ନୂଆଦିଲ୍ଲୀ: ରାମମନ୍ଦିର ଆନ୍ଦୋଳନର ପ୍ରମୁଖ ବିନ୍ଧାଣୀ, ଭାରତବର୍ଷର ମହାନ୍ ଜନନେତା, ପୂର୍ବତନ ଉପ ପ୍ରଧାନମନ୍ତ୍ରୀ ଲାଲକୃଷ୍ଣ ଆଡଭାନୀଙ୍କୁ ମିଳିବ ଦେଶର ସର୍ବୋଚ୍ଚ ବେସାମରିକ ସମ୍ମାନ ‘ଭାରତ ରତ୍ନ’ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ତାଙ୍କ ସୋସିଆଲ୍ ମିଡିଆ ହାଣ୍ଡଲ୍ ‘ଏକ୍ସ’ ରେ ଏହି ସୂଚନା ଦେବା ସହ ଆଡଭାନୀଙ୍କ ସହ କଥା ହୋଇ ଶୁଭେଚ୍ଛା ଜଣାଇଛନ୍ତି । ଆଡଭାନୀ ଆମ ସମୟର ସବୁଠୁ ସମ୍ମାନନୀୟ ରାଷ୍ଟ୍ରନେତା । ଭାରତର ପ୍ରଗତି ପାଇଁ ତାଙ୍କର ଯୋଗଦାନ ସ୍ମରଣୀୟ ବୋଲି ପ୍ରଧାନମନ୍ତ୍ରୀ କହିଛନ୍ତି । ଏହି ସମ୍ମାନ ପାଇଁ ଆଡଭାନୀ ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ସମେତ ସମସ୍ତ ଦେଶବାସୀଙ୍କୁ କୃତଜ୍ଞତା ଜଣାଇଛନ୍ତି । ସେ କହିଛନ୍ତି ଏ ଜୀବନ ମୋ ପାଇଁ ନୁହେଁ । ଏ ଜୀବନ ମୋ ଦେଶ ପାଇଁ ।
ପାକିସ୍ଥାନର କରାଚୀରେ ଜନ୍ମ ଗ୍ରହଣ କରିଥିବା ଆଡଭାନୀ ଦେଶ ବିଭାଜନ ସମୟରେ ଭାରତ ଚାଲି ଆସିଥିଲେ । ମାତ୍ର ୧୪ ବର୍ଷ ବୟସରେ ରାଷ୍ଟ୍ରୀୟ ସ୍ୱୟଂ ସେବକ ସଂଘରେ ଯୋଗଦେଇଥିଲେ । ପରବର୍ତ୍ତୀ ସମୟରେ ସର୍ବାଧିକ ସମୟ ପର୍ଯ୍ୟନ୍ତ ସେ ଥିଲେ ବିଜେପିର ସଭାପତି । ୧୯୮୬ ରୁ ୧୯୯୦, ୧୯୯୩ ରୁ ୧୯୯୮, ୨୦୦୪ ରୁ ୨୦୦୫ ପର୍ଯ୍ୟନ୍ତ ସେ ବିଜେପିର ରାଷ୍ଟ୍ରୀୟ ସଭାପତି ଥିଲେ ।
ଦୀର୍ଘ ପ୍ରାୟ ତିନି ଦଶନ୍ଧୀ ଧରି ସାଂସଦ ଥିବା ଲାଲକୃଷ୍ଣ ଆଡଭାନୀ ସ୍ୱର୍ଗତ ଅଟଳ ବିହାରୀ ବାଜପେୟୀଙ୍କ ସରକାରରେ ଉପପ୍ରଧାନମନ୍ତ୍ରୀ ଥିଲେ । ତାଙ୍କ ହାତରେ ଥିଲା ଗୃହ ବିଭାଗର ଦାୟିତ୍ୱ । ୧୯୯୦ ରେ ସୋମନାଥରୁ ଅଯୋଧ୍ୟା ପର୍ଯ୍ୟନ୍ତ ସେ ରାମ ଜନ୍ମଭୂମି ରଥଯାତ୍ରା କରିଥିଲେ । ଦିନକୁ ୩୦୦ କିମି ଯାତ୍ରା କରିବା ସହ ପ୍ରତିଦିନ ୬ଟି ରାଲିକୁ ସମ୍ବୋଧିତ କରୁଥିଲେ । ଆଜି ଅଯୋଧ୍ୟାରେ ରାମମନ୍ଦିର ନିର୍ମାଣ ପଛରେ ତାଙ୍କର ଅବଦାନ ସ୍ମରଣୀୟ । ୯୬ ବର୍ଷୀୟ ଆଡଭାନୀ ଅସୁସ୍ଥତା କାରଣରୁ ଗତ ୨୨ ତାରିଖରେ ରାମମନ୍ଦିର ପ୍ରତିଷ୍ଠା ଉତ୍ସବରେ ଯୋଗଦେଇ ପାରି ନ ଥିଲେ ।
