ଖାଲି ସମର୍ଥନ ଦେଲେନି, ସମର୍ଥନ ପାଇଁ ଅପିଲ୍ କଲେ

ଭୁୁବନେଶ୍ୱର: ଦ୍ରୌପଦୀ ମୁର୍ମୁଙ୍କୁ ଏନଡିଏ ରାଷ୍ଟ୍ରପତି ପ୍ରାର୍ଥୀ କରିବା ପଛରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଭୂମିକା ଏବେ ଚର୍ଚ୍ଚାରେ । ଏହି ଚର୍ଚ୍ଚାକୁ ଅଧିକ ଖୋରାକ ଯୋଗାଇଛି ମୁଖ୍ୟମନ୍ତ୍ରୀଙ୍କ ଅପିଲ୍ । ଓଡ଼ିଶାର ଝିଅକୁ ଦଳମତ ନିର୍ବିଶେଷରେ ସର୍ବସମ୍ମତିକ୍ରମେ ସମସ୍ତ ବିଧାୟକ ସମର୍ଥନ କରିବାକୁ ମୁଖ୍ୟମନ୍ତ୍ରୀ ଆଜି ଟୁଇଟ୍ ଯୋଗେ ଅପିଲ୍ କରିଛନ୍ତି । ଏହିଭଳି ଭାବେ ଏନଡିଏ ପ୍ରାର୍ଥୀ ଦ୍ରୌପଦ୍ରୀ ମୁର୍ମୁଙ୍କୁ ବିଜେଡି ଖାଲି ସମର୍ଥନ ଦେଇନି ବରଂ ଅନ୍ୟମାନଙ୍କ ସମର୍ଥନ ମାଗି ତାଙ୍କର ବିଜୟପଥକୁ ସୁଗମ କରିଛନ୍ତି । ମୁଖ୍ୟମନ୍ତ୍ରୀଙ୍କର ଏହି ଅପିଲ୍ କଂଗ୍ରେସ ବିଧାୟକଙ୍କୁ ଧର୍ମ ସଙ୍କଟରେ ପକାଇବା ବିଚିତ୍ର ନୁହେଁ ।

ସୂଚନାଯୋଗ୍ୟ, ଗତକାଲି ଦ୍ରୌପଦ୍ରୀ ମୁର୍ମୁ ରାଷ୍ଟ୍ରପତି ପ୍ରାର୍ଥୀ ଘୋଷଣା ହେବା ପରେ ରୋମ୍ ରେ ଥିବା ମୁଖ୍ୟମନ୍ତ୍ରୀ ତାଙ୍କୁ ଟୁଇଟ୍ କରି ଶୁଭେଚ୍ଛା ଜଣାଇବା ସହ ପ୍ରତିଟି ଓଡ଼ିଆଙ୍କ ପାଇଁ ଏହା ଗର୍ବ ଓ ଗୌରବର ମୁହୂର୍ତ୍ତ ବୋଲି ଲେଖିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏ ନେଇ ତାଙ୍କ ସହ ଆଲୋଚନା କରିଥିଲେ ଏବଂ ତାହା ତାଙ୍କୁ ଖୁସି ଦେଇଥିଲା ବୋଲି ମୁଖ୍ୟମନ୍ତ୍ରୀ ଜଣାଇଥିଲେ । ସୁତରାଂ, ଦ୍ରୌପଦ୍ରୀ ମୁର୍ମୁଙ୍କ ପ୍ରାର୍ଥୀତ୍ୱ ସମ୍ପର୍କରେ ମୁଖ୍ୟମନ୍ତ୍ରୀ ପୂର୍ବରୁ ପ୍ରଧାନମନ୍ତ୍ରୀଙ୍କଠାରୁ ଅବଗତ ହୋଇଥିବା ଏଥିରୁ ସ୍ପଷ୍ଟ ହୋଇଥିଲା ।

ରାଷ୍ଟ୍ରପତି ଭୋଟ ଗଣିତରେ ବିଜେପି ନେତୃତ୍ୱାଧୀନ ଏନଡିଏ ପ୍ରାର୍ଥୀଙ୍କ ପାଇଁ ବିଜେଡି ଓ ୱାଇଏସଆର୍ କଂଗ୍ରେସର ସମର୍ଥନ ନିର୍ଣ୍ଣାୟକ ହୋଇଥିବାରୁ ନବୀନଙ୍କ ସହ ପ୍ରଧାନମନ୍ତ୍ରୀ ଆଲୋଚନା କରିଥିବା କୁହାଯାଉଛି । ଦ୍ରୌପଦ୍ରୀ ମୁର୍ମୁଙ୍କ ପ୍ରାର୍ଥୀତ୍ୱରେ ବିଜେପିର ମହିଳା ଓ ଆଦିବାସୀ କାର୍ଡ ସହିତ ଓଡ଼ିଆ ଭାବାବେଗ ଜଡ଼ିତ ଥିବାରୁ ବିଜେଡି ସମର୍ଥନ ହାସଲର ଆକଳନ ହୋଇଥିଲା ।

ତେବେ ଦ୍ରୌପଦୀ ମୁର୍ମୁଙ୍କ ପ୍ରାର୍ଥୀତ୍ୱର ପ୍ରସ୍ତାବକ ନବୀନ କି ମୋଦି ଯିଏ ହୁଅନ୍ତୁ ନା କାହିଁକି ରାଜନୈତିକ ଦୃଷ୍ଟିରୁ ଏହା ଉଭୟ ବିଜେପି ଓ ବିଜେଡିକୁ ଫାଇଦା ଆଣିଥିବା କୁହାଯାଉଛି । ଜାତୀୟସ୍ତରରେ ଓଡ଼ିଶା ଓ ନବୀନଙ୍କ ଗୁରୁତ୍ୱକୁ ବି ଏହା ବଢ଼ାଇଛି ।