେ ବାରମ୍ବାର ଭେଟି ଗୁହାରି କରିଥିଲେ ମଧ୍ୟ ତାଙ୍କୁ ନିରାଶ ହେବାକୁ ପଡ଼ିଥିଲା । ଓଲଟି କଲେଜ ଆଭ୍ୟନ୍ତରୀଣ କମିଟି ଜରିଆରେ ଅଭିଯୁକ୍ତ ଅଧ୍ୟାପକଙ୍କୁ କ୍ଲିନଚିଟ୍ ଦିଆଗଲା । ଏହି ଆଧାରରେ ଅଭିଯୋଗ ପ୍ରତ୍ୟାହାର ପାଇଁ ମିଳିମିଶି ସମସ୍ତେ ଚାପ ପକାଇଥିଲେ । ଗତକାଲି ଶେଷଥର ପାଇଁ ଅଧ୍ୟକ୍ଷଙ୍କୁ ଭେଟି ନ୍ୟାୟ ମାଗିଥିଲେ ମଧ୍ୟ ତାଙ୍କୁ ମିଳିଲା ଲାଂଛନା । ଶେଷରେ ସେହି ଅଧ୍ୟକ୍ଷଙ୍କ ପ୍ରକୋଷ୍ଠ ବାହାରେ ନିଜ ଦେହରେ ପେଟ୍ରୋଲ୍ ଢ଼ାଳି ଦିଆସିଲି ଚେଙ୍ଗିଦେଲେ ।
୯୫ ପ୍ରତିଶତ ଜଳି ହସ୍ପିଟାଲ୍ ବେଡ୍ ରେ ମୃତ୍ୟୁ ସହ ସଂଘର୍ଷ କରୁଥିବା ଛାତ୍ରୀଙ୍କ ଘର ଭୋଗରାଇ ଅଞ୍ଚଳରେ । ସେ ଅବଳା କି ଦୁର୍ବଳା ନ ଥିଲେ । ମାତ୍ର ପରିସ୍ଥିତି ତାଙ୍କୁ ଏଭଳି କରିଦେଲା । ଇଣ୍ଟିଗ୍ରେଟେଡ୍ ବିଏଡ୍ ଦ୍ୱିତୀୟ ବର୍ଷର ଏହି ଛାତ୍ରୀ ମାର୍ଶାଲ ଆର୍ଟରେ ସେଲ୍ଫ ଡିଫେନ୍ସ ଟ୍ରେନିଂ ନେଇଥିଲେ । ବିଭିନ୍ନ କଲେଜକୁ ଯାଇ ସେ ଅନ୍ୟମାନଙ୍କୁ ସେଲ୍ଫ ଡିଫେନ୍ସ ଟ୍ରେନିଂ ଦେଉଥିଲେ ।
ଖାଲି ସେତିକି ନୁହେଁ । ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ(ଏବିଭିପି)ର ସେ ଥିଲେ ସକ୍ରିୟ କାର୍ଯ୍ୟକର୍ତ୍ତା । ସଂଗଠନ ପାଇଁ ସଦସ୍ୟ ସଂଗ୍ରହ କରୁଥିଲେ । ସଂଗଠନ ଆନୁକୂଲ୍ୟରେ ଆୟୋଜିତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମର ସେ ନେତୃତ୍ୱ ନେଉଥିଲେ । ପ୍ରତିବର୍ଷ ଏବିଭିପି ପକ୍ଷରୁ ହେଉଥିବା ପ୍ରତିଭା ସଙ୍ଗମ କାର୍ଯ୍ୟକ୍ରମରେ ସାମିଲ ହେଉଥିଲେ । ଅଭିନୟରେ ମଧ୍ୟ ତାଙ୍କର ପାରଦର୍ଶିତା ଥିଲା । ଭଲ ଅଭିନୟ ପାଇଁ ସେ ଅନେକ ପୁରସ୍କାର ପାଇଛନ୍ତି ।
ନେତୃତ୍ୱ ଦେଉଥିବା ଏବଂ ଆତ୍ମରକ୍ଷା ପାଇଁ ଅନ୍ୟଙ୍କୁ ତାଲିମ ଦେଉଥିବା ଝିଅ ଦିନେ ଅସହାୟ ହୋଇ ନିଜ ଜୀବନ ନିଜ ହାତରେ ଜାଳିଦେବାକୁ ଉଚିତ୍ ମଣିବା ସମସ୍ତଙ୍କ ହୃଦୟ ଚହଲାଇ ଦେଇଛି ।
