ଭୁୁବନେଶ୍ୱର: ଓଡ଼ିଶା ରାଜନୀତିରେ ନୂଆ ସମୀକରଣ । ରାଜ୍ୟସଭା ନିର୍ବାଚନରେ ହାତ ମିଳାଇଛନ୍ତି ବିଜେଡି ଏବଂ କଂଗ୍ରେସ । ରାଜ୍ୟସଭା ଚତୁର୍ଥ ଆସନରେ ଡାକ୍ତର ଦତ୍ତେଶ୍ୱର ହୋତାଙ୍କୁ ବିଜେଡି କମନ୍ ପ୍ରାର୍ଥୀ ଭାବେ ମଇଦାନକୁ ଛାଡ଼ିଥିଲା ବେଳେ କଂଗ୍ରେସ ତାହାକୁ ସମର୍ଥନ କରିଛି । ଆଜି ପ୍ରାର୍ଥୀପତ୍ର ଦାଖଲ ବେଳେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଏବଂ ପିସିସି ସଭାପତି ଭକ୍ତ ଚରଣ ଦାସ ଏକାଠି ହୋଇଛନ୍ତି । ଡାକ୍ତର ହୋତାଙ୍କ ବିଜୟ ନେଇ ଦୁହେଁ ସମ୍ପୂର୍ଣ୍ଣ ବିଶ୍ୱାସ ଦେଇଛନ୍ତି ।
ଆଜି ଥିଲା ପ୍ରାର୍ଥୀପତ୍ର ଦାଖଲର ଶେଷ ଦିନ । ଚାରିଟି ଆସନ ଲାଗି ୫ ଜଣ ପ୍ରାର୍ଥୀ ପତ୍ର ଦାଖଲ କରିଥିଲେ । କମନ୍ ପ୍ରାର୍ଥୀ ଡାକ୍ତର ଦତ୍ତେଶ୍ୱର ହୋତାଙ୍କ ପ୍ରାର୍ଥୀପତ୍ର ଦାଖଲ ବେଳେ ବିଧାନସଭା ରିଟର୍ଣ୍ଣିଂ ଅଫିସରଙ୍କ ପ୍ରକୋଷ୍ଠରେ ରୋଚକ ଦୃଶ୍ୟ ଦେଖିବାକୁ ମିଳିଥିଲା । ସାମନା ଚେୟାରରେ ବସିଥିଲେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ତାଙ୍କ ପାଖକୁ ପାଖ ବସିଥିଲେ ପିସିସି ସଭାପତି ଭକ୍ତ ଚରଣ ଦାସ, କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ, ବରିଷ୍ଠ ନେତା ନରସିଂହ ମିଶ୍ର ଏବଂ କଂଗ୍ରେସ ପ୍ରଭାରୀ ଅଜୟ ଲଲୁ । ଉଭୟ ଦଳର ଅନେକ ବିଧାୟକ ଏବଂ ସାଂସଦଙ୍କୁ ପଛରେ ବସିବା ଏବଂ ଛିଡ଼ା ହେବା ଦେଖିବାକୁ ମିଳିଥିଲା । ଅନ୍ୟମାନଙ୍କ ଗହଣରେ ନବୀନ ଏବଂ ଭକ୍ତ ଛିଡ଼ା ହୋଇ ଫଟୋ ପୋଜ୍ ମଧ୍ୟ ଦେଇଥିଲେ ।
ବିଜେଡି ସହ ଏକାଠି ହେବାକୁ ନେଇ ଖୁସି ହୋଇଛନ୍ତି ଭକ୍ତ । ସେ କହିଛନ୍ତି, ନବୀନ ପଟ୍ଟନାୟକ ଏବେ ବି ଓଡ଼ିଶାର ସବୁଠାରୁ ଲୋକପ୍ରିୟ ନେତା । ସମାଜବାଦୀ ନୀତି ଆଦର୍ଶରେ ତାଙ୍କ ଦଳ ରହିଛି । ସମାଜବାଦୀ ଓ ସମଭାବାପନ୍ନଙ୍କୁ ଏକାଠି ହେବା ପାଇଁ ନବୀନ ବାବୁ ଆହ୍ୱାନ ଦେଇଥିଲେ । ଆମେ ଏକାଠି ହେବା ଓଡ଼ିଶା ରାଜନୀତିରେ ଏକ ଐତିହାସିକ ପଦକ୍ଷେପ । ଆମ ୩ ଦଳର ସମର୍ଥନରେ ଡାକ୍ତର ଦତ୍ତେଶ୍ୱର ହୋତା ପ୍ରାର୍ଥୀ ହୋଇଛନ୍ତି । ଡାକ୍ତର ହୋତାଙ୍କ ବିଜୟ ଶତ ପ୍ରତିଶତ ନିଶ୍ଚିତ । ଆମର ବିଧାୟକମାନେ ଏକଜୁଟ୍ ଅଛନ୍ତି । କୌଣସି ଭୁଲ୍ ନିଷ୍ପତ୍ତି କେହି ନେବେନି ବୋଲି ଭକ୍ତ ଦାବି କରିଛନ୍ତି ।
ଅନ୍ୟପକ୍ଷରେ, ରାଜ୍ୟସଭା କମନ୍ ପ୍ରାର୍ଥୀ ଡାକ୍ତର ହୋତାଙ୍କୁ ନବୀନ ଶୁଭେଚ୍ଛା ଜଣାଇବା ସହ ତାଙ୍କର ବିଜୟ ହେବ ବୋଲି କହିଛନ୍ତି । କଂଗ୍ରେସ ସହ ସମ୍ଭାବ୍ୟ ମେଣ୍ଟକୁ ନେଇ ସାମ୍ବାଦିକଙ୍କ ପ୍ରଶ୍ନର ସେ ଧାଡ଼ିକିଆ ଉତ୍ତର ଦେଇଥିଲେ । ସମୟ କହିବ ଭବିଷ୍ୟତ ବୋଲି ସେ କହିଛନ୍ତି ।
୪ଟି ଆସନ ଲାଗି ଶେଷ ଦିନରେ ଆଜି ୫ ଜଣ ପ୍ରାର୍ଥୀପତ୍ର ଦାଖଲ କରିଛନ୍ତି । ପ୍ରଥମ ଏବଂ ଦ୍ୱିତୀୟ ଆସନ ପାଇଁ ବିଜେପିରୁ ମନମୋହନ ସାମଲ ଏବଂ ସୁଜିତ୍ କୁମାର, ତୃତୀୟ ଆସନ ପାଇଁ ବିଜେଡିରୁ ଡ. ସଂତୃପ୍ତ ମିଶ୍ର ଏବଂ ଚତୁର୍ଥ ଆସନ ଲାଗି ଦିଲ୍ଲୀପ ରାୟ ଏବଂ ଡାକ୍ତର ଦତ୍ତେଶ୍ୱର ହୋତା ନାମାଙ୍କନ ଭରିଥିଲେ । ଦିଲ୍ଲୀପ ରାୟ ସ୍ୱାଧୀନ ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଥିବା ବେଳେ ବିଜେପି ତାଙ୍କୁ ସମର୍ଥନ କରିଛି । ଡାକ୍ତର ହୋତା କମନ୍ ପ୍ରାର୍ଥୀ ଭାବେ ପ୍ରାର୍ଥୀପତ୍ର ଦାଖଲ କରିଥିଲା ବେଳେ କଂଗ୍ରେସ ତାଙ୍କୁ ସମର୍ଥନ କରିଛି ।
ଆଜି ପ୍ରଥମେ ପ୍ରାର୍ଥୀପତ୍ର ଦାଖଲ କରିବାକୁ ଆସିଥିଲେ ବିଜେଡିର ଡ. ସଂତୃପ୍ତ ମିଶ୍ର । ପ୍ରସ୍ତାବକ ଥିବା ସଭାପତି ନବୀନ ପଟ୍ଟନାୟକଙ୍କ ସହ ଅନ୍ୟ ବିଧାୟକ ଓ ସାଂସଦମାନେ ଉପସ୍ଥିତ ଥିଲେ । ରିଟର୍ଣ୍ଣିଂ ଅଫିସରଙ୍କ ପାଖରେ ସେ ଦୁଇ ସେଟ୍ ପ୍ରାର୍ଥୀପତ୍ର ଦାଖଲ କରିଥିଲେ । ପରେ ପରେ ନାମାଙ୍କନ ଭରିଥିଲେ କମନ୍ ପ୍ରାର୍ଥୀ ଡାକ୍ତର ଦତ୍ତେଶ୍ୱର ହୋତା । ବିଜେଡି ସଭାପତିଙ୍କ ସହ ଅନ୍ୟ ପ୍ରମୁଖ ନେତା ପିସିସି ସଭାପତି ଭକ୍ତ ଚରଣ ଦାସ, ବିଧାୟକ ଦଳ ନେତା ରାମଚନ୍ଦ୍ର କାଡାମ୍, ବରିଷ୍ଠ ନେତା ନରସିଂହ ମିଶ୍ର, ପ୍ରଭାରୀ ଅଜୟ ଲଲୁ ଉପସ୍ଥିତ ଥିଲେ । ଡ. ହୋତା ୩ ସେଟ୍ ନାମାଙ୍କନ ଭରିଥିଲେ ।
ଏହାପରେ ପ୍ରାର୍ଥୀପତ୍ର ଦାଖଲ କରିବାକୁ ଆସିଥିଲେ ବିଜେପିର ମନମୋହନ ସାମଲ ଏବଂ ସୁଜିତ୍ କୁମାର । ଉଭୟ ଦଳୀୟ କାର୍ଯ୍ୟାଳୟରୁ ବାହାରି ପ୍ରଥମେ ରାମମନ୍ଦିର ଠାରେ ପୂଜାର୍ଚ୍ଚନା କରିଥିଲେ । ତାପରେ ଏକ ଶୋଭାଯାତ୍ରାରେ ବିଧାନସଭା ଆସି ରିଟର୍ଣ୍ଣିଂ ଅଫିସରଙ୍କ ନିକଟରେ ଦୁଇ ସେଟ୍ ଲେଖାଏଁ ନାମାଙ୍କନ ଭରିଥିଲେ । ପ୍ରାର୍ଥୀପତ୍ର ଦାଖଲ ବେଳେ ଦଳୀୟ ବିଧାୟକମାନଙ୍କ ସହ ମୁଖ୍ୟମନ୍ତ୍ରୀ ମୋହନ ମାଝୀ ମଧ୍ୟ ଉପସ୍ଥିତ ଥିଲେ । ସେମାନଙ୍କ ପରେ ନିଜ ପତ୍ନୀଙ୍କ ସହ ନାମାଙ୍କନ ଭରିବାକୁ ଆସିଥିଲେ ସ୍ୱାଧୀନ ପ୍ରାର୍ଥୀ ଦିଲ୍ଲୀପ ରାୟ । ରିଟର୍ଣ୍ଣିଂ ଅଫିସରଙ୍କ ପାଖରେ ଦୁଇସେଟ୍ ନାମାଙ୍କନ ଭରିଥିଲେ । ମୁଖ୍ୟମନ୍ତ୍ରୀଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ ।
